2014年1月26日。細細4歲喇﹗﹗
咁就4年。時間過得真係快~
好似無做過D咩。但其實除左湊仔之外。
我諗返原來做左好多野。忙既時間係過得好快~
2011/12。出左2本書。2013攪左CurryBee。年尾褶埋。haha~
朋友仔成日叫我揾D野攪。我又無咩野心。
有機會做咪做。無咪抖下煲下劇。日子一樣係咁過~
我成日覺得一個人食幾多著幾多係整定。無得強求。
機會黎到就把握。做左對得住自己 ^^
有個相識廿年老友做開首飾。今次返香港同佢傾開。
佢見我師奶仔無咩攪。話不如我design d款。賣到既就比返設計費我。
依~~~ 又OK 喎﹗我最鐘意design。加上唔係自己生意無壓力。
有錢袋當零用。無咪當幫朋友囉。自己又開心~
不過我未接觸過首飾Design。上網諗住睇下有無Jewelry Design class。
做唔做都好。學多樣野無壞既~
(有無人有呢方面既資料可以指點下? 又或者有無人做緊Jewelry Design呀?)
hahaha~ 一諗起呢度我就好開心喇﹗
需知一個師奶無野做係好無自身價值
(我講我咋﹗其實師奶係世上最偉大既職業﹗)
唔係錢既問題。係我個人喜好。想有D細藝嘛~
唉呀~ 愈講愈離題~~
不過其實唔係呀。你地諗下。佢地出世咁多年。
都係你地陪住我過。有咩大事發生都有你地分享。
所以我都想將我近況發表一下既 ^^
好喇﹗講返琴日。細細生日~
由於我仲未好返晒。呔細都有幾聲咳。
細細既生日會有順延到8﹐9號。等大家都康復先﹗
琴朝一起身。呔仔就哄個豬頭埋黎同我講 :
"媽咪呀。細佬今日Birthday呀﹗我地無買蛋糕咁點呀??"
呢個大哥真係好上心。會記住細佬既事~
我話生日會先cut cake啦~ 今日去公園玩下~
細細一起身就問。今日係咪會好多人黎送禮物架? Heehee
似乎佢已經知道生日係一件咩事 ^^
我同佢講。你生日朋友會送禮物慶祝你又大一歲。
但其實4年前既今日。媽咪響醫院好辛苦生你出黎架~
佢聽完好明白。然後我發現佢響食lunch既時候。
畫左幅畫送比我~ 佢好型架﹗唔出聲遞埋黎﹗
(hahaha 係咪我陀住佢睇得多天若有情呢下??)
所以我知道其實佢對我教過講過既野好上心既。大LUM ^^
影呢張相時。呔仔主動拖細細隻手埋自己度。。
好耐無黎呢間了 ^^
今日約埋嫲嫲同孫玩 ^^
唔知係咪知道自己生日。今日笑得好神氣~
weak7好鐘意趁我食緊野時叫我影相。。
YUM﹗﹗
呔仔好鐘意食青瓜。平時可以自啪一大碌﹗
食手卷都要釣左條青瓜出黎先﹗haha~
細細畫緊呢幅畫。原來送比我 ^^
呔仔同爸爸合作既畫。知道呔仔畫左咩嗎?haha~
呔仔正示範"車變車"比嫲嫲睇 ^^
2個風褸小子 ^^
去公園。呔仔堅持戴頭盔﹗
唔通連佢都要威?? XDDD
為方便佢2個扮消防。警察有得over over。。
爸爸自製walkie talkie ^^
呔細勁鐘意﹗﹗
沖廁所 XD
點呀? 同事有無call你呀? XD
我地小時候既玩意。同"紙杯傳聲"一樣道理 ^^
玩左一陣都開始日落。。
^^
佢2個攪咩呢??
原來見到小松鼠。想餵佢~~
結果我地返車攞左D餅乾。小松鼠食得好滋味 ^^
今晚老公煮飯。返屋企前買左個fruit tart。飯後比細細吹蜡烛 ^^
好攪笑呀﹗呔仔捉住"小朋獅"比佢吹~
小朋獅真係一額汗 @@ 大佬呀﹗人地就黎燒著喇﹗XD
小朋獅心諗。多謝細細相救。
響千鈞一髮之際。吹熄左個火~ XD
2隻野好攪笑架而家。咩都笑餐矇~~
哥哥幫手mun蜡烛。D蜡滴晒落fruit tart。細細又笑一餐~
細 : 趁哥哥影相。快D桔左舊桃先得﹗﹗
呔 : 想出古惑?? 我㩒實先﹗
呔 : 習習習…..好味好味﹗﹗
細 : 今日我生日喎Kai仔……
呔 : 唔~ 真係好食﹗
細 : -___-" 我好想食…(流口水ing)
好啦。唯有食返舊士多啤梨算數啦﹗
記得早排呔仔5歲生日時。
我講左D連我自己都好感動既說話~
其實對細細。我一樣係咁錫佢咁愛護佢~
佢同哥哥唔同。佢永遠會比最強既一面其他人睇。
"有型﹗"係佢性格 hahaha
(所以佢成日話自己唔怕食熱野。唔怕打針。唔怕…..)
唯有響我面前。先會表露佢最軟弱既一面。
我相信我係佢心目中都一樣係兜住佢果個 ^^
希望佢地慢慢長大。性格會溝均D。
呔仔大膽D。細細勇得黎多D危機感。haha~
另外都想多謝你地成班卜友陪住佢2個長大。
你地….似乎係要睇住佢地拍拖。畢業。結婚。生仔……
哈哈~ 唔通有日佢地結婚。會擺返幾圍係卜友既??
(咁可能幾廿圍先得喎﹗有無人住圍村。不如包條村食盆菜 XD)
到時我都5張幾野了。如果真係睇足廿幾年。
呢件事就真係不可思異喇﹗ (我諗起個情景都眼濕濕 T.T)
============================================
感謝 天使媽媽 提供以上資料
天使媽媽的網誌: http://prochats.she.com/angelmamafamily
============================================
