10

[親子旅遊] 台北宜蘭 DAY3 台北市木柵動物園/臺北市立動物園

kimfamilytravel 於 2014-12-30 00:00:00 發表  |  累積瀏覽 785

分類:長線旅遊 特色景點 ;地區:台北
今日係2014年最後倒數第2日, 聽日就係除夕啦

我哋終於出發去木柵動物園啦! 兩個小朋友都期待而久, 要見到長頸鹿同大笨象啦!




因為之前上網睇過話9:30就好去到, 如果唔係會超多人排隊入場

所以我一早落咗街, 去「永和豆漿」買外賣早餐俾佢哋食

個個去完西門都話要嚟試一試,

好在我嚟得早, 我落完單之後唔夠5分鐘, 就已經超多人!


買完番入酒店, 佢哋都起哂身, 我放到一枱都係, 買嗰陣好似唔駛錢咁

但求好日唔嚟一次, 咩款都試吓!



最後總結最好食係呢款蛋餅, 大家order自己鍾意既餡料, 都一樣咁正,

價錢冇Mark低啦, 總之我講幾多錢都唔影響你食唔食, 

咁出名都唔係好貴, 好似你食香港「鍋貼大王」咁, 唔駛睇價錢落單

好平好平, 一定唔會食窮你


食完酒店自助早餐之後就出發,

要9:30去到真係冇咩可能, 我哋差唔多10:00先喺酒店出發

希望去旅行都唔好攪到自己太辛苦, 都係順期自然啦!

行去西門站途中, 見到一紅一綠既郵筒, 都要影番張相!


我哋見到台灣的警車呀, 芊芊最鍾意B BOO車, 但係芊芊可能未瞓醒, 冇咩興趣


大約搭咗40分鐘捷運, 我哋都係在忠孝復興站轉車

一路去到尾, 動物園站落車就得喇

落車之後行5分鐘就到動物園門口

沿路有好多帽賣, 我各買咗一頂俾哥哥同妹妹!

果然售票處係排哂長龍, 好似我哋用悠遊卡入場, 所以直接就入咗去唔駛排隊_


入到去首先梗係拎番張地園, 但係咁大行邊度先呢

當然我一早做咗功課, 最理想的行程係先去熊貓館

因為熊貓館好多人睇, 要分段入場同排隊!

不過唔好似為好近入口, 原來都幾遠, 行咗差唔多10-15分鐘先到

果然係好多人, 我諗我哋再遲D會仲多,

佢入場係跟住一條龍咁入, 所以去到最近熊貓既位置, 

你係唔可以停留太耐睇, 一定要邊行邊睇, 如果唔係就阻住後面既人,

有塊玻璃隔住好似感覺冇咁貼近, 而且有點遠!


好快迫吓迫吓就行過個窗口睇完, 出嚟唯有喺其他地方影吓相啦

沿住後面個旋轉斜路行上去, 係購物區同餐廳


牆上的壁畫都好靚!


呢個精品店都好大好靚! 可以話係半個博物館咁,

你睇吓身後既恐龍化骨


賣公仔既地方仲有呢隻1:1既大象, 唔知係咪買得架呢? 幾錢呢?


唔知呢隻係咪叫做「水瀨」, 我覺得佢係最得意!


喺精品店隔離有間熊貓餐廳, 時間仲早, 所以冇咩人!

喺動物園裡面冇咩特別食嘢既地方,

所以呢度算係一個比較坐得舒服既餐廳,

嘢食就唔知得唔得!



餐廳隔離有個厠所, 所以幫襯一吓! 連厠所裡面既設施都充滿著卡通圖案



過咗一陣, 哥哥就已經整欄咗佢自己頂Angry Bird帽喇, 

唔知係咪個個男仔都係零舍粗魯, 佢解唔開頂帽就用力扯

結果借咗妹妹頂蛙蛙帽帶! 又幾好睇喎


在場外有隻大大熊貓像, 哥哥又扮吓佢...


點解熊貓館外面有隻黑熊既?


呀芊都騎番隻細熊貓影張相先


由熊貓館行番落少少, 就會見到園內列車站, 

可以帶你遊覽整個動物園, 帶你去到你想參觀的場館

架列車都好靚, 扮到成個火車咁,

大家要排隊輪侯上車, 好有秩序, 唔算等得好耐

差唔多10分鐘度, 列車就到站, 

乘客在另一邊門下車, 我哋就在另一邊準備上車喇!


話咁快我哋上到園內最高的地方 - 鳥園車站

另一架列車都已經隨後到, 係黃色架!

Hysan就即刻話想搭多次

(唔係又要搭番落去卦)


當然我話一陣間有機會就再搭啦!

個車站牌好靚, 好似去咗日本咁!


我哋先去到企鵝館同埋溫帶動物區, 

連個洗手間都靚過人, D指示牌又好靚

唔知係咪去到香港以外既地方,

所以睇到乜都話靚!! 轉咗遊客Mode


好可惜, 今日既企鵝館冇開放, 

一心諗住嚟動物園有得睇企鵝, 因為老婆好鍾意企鵝!!

「唔緊要啦, 海洋公園都有得睇啦」(我知你哋實會咁樣講!)

但係唔同架嘛, 香港都見到個天啦, 

但係唔知點解去到第二度望個天都覺得會靚D

之後我哋唯有去到隔離兩棲爬蟲動物館

在門口已經有好多隻青蛙歡迎你!

Hysan即刻就跳過去當佢單槓咁玩! 始終呀芊都係斯文D



仲有隻龜! 粉紅色都幾靚, 

定係原本唔係咁, 俾太陽曬得多甩色咋


嘩, 「貢」大條蛇咁近距離你見過未! 

呀芊一D都唔驚, 仲越睇越近



媽咪好有心機同耐性逐一動物跟Hysan分享,

呢個跳跳紮紮既芊芊就冇你咁好氣, 一支箭就走完整個館,

去到出口前有個視像教育區睇卡通!


離開咗兩棲爬蟲動物館之後, 我哋就向前行落去非洲動物區


見到好大隻BearBear呀, 小朋友好興奮!



之後見到好似係狸貓區, 但係唔知係咪匿埋咗, 

所以咩都睇唔到, 只好在影吓招牌「到此一遊」





沿路見到好多唔同既動物, 有大有細, 真係不能盡錄, 

小弟冇好好記低每一隻既名稱, 



好遙遠見到好似係大水牛既動物


因為冇帶支zoom lens出嚟, 所以呢張都算影得近law!

如果唔係怕重, 我都會帶支24-70mm, 大家有自駕遊的話記住唔好帶漏鏡



好大隻犀牛呀, 原來佢哋真係衝嚟衝去, 撞嚟撞去架!


嘩, 我冇諗過有獅子睇呀! 佢好嘆咁喺度曬太陽!




哈哈, 呢堆河馬好攪笑呀!


過咗河馬區, 有個廣場可以俾人休息吓, 有洗手間, 有小食店!




因為大家食完個好飽既早餐後, 都未食嘢,

所以喺呢度停一停, 買咗嘢食, 圖中係雞卷, 都唔差喎!


喺媽咪同呀芊休息既同時, 我同Hysan行去附近既長頸鹿區望吓長頸鹿





差唔多行番去園區門口, 有架好靚既懷舊火車!


仲有隻駱駝係度, 咁啱有職員餵緊佢食嘢!

我試吓多口問吓職員, 可唔可以俾小朋友試吓餵,

居然職員話OK, 於是Hysan多了一個餵飼的經歷!



D 雞周圍走!! 捉番隻走得唔得? HAHA~


原來撞啱今年係動物園成立的100週年, 好值得影番張相留念呀!

(呀芊已經瞓咗, 所以上唔到鏡)


Photo by CANON 5D Mark III, Len | EF 35mm f/1.4L USM
iPhone 5S/ iPad 2

呀劍評分: 10分


呀劍貼士:
1.臺北動物園全年開放,農曆除夕休園一天, 週一室內館輪休
 [教育中心(含圖書館), 酷cool節能屋: 每逢週一公休]
[大熊貓館: 第1個週一公休]
[企鵝館: 第2個週一公休]
[兩棲爬蟲動物館: 第3個週一公休]
 [昆蟲館: 第4個週一公休]
2.於入園時於驗票處索取當日「大貓熊館入場券」
3.用悠遊卡直接刷卡進入動物園
4.10:30過後熊貓館會超多人
5.29/12當日只有教育中心例行性休館外

其他注意事項:
禁止餵食動物
各室內展示館禁止飲食
不得任意餵食、危害動物權益及妨礙動物保育
不得任意進行影響其他遊客參觀權益及遊園品質之行為
提醒您記得帶嬰兒推車來,也可以在遊客服務中心租用

註:
園外設麥當勞, 7-11
大熊貓館2樓設有石尚Cafe咖啡輕食館(有BB椅),萊爾富便利店(企鵝館外)
遊客列車$5/位
圓仔造型的雞蛋糕15個 $100
熱帶雨林區有美食區, $99 Pizza

呀劍評語: 真係好大好大好大呀, 若果你打算用半日嚟行就唔好喇, 一定要用全日

行程建議:
先到大熊貓館後於列車總站搭乘遊客列車至鳥園車站,由高處往低處依序步行參觀,即爬蟲館、溫帶區(企鵝館)、非洲區、沙漠澳洲區、熱帶雨林區、兒童動物園區(無尾熊館)、臺灣區、昆蟲館再至大門口,如此比較節省體力

台北市木柵動物園/臺北市立動物園 簡介
臺北市立動物園展示館相當多元化,分為戶外展示區及室內展示館兩部份,戶外展示區規劃區包括台灣鄉土動物區、兒童動物園、亞洲熱帶雨林區、沙漠動物區、澳洲動物區、非洲動物區、溫帶動物區、鳥園區、水鳥觀察區、濕地生態園、蟲蟲探索谷以及蕨園;室內展示館則有教育中心、昆蟲館、兩棲爬蟲動物館、無尾熊館、企鵝館以及酷cool節能屋,園區的多元化是您來台北市立動物園旅遊不可錯過的。

地址
台北捷運-動物園站

交通
搭乘文湖線,在動物園站下車, 1號出口出去,步行約1分鐘就到了

營業時間
開放時間:9:00 - 17:00(16:00停止入園)
動物展示:9:00 - 16:30
教育中心:9:00 - 17:00
圖 書 館:9:30 - 16:30

電話
02-8502-2810

網址
http://moooonspring.com/

(以上資料更新至文章當日)


============================================

感謝 呀劍萬帥 提供以上資料

呀劍萬帥的網誌: http://kimfamilytravel.blogspot.hk/


============================================

鐘意SeeWide的分享,給我們一個Like吧!
  • 攻略日期:N/A
    攻略地點:台北
  • 攻略時間:N/A
    是次消費:N/A
10人比"掂"
  • 特搜總編E 於2015-11-06 10:04:52 留言
    恭喜!經過「SeeWide評審團」一致通過,你的發佈已被選為推薦攻略!你將獲得200經驗值作獎勵!
  • 舉報 回覆
  • No.1

最多能輸入300字

累積瀏覽 533157

全部攻略 319

全部回應 118