噚日零晨真係做咗一件好有意義既嘢,就係行咗Orbis
既盲俠行‧全程真係要行六小時,行咗半個香港島‧我哋零晨12點半由灣仔運動場出發,途徑金紫荊廣場,再去大會堂,到IFC,跟住干諾道中到干諾道西,係
中山紀念公園,作第一個中途休息站‧OK,行咗兩個點,仲頂得住‧所以真係抖咗一陣又起行‧跟住行既地方真係好陌生,原來對於西區咁唔熟‧首先我都唔知西
區體育館隔離嗰公園叫中山紀念公園,我以為係文武廟嗰頭‧好,中山紀念公園出發,行過電車廠‧噢!原來電車尾站係呢度,真係未去過,跟住行嗰d路就更陌
生,望見有好多樓,喺邊度嚟架,我唸係西營盤,嘩真係唔知西營盤海邊咁多樓‧跟住一路行一路行,去到堅尼地城,亦都係呢度開始行上山咁,話上山其實就唔係
好斜,不過就好似車路,行人路就比較窄‧上完一段斜路就有個補給點‧OH!原來只係可以補充水分冇得休息,咁唯有繼續行,不知不覺原來已經行咗兩個幾鐘,
唔怪得知小腿已經咁攰,好辛苦,但係頂埋佢‧但係跟住既路真係好甘,雖然都好平,但係唔知係邊,同埋好遠啊,因為我哋係行緊域多利道,薄扶林道,勁長啊,
一路行只係見到d樓,經過英基,仲要過墳場,嘩好驚!跟住仲要行咗好耐,先見到數碼港d新樓‧及後有華富邨‧但係距離香港仔仲有好遠‧平時坐巴士,好似過
幾個站就到,點解行係咁遠架‧我隻腳已經由好攰到冇知覺‧
好繼續一路行一路行,行咗四個鐘啦,終於落斜見到香港仔漁市場,仲望到對面既海怡半島‧終於到咗第二個中途站 ─ 香港仔海濱公園‧嘩!真係好攰,好多人都停咗係呢個點,大會亦有好多椅放係度‧我哋停底食吓嘢先,食吓朱古力補充體力,再要拉拉根先‧
繼續起程,點樣可以由香港仔去到淺水灣,乜有路可以咁行,真係唔知,再次証明對香港既路唔熟識‧噢!原來由海洋公園隔離條黃竹坑道入啊,都好快就行到去深水灣‧好啊!仲有最後一站,就係由深水灣入淺水灣‧係深水灣都好多公公婆婆係度,可能游完早水‧
平時搭車由淺水灣好快就到深水灣,點解行要咁耐,一路行都見唔到淺水灣酒店,只係望到嗰海,而我哋就沿海邊一路行,哎吔!終於見到好多燈啦,就到啦!好行埋去沙灘到就得,終於到咗,係6點15分啦!真係行足6個鐘啊好攰,影埋相就快d走啦,好鬼眼瞓同埋好攰啊!
7點20分返到屋企‧好!完成今次我既壯舉!
感謝 vi老篤日記 提供以上資料
vi老篤日記的個人網誌: http://vivi-1212.blogspot.hk/