(Day 1) 2015-04-01
住宿：TRYP Barcelona Aeropuerto Hotel
行程：香港 —> 莫斯科 —> 巴塞隆拿
這行程銀仔多左個名，高 Ling佢地全程叫我做團長，呢D名稱好似用來”孭鑊"喎⋯
高ling同港女最先到達機場check in，食住早餐等。我和另一位團友Ellen比較「準時」到機場，所以早餐臨急臨忙咁食。集合時，港女嬲我將佢袋護膚用品寄艙，詐晒型... （港女按：有人又話要食澳門茶餐廳乜乜乜，最後又係趕頭趕命。本來想喺禁區買護膚品，但唔捨得俾幾百蚊，見隨身有潤手霜、潤唇膏就算了。其實帶護膚品上機，除咗保養之外，仲有打發時間嘅用途，可惜銀仔唔明白呢個道理。）
過緊保安檢查時收到通知，我地有得upgrade，當然即時衝去登機口，唔係機會無左點算？
上到飛機， 嘩！原來upgrade了我地特選經濟艙，即商務及經濟嘅中間。座位闊落得多，我咁高都唔頂腳呀，仲有座位周邊設施，已令我有坐緊商務嘅感覺喇。團友們個個心花怒放，係咁玩頭燈、腳墊，覺得是好的開始，而港女亦下咗啖氣，哈哈~ 銀仔第一次有呢種享受既感覺，仲要係長途機添！銀仔終於脫離「這些機會不是屬於我的」Wakaka~
![]() |
| 右面嘅係我上次搭俄航時用剩嘅濕紙巾 |
食飛機餐時特別招待，由空姐替我們打開主菜餐盒嘅錫紙，好大份嘅飛機餐，仲有餐巾、金屬餐具，認真大鄉里... 唔係，係窮風流嘅銀仔，第一次咁歎咋！港女起飛前上網search，原來這個客艙係上年年尾新推出，價錢比經濟客位貴大約一倍，今次名副其實「未出發先興奮」。
食飽飽擦牙瞓覺 （港女按：之前搭通宵機都瞓唔到，日光日白又邊會有睡意？只好睇戲、睇書同埋玩candy crush打發時間。自從飛機有USB充電之後，只要帶條線就搞掂，唔使連埋重到死嘅「尿袋」，好方便呀。）
@1420
瞓醒想睇吓戲，可惜只有英文及俄文囉... 我文盲嚟㗎嘛⋯
約十小時後，到達莫斯科Sheremetyevo機場。窗外見到雪，從飛機廣播得知，莫斯科氣溫只得1度。徒步行去另一個客運大樓，見到有普京肖像T-shirt的自動售賣機，唔知換轉喺香港會點呢？轉機有三個小時空檔，高Ling建議去間有wifi嘅cafe上網打卡，每人一杯飲品盛惠約30-40HKD。咦！諗諗吓，盧布大跌後咪即係半價？記得幾年前，莫斯科物價明明好貴嘛。
![]() |
| 港女扮野教俄文 |
1850時登機，呢班機只有一半乘客，坐返基本經濟艙，有少少返唔到轉頭嘅感覺。由於我早一星期已調較好生理時鐘，食完飛機餐後等於香港半夜，覺得仲有精神，而三個港女已瞓到死豬咁lu。好驚，唔知一陣到巴塞會否有危險呢？擔心擔心...
![]() |
| 同剛才差好遠⋯ |
第一晚入住由高Ling預先book好嘅機場酒店，並一早得知酒店接駁巴士定時服務至2300時。我們2300時到達巴塞隆拿機場，所以要致電酒店安排。喺商店換了€1打電話，就咁就用左€1啦... 由港女打電話用西班牙文溝通，職員亦確認咗等接駁車地點，仲話要等15-20分鐘。
沿住機場酒店專車嘅指示牌行，出到戶外，又唔算好凍，空氣仲幾清新。去到等車地點，入住其他酒店旅客陸續上車走人，我地就等咗一段時間。原來呢班接駁車都坐爆晒，咁好心服務時間延長D啦！浪費晒啲電話費！
上車後經過十多分鐘才到達，為何離客運大樓咁遠都仲叫機場酒店？
![]() |
| 機場廣告 |
![]() |
| 機場停車場一景 |
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
