(Day 5) 2015-04-05
住宿 : Hotel Le Chatelet
行程 : Nimes —> Saint-Paul-de-Fenouillet
原定只租五日車就還，今日已踏入第四日，但發現來來去去都係普羅旺斯區域。諗諗吓都玩夠了，每個小鎮也差不多，所以就決定今日趕路一去就去遠D，去較近西班牙邊境的地區。到現在才想起在法國應該要住一住酒莊，臨急抱佛腳下，上網搵到鄰近西班牙邊境、就近還車城市，位於比利牛斯山的一個酒莊。 (後來我地安咗個花名叫「牛蜱」爾士山，有養狗應該知道吧) 酒店reception幫手打咗好多次電話給酒莊，但又無人接聽。不過大家都諗住去到先算，大不了直接去還車城市吧，有車駛乜驚！呢班團友果然跟我無plan又冒險嘅團長夾得來噃！哈哈~
瞓醒後check out，去Nimes市中心食早餐。先去一個好迷幻嘅地下停車場泊好架車，上到路面見到一個大型廣場，遠一點就有競技場。團友Ellen路經競技場入口處時眼望望，我建議可以入去參觀，唔入怕會後悔。因為我去過羅馬鬥獸場，入唔入都無所謂。其他團友不知是否驚要趕路，所以都話唔參觀了，希望唔好有遺憾…
不知是否去錯區域，或者星期日一早未開門，只見有一間小食店，就於露天食早餐，不過天氣寒冷要忍一忍了。凍冰冰食熱辣辣嘅漢堡包、肉卷，一定覺得好食。店主仲提我地唔好餵雀仔，以免易請難送。
@1030
臨離開時，高Ling想搵普羅旺斯品牌L’OCCITANE護膚品，可能今日星期日，就算搵到咁都應該無咁早開門。
問人期間仲遇上好友善嘅嬸嬸，捉住我手話影張合照添！不論我歷來旅程、或今次旅行，遇見嘅法國人全部都好Nice，並不是日常聽到的咁"串"。
取車上返地面後，才發現有個希臘神殿。由於這個城市好繁忙，不便喺路面泊車，所以叫團友們落車拍吓照，我就兜個圈再回來。唔知希臘神殿叫乜名，所以set唔到GPS。城市路況繁忙，又多單程路，再次迷路了。兜了好耐先搵返啲團友...
與團友會合後，終於離開普羅旺斯。Set好GPS，便直奔位於比牛利斯山嘅酒莊住宿。@1200
因路途遙遠，於途中油站為架車加加油，人也小休一會吧！於便利店買了茶點，看見可樂€3.7有個靚靚水樽送，當然買埋啦。
再次起行時，雪藏牌嘅高Ling，一直話考牌後從未揸過車，竟然忽然舉手想接力揸車喎！出發前佢話好怕揸車，只怕得我一個司機會有意外，才去做國際牌以防萬一。見佢咁興致勃勃當然俾機會佢一展身手啦，揸熟左可以多個人幫手嘛~ 銀仔好似教車師父咁指導，高Ling於油站內轉第一個彎都未就啱位，但隨即就由油站小路轉入高速公路。條公路限速130km，D車篷篷聲飛過，好驚呀！我提佢踩油，有驚無險地喺公路打穩陣腳。之後高Ling仲越揸越好，仲行到141km添，要我提佢稍為減速！（港女按：車速高達141km，車上各人都感受唔到離心力、行車非常穩定和寧靜，足見Benz身價。）
![]() |
| 咁靚嘅風景梗係要用我架愛駒來做襯托啦~ |
Saint-Paul-de-Fenouillet
由Nimes開始駕駛了4個多小時，根據GPS到達一個小村莊，問村民都搵唔到間酒莊住宿...
進入山區後，只見離小村不遠嘅公路旁有一間住宿及一間賣酒嘅舖頭。回酒舖一問，酒舖嘅老伯話幫我地搵酒莊負責人，但打電話仍然無人接聽，都係放棄吧⋯
無選擇下，姑且試試附近唯一的住宿吧！只租房間價錢平D，但方圓百里唔見有得食，都係選擇貴少少的half board好了。經講價後，每人€62.5連晚、早餐。這住宿外型俾人覺得簡陋嘅感覺，但房間比想像中新淨舒適... 這裡風景唔錯，後面是流水淙淙嘅河流，再遠一點是一望無際嘅葡萄園。可能位於山區的郊外，太陽未落山已覺異常寒冷。
@1630
![]() |
| 房間景緻優美 |
![]() |
| 內部設計時尚，而且似新裝修過 |
安頓好行李後，與港女回剛才嘅酒舖買酒今晚用餐時飲。去到酒莊已不見剛才的伯伯，而是一名婦人及小妹妹。經介紹下買了一支白酒€6，結賬時仲見枱面有報章介紹該酒莊添！兩夫婦於這避世地方運作一個酒莊好溫馨呀！
老闆娘賣完酒俾我們便即時收舖，我與港女就擅自參觀吓。參觀時發現原來舖後就係葡萄園，即係住宿望出去一望無際嘅葡萄園呀！住唔到酒莊，喺門口稍為望吓都好吖~
![]() |
| 後來才知這是壓榨機，種晒草，不知是否已荒廢了？ |
返回住宿放低支酒泊車後，四圍去行吓，又擅入馬路旁嘅其他葡萄園。總之這裡方園百里乜都無，只有樹枝光禿禿嘅葡萄園... 雖然乜都無，但風景優美，我反而喜歡這種避世感覺！
住宿接待完我們第一批客人後，現在已泊了多部車，嘩！遲D到埗咪未必有得住？老闆娘應多謝我地，這山卡啦住宿比我地幾個蛋散帶旺了，哈哈~ （港女按：可能老闆娘心諗大把客，唔明點解會應承計平俾我地。）
上網查google map 這地方位於Saint-Paul-de-Fenouillet小鎮嘅近郊。由於法國有好多地方都叫Fenouillet，所以都係寫清楚好。
![]() |
| 回來後住宿竟然已多了很多客人 |
![]() |
| 季節唔合時，薰依草只能在花圃中看到，運用吓攝影技巧影到好似好多先~ |
用餐前先開支酒飲，望住葡萄園飲佢出產既酒。不論好飲與否，都別有一番風味！
除了支白酒飲得特別有Feel外，晚餐更加不得了！飲食嘅野當然又係由港女形容啦：先有沙律吧任食，都係菜、cold cut、湯、麵包、類似鵝肝凍嘅物體，主菜只有兔肉加薯仔。食食吓有不同質感同味道芝士上桌，以為已是甜品，有一款好似臭腳嘅味道，係我地唔識欣賞吧。濃味嗰幾舊食唔晒，保持返整整齊齊俾侍應收返。原來仲未食完，雪糕才是真正嘅甜品，最後仲有兩大盒茶包任君選擇，嘆嘆茶來完結。呢餐真係夠晒浮華，團友們食到心花怒放！
再一晚飲飽食醉，又係時候瞓一覺好。
![]() |
| 主菜 |
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
