探險家攻略 > 休閒玩樂 / 城中探秘 / 旅遊 > 郊遊 / 特色景點 / 古蹟 / 1天短線 > 從城東到城西。尋找維多利亞城界石

從城東到城西。尋找維多利亞城界石

由平凡人於 2015-08-31 22:55:00 發表 | 累積瀏覽 819

分類：1天短線特色景點古蹟郊遊；地區：銅鑼灣,半山,跑馬地,其他

攻略日期：2015-08-29

二零一五年八月二十九日

百多年前香港有個地方稱叫做維多利亞城，維多利亞城之中分為四環，即係西環﹑上環﹑中環同下環（而家灣仔及銅鑼灣一帶），而四環之中又再細分為九約，所以當年維多利亞城又叫做「四環九約」；而家我地可能冇咩機會用到維多利亞城呢個名，又可能直頭聽都未聽過，不過維多利亞城確實存在係香港，呢個名一直都冇取消依然生效，只係時代變遷漸漸被人遺忘...從維多利亞城界石之中隱約可以見到當年維多利亞城位置，我見得閒就起程去拜訪一下聳立香港超過一百年既維多利亞城界石

維多利亞城界石分佈係跑馬地至堅尼地城之間唔同地方，原本有七塊界石被發現，但有一塊係2007年突然不知所蹤，現存只有六塊；好多界石都位於山上，想去齊六塊界石就要小小力氣上山，而且路程有十幾公里，一定要準備足夠糧水，不過沿路大部份地方都好易行唔洗擔心

六塊界石由東至西分佈係以下地方：
1.黃泥涌道聖保祿天主教小學對面
2.寶雲道離司徒拔道交匯處約半公里
3.舊山頂道與地利根德里交界處附近
4.克頓道距旭龢道400米左右附近
5.薄扶林道行人道近48907號電燈柱
6.西寧街以北的堅尼地城臨時遊樂場內

就咁睇我都唔知係邊，網上已經有好心人整好界石地圖，我就係跟住下面呢個地圖搵路
https://www.google.com/maps/d/viewer?msa=0&mid=zRvlLMkl0QNo.ki3viCw4UG0k

今次我選擇由城東走去城西，就由銅鑼灣時代廣場起步，出發尋找界石


由時代廣場向跑馬地方向行，幾分鐘就到黃泥涌道，第一塊界石就係前面



旁邊係跑馬地馬埸



係黃泥涌道行幾分鐘就到第一塊界石


就係你啦！界石上寫有CITY BOUNDARY 1903

不過比人圍住感覺有小小可憐



拜訪過第一塊界石後繼續沿黃泥涌道向前行


又見到馬埸靚景



去到跑馬地電車總站前轉左入去成和道

第一次黎到跑馬地入面，原來好旺好多舊樓，就好似深水步一樣

襯仲有鋪頭，買枝雪糕食先

成和道尾段開始要上山啦

舊式T字型路牌，而家好少見架



轉右去蟠龍道會見到有樓梯上山

向配水庫行就岩架啦；呢段路google map冇教，好彩又比我估中行得到，比起行大路慳時間，哈哈



上完一段樓梯仲有第二段，好彩只係好短



轉右行就可以見到綠油油既配水庫



見配水庫條馬路封左以為冇得行，穿過配水庫原來有條小路上去寶雲道，行呢道快好多

上到去向右行可以見到5條路交匯處，其中一條就係要去既寶雲道

呢段寶雲道係比人行唔比車行（只見一部工程車經過），吸引到好多人散步跑步



山下係跑馬地

山上突然出現好多雲，好似就快落雨


寶雲道1888年已經落成，當年係馬路之下敷有水管，將食水由香港島東南部大潭水塘引到中環，稱為寶雲渠或寶雲輸水道，所以由東向西行寶雲道係微微向下斜，行得特別舒服；寶雲道係當年香港繼皇后大道同堅尼地道之後興建既第三條主要道路，所以當時亦都叫做「三馬路」

好快就見到第二塊界石啦

界石下方有個小小既牌介紹，不過咁細應該大部份人行過都唔會留意，都叫好過冇啦

我諗寶雲道就係維多利亞城最南邊



離開界石後繼續沿寶雲道西行，向第三塊界石前進，今次距離比前兩塊遠好多



望晒成個馬場

行行下竟然見到姻緣石！我都係而家先知姻緣石係呢道咋！

既然咁岩黎到就上去睇睇先，行上去好快，兩三分鐘就到



首先見到公婆石，有人參拜中



向上行多少少就係姻緣石啦！據說姻緣石非常靈，成功為好多情侶締結美滿良緣，而且又求子得子，好神奇！

突然超級大雨


上到姻緣石時突然落大雨，附近又行雷，係道企一企就落返去lu，難得黎到都唔記得拜一拜tim，哈哈

沿寶雲道向前行多一陣有個小公園，可以避避雨



雨落左唔夠半個鐘就停，可以繼續前進，路過「灣坊亭」；灣坊亭係1991由晨運客集資興建，前身係1961年建成既寶雲亭



到左灣仔啦

去到寶雲徑交界處都有個公園，呢道既寶雲道開始有車行啦

經過波老道後，寶雲道已經係一條正式好多車行既馬路，要上返行人路行lu

好多住宅



行晒全條寶雲道去到馬己仙峽道，見到山頂纜車經過


路軌勁斜

左轉入蒲魯賢徑行，而家要正式開始上山，由呢道到山頂係全個行程最辛苦既一段路



由右邊既小路上去梅道



沿梅道向前行小小見到有舊山頂道既路牌，跟住佢靠左行

舊山頂道又係超斜，以前啲車都唔知點可以上到咁高，就算而家坐車經過呢啲路都驚驚地



越上越高

右面就係舊山頂道既行人專用部份，目標在望

由舊山頂道直上就可以去到山頂，需時30分鐘

係指示牌行多30秒終於見到第三塊界石，位於舊山頂道既界石


界石下半身埋左係山入面！每塊界石大約一米高，不過呢舊唔見左成半睇落好似矮左...

離開界石就要上山，又係斜路又係斜路又係斜路！！！

被斬既樹從生，生命力好強

繼續升高



終於去到白加道纜車站，山頂在望



係呢道可以見到纜車經過



纜車就係靠呢條咁粗既鋼纜拉住

由白加道站向外望



仲差小小就到山頂，繼續努力上山


見到獅子亭啦

成功到達凌霄閣

一場黎到山頂，做遊客去獅子亭睇睇風景先



雨後視野都幾清丫

如果想由第三行去第四塊界石，可以唔上山頂由山下行去都得，行下面應該冇咁辛苦，不過見未行過去山頂，而且又想搵個地方坐低食食野，所以就行左上黎啦，係呢道舒舒服服食個下午茶

都叫做睇住維多利亞港風景食丫，哈哈


就算天氣唔係太好山頂都係好多遊客



有啲霧氣飄過


原本想行盧吉道睇風景，不過見時間唔早所以就行路程短啲既夏力道



夏力道係一條平坦易行既路



瀑布？

望到南丫島同數碼港



好多霧

街燈好特別

有個西式公園bor

靠左沿夏力道繼續行

行前少少就要靠右行入克頓道



由克頓道開始要落山啦，唔好以為落山輕鬆啲，有時落山既路好斜，行起黎可能比起上山更要用腳力

呢道有松林廢堡又有炮台，行呢條小路就可以去到，我行呢條路落去唔夠一分鐘覺得驚驚地，四周圍就得自己一個人又天陰陰，所以唔敢再向前行行返轉頭，都係等有朋友一齊先去...

出返大路行

今日上大帽山應該可以睇到雲海，啲雲比大帽山山頂更低

見到其中一啲廢堡

靠右沿克頓道向旭龢道方向行，就快到啦



見到九龍西面景色

見到你啦


第四塊界石就隱藏係克頓道



呢道好多行山人士經過，不過舊石又係係山邊，我諗大家都係當佢透明架啦，就算見到都未必知呢塊係有百幾年歷史既歷史古蹟

要同你講再見啦

行返轉頭上山，去返頭先有個路牌既交畀位

今次向蒲飛路方向行，由蒲飛路個邊落山



唔通呢道有寶藏掘？

呢道又去邊既呢？

行完馬路要行樓梯繼續落山，呢段算易行



繼續沿樓梯向蒲飛路落山



最後有一段超直既樓梯，下面就係馬路啦；呢條樓梯好多蚊飛來飛去，唔停咁行都比佢地咬左3下...

行到落黎，好野^^如果調轉要我行上去一定行到腳軟


山腳呢個位係蒲飛路巴士總站，不過仲未可以坐車走住，仲有兩塊界石未去

沿薄扶林道向上行，界石就係前小小既位置；今日行過咁多斜路後，薄扶林道呢道少少斜已經唔當係咩，行得好輕鬆，哈哈

薄扶林道界石隱藏係個凹位，行快小小可能見唔到


第五塊界石我黎到啦，等左我百幾年，哈哈



唔知界石旁邊呢舊又係咩石呢？

可惜日日夜夜陪住界石既係一個垃圾筒...係香港做歷史古蹟係慘小小架啦，由其係冇咁出名既古蹟，而家佢仲係道都算好彩，佢既一個朋友失左蹤都唔知去左邊...

離開薄扶林道界石，沿薄扶林道行返落去，向第六塊界石出發

去返巴士總站過隧道，沿蒲飛道落山

再右轉入蒲飛徑落樓梯



行左半日終於返到市區，黎到堅尼地城



暫時未可以坐地鐵走住，要向前行去搵最後一塊界石

由卑路乍街轉左向堅尼地城尾行

去到域多利道都係一直向前行



見到西寧街轉右繼續行，就快到目的地啦



第六塊界石就係球場入面

界石企係球場一個角落，唔細心睇都唔知佢就係界石

好似鐵窗邊緣咁...

六塊維多利亞城界石終於全部探訪晒，襯天仲未黑去海邊吹吹風休息一下


National Geographic Channel都有介紹既昂船洲大橋

如果天氣好呢道係一個睇日落既好地方

界石就睇晒啦，難得去到堅尼地城，仲有一個地方想去；行樓梯上返去域多利道

轉右再向西行

就係呢道啦，好出名既西環泳棚


要行一段樓梯落去

呢道就係遊水既泳棚


試試曝光一秒但有手震，影唔到靚海浪

外面有好多大船經過，有時候超大浪



唔係游水高手都唔可以係啲咁大浪既地方游水，我就唔敢試啦，只係企係上面都比浪打濕晒條褲



係另一個角度影多幾張先

睇完泳棚今日既行程都差唔多，行返去堅尼地城站搭地鐵返屋企；今日由城東走到城西，穿越當年香港首府維多利亞城，雖然今日已經無咩人認識維多利亞城，但我覺得香港既歷史唔應該隨便被人遺忘，可能有人會認為古蹟﹑界石等只係一舊舊冷冰冰既石頭，但內裡蘊含既意義係無價之寶，更唔可以用錢衡量，縱使幾有錢都冇可能創造出一件「古蹟」，更冇可能創造出當中意義

鐘意SeeWide的分享，給我們一個Like吧！

檢舉

攻略日期：2015-08-29

攻略地點：銅鑼灣,半山,跑馬地,其他
攻略時間：N/A

是次消費：N/A

共3人比"掂"

stellaluk 於2015-09-01 07:13:22 留言
我要俾100你！
舉報回覆
No.1

EEChan 於2015-09-01 20:25:28 留言
你都幾好腳骨力,其實山頂那塊我有睇過有冇順便拜下姻緣石.
舉報回覆
No.2

平凡人於2015-09-15 00:44:13 留言
原文由 stellaluk 於 2015-09-01 07:13:22 發表
我要俾100你！

多謝
舉報回覆
No.3

平凡人於2015-09-15 00:45:45 留言
原文由 EEChan 於 2015-09-01 20:25:28 發表
你都幾好腳骨力,其實山頂那塊我有睇過有冇順便拜下姻緣石.

呢條路算易行，唔會好辛苦不過因為落大雨唔道得拜拜姻緣石，哈哈
舉報回覆
No.4

mrsakwok 於2015-10-23 12:59:43 留言
你唔講我真係唔知，枉我在灣仔長大，竟無聽過下環的名稱！謝謝分享啊！
p.s.你真係好腳骨力！勁！
舉報回覆
No.5

平凡人於2015-10-25 22:07:23 留言
原文由 mrsakwok 於 2015-10-23 12:59:43 發表
你唔講我真係唔知，枉我在灣仔長大，竟無聽過下環的名稱！謝謝分享啊！
p.s.你真係好腳骨力！勁！

唔聽過都唔出奇，呢個名已經好耐冇用啦，要係歷史書上面先可以揾到
舉報回覆
No.6