(Day 34) 2011-03-11
住宿：巴士上
行程：Cuzco —> 利馬
高度:海拔3700米
清晨比手提電話Smartone既一個SMS嘈醒，內容話日本發生8.8級大地震，仲引發大型海嘯Tim!!! 所以即時起身開電視睇CNN，當然關心地震之餘也關心後日將會去，係南太平洋既復活節島啦! (當時唔知咁大劑架! 所以只擔心我既行程)
不過聽當地人講，智利及秘魯既海岸線好長，所以都有機會被海嘯波及喎… 吓! 唔係嘛… 不過我都知道幾十年前智利既地震，D海嘯都沖到日本做成傷亡，就算今次沖到過黎真係不足為奇呀!
不過相信，復活節島有Moai巨石像保護，一定逢凶化吉既。如果唔係之前經過咁多次既海嘯，Moai點會仍屹立不倒呢? (後來先知到經過修復…hehe~)
早餐係Hostal中庭既通道食，望望個天井，今天仍是多雲呢…
Hostal正門
![]()
食完早餐就探索吓呢個印加古城，漫無目的咁四圍行。係地標既教堂後街，竟然比我發現一處，買手信平到你唔信既地方。一件T-shirt竟可以平到$10-Sol喎!!!(即$30-HKD)呢度D既Tee好興整古做怪，將品牌改成當地既獨有既事物，如將Adidas改為Alpacas(羊駝)等等⋯幾攪笑，所以我都買左件~
![]()
老麥有喪事???
![]()
大街大巷旁，有好多拱門或入口，可以進入當地人既住宅範圍。係呢D入口裡面，隱藏著好多當地人既小型食市架! 午餐就係食地道既扒餐$4-Sol，加上一支當地品牌既忌廉$1-Sol計埋都係十零蚊港紙咋!真係抵~
食完返Hostal攞齊行李，問清楚搭的士去長途巴士站既價錢，用左$3-Sol就坐的士去到巴士總站。
入到巴士總站，見有大把公司有車去首都利馬。就係因為利馬係首都，所以我可放心唔使一早check定班次，知道一定大把車搭。
巴士票價有平有貴，當然視乎巴士總類同路線啦! 最後選擇左平既Flower巴士公司，而且仲有得講價Tim~ 講平左$10-Sol一張，都成$30-HKD架! 買既係1400開出，費用$70-Sol($210-HKD)，路經有神秘圖案既納斯卡，總共要停6個站，要係第二日1000先到目的地。
平既代價當然就係停6個站，同架巴士無咁靚仔啦…
Cruz Del Sur公司，照片中既巴士應該就最豪華勒! 仲話Non stop tim! 不過就要貴多三百幾蚊港紙，費用為$180-Sol($540-HKD)
買定上車食~
巴士一樣係山區行駛，當架車行到天都黑齊既時份，車前面突然傳出”Boom”一聲巨響，跟住架車就急剎!
個個都去晒車頭睇吓乜事，原來又山泥傾瀉呀!!!(連續兩日真黑仔) 有舊大石碌左落馬路而發生先前既巨響，仲要係幾個車位前發生Tim… 都咪話唔驚!
巴士餐
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
