攻略日期：2015-09-06
朋友C:「星期日(6/9)一家去玩香港街馬嘉年華吖?」, 我答:「吓!我哋係商場人...跑街馬? 唔係講笑呀?」朋友C:「係玩嘉年華遊戲, 唔駛跑㗎!」(咁又去得過喎!)
阿太問:「嘉年華係邊㗎? (荔園嗰度囉), 吓!玩咩都要錢㗎喎...同埋, 唔係執咗喇咩?」, 其實我也不知道. 不過有免費入場卷, 走去看一看吧!
其實, 30度高溫, 由金鐘地鐵站, 途經天馬公園, 再轉入荔園...老實說, 已經有點頭暈暈. 囝:「影完未呀? 一陣玩遊戲有冇冷氣㗎?」(我都好想有...)
本來一心想帶SY來玩滑水梯, 可惜大會規定1.3米以上才可以玩, 我對囝說:「咁你睇爸爸玩...出年你先玩啦」, 囝:「出年我都唔敢玩呀! 高到嚇死人嘅」(吓? 得7米...好矮咋喎)
