探險家攻略 > 休閒玩樂 / 旅遊 > 海灘 / 郊遊 / 1天短線 > 麥理浩徑第二段

麥理浩徑第二段

由平凡人於 2015-08-24 09:00:00 發表 | 累積瀏覽 780

分類：海灘 1天短線郊遊；地區：西貢

2-4-2015

好耐都冇去行山郊遊啦，難得有時間想去走走，就同媽媽一齊去左香港其中一個最靚既地方西貢大浪灣，行又易行又有靚景既麥理浩徑第二段


朝早去到西貢市中心，遊人們大多數都未到，市中心比較清靜


有間越來越少見既舊式士多，買定支水等車出發

去大浪灣最舒服既方法就係坐車去到西灣亭起步，可以避開麥理浩徑第二段最難上最辛苦既西灣山，坐的士同村巴都可以去到；我同媽媽只有兩個人坐村巴化算一啲，不過村巴班次唔多要預好時間，早少少去排隊

村巴站係正麥當勞對出

大約半個鐘車程去到西灣亭落車

就由呢道正式起步


一開始大多數都係平路，好易行



沿路可以見到萬宜水庫景色，係一個幾特別既地方；因為春天關係萬宜水庫儲水唔多，而家夏天去會更多水更藍更靚



慢慢行大約15分鐘，去到呢小段路最高既位置吹筒坳，可以吹吹風清涼一下；頭先落車既地方西灣亭地勢已經好高，所以行黎呢道唔會覺得辛苦

經過吹筒坳後見到大海啦，之後就係一段好斜既落斜路

好彩係落斜，行呢道上斜一定超級辛苦


唔洗10分鐘就落到海平面，見到水啦


向前行多一陣就係西灣村



西灣村有幾間士多，有野飲有野食，以前經過好多時都會食碗豆腐花食碗餐蛋麵，今日係平日食開個間士多冇開門tim...

海邊另一間士多有開門


經過一堆士多後就可以見到大浪西灣，沙又幼又靚，比起出名既淺水灣呢道既沙靚100倍！

今日天氣唔好非常多雲，難得見到少少藍天


沙灘中間有堆石將大浪西灣分為左右兩邊



頭先經過既右邊沙灘



將會前往既左邊沙灘



好多學生都黎到呢道郊遊

對住大海露營一定好正

經過沙灘之後大家都爬石上返麥理浩徑，好易就可以上到；其實真正既麥理浩徑係係沙灘旁邊經過而唔洗行沙灘，不過個邊從來都冇人行，個個都會穿過沙灘，哈哈^^

由山上望返落沙灘



慢慢行上一個大約一百米高既小山丘，都算易行



回望大浪西灣

大海丫！！

上左小山丘後係平路多，好易行

下面沙灘就係下一個目的地鹹田灣啦

鹹田灣沙灘睇落比頭先西灣更大更闊，而且沙好似粉一樣咁幼咁靚


有外國家庭係道露營



有條小河

鹹田灣呢道本來有條好特別既橋比人過河，不過水乾左條橋就變成咁啦

得返條木板



經過沙灘後就去到士多，係呢道開餐


去左入面既士多，揀左海景位對住個海食


雖然唔肚餓，但一場黎到點都要食返啲野先開心，唔知點解行山食既餐蛋麵係特別好食，平時係食唔到呢種感覺架，哈哈^^

仲有冰凍紅豆冰

食完野休息一下又要繼續趕路

係一條又平又靚既路；本來正式既麥理浩徑係唔會經過鹹田灣士多同呢段路，不過呢道易行而且又經過沙灘士多風景又好，大部份人都會行呢道



行15分鐘去到大浪村，呢道都有士多可以食野，而且仲平啲tim，但呢道冇海景，停低食野既人唔會好多，冇鹹田灣西灣咁受歡迎，我都冇係呢道食過野...

好多屋都荒廢晒啦...

離開大浪村就開始上山，要上到一個大約160米高既地方


呢道斜路多比較少樓梯，慢慢行都唔會好辛苦；唔經唔覺就上到去呢段路最高既位置大浪坳，可以飲啖水休息一下

輕輕鬆鬆落山lu

話咁快就去到赤徑，再次黎到海邊


赤徑呢道有船開去黃石碼頭，我地就唔坐船，繼續向前行



好靚既石灘



有人撤網捉魚



赤徑有好多冇人住既村屋


好靚丫

上面呢啲好似仲有人住？

離開赤徑各北譚凹方向行

又要上多百零米，好彩都係斜路，算易行


可以望到下面黃石碼頭風景，好靚丫



見到前面廁所，終於去到麥理浩徑第二段終點北潭凹，好野


呢道有巴士返去西貢市中心

難得去到西貢，乘機四周圍行行


西貢碼頭有好多小艇賣海鮮，價錢可能比較抵，吸引好多人圍觀同買，呢個都算係西貢一大特色



如果有人買野，船買會用長杆將海鮮送到買家手上，買家將錢放入網裡面就可以

碼頭邊泊滿好多賣野既小艇



媽媽都有幫襯，佢話比係街市買平好多，而且仲新鮮


好多野賣架，哈哈

買完野都差唔多天黑，又係時候返屋企lu，如果天氣好風景一定靚好多，西貢係一個好靚既地方黎架^^

鐘意SeeWide的分享，給我們一個Like吧！