(Day 8) 2015-04-08
住宿 : 民宿Kevin Toulouse
行程 : 巴塞隆拿
一落樓就有幾間餐廳，揀咗其中一間食早餐。原來由中國人經營，港女同人講西班牙文，高Ling就同人講英文，我則同人講唔鹹唔淡嘅國語... 最後都係講普通話，中國人去異地唔係做中餐，而係做當地餐。
諗住今朝參觀聖家堂，點知賣飛條隊看不見龍尾，職員話排得嚟都未必買到，或者得返好晏嘅飛，提議我地上網買。於是係對面老麥黐wifi上網，買定聽日既入場券，有好多個時段選擇，連上一個tower每人€19.5。
之後搭地鐵去Liceu站，前往位於Las Ramblas嘅Sant Josep市場，可能經過尋日感覺無比想像中危險。各人也開始鬆懈下來，高Ling單邊孭住部單反相機，被地鐵職員提醒，話小心攜帶方法，治安可想而知⋯
市場除咗有新鮮食物俾人買走烹調外，亦有好多即食檔，行左好耐好多野睇。市場乾淨企理井井有條，於歐洲逛市場也是一種享受，亦都係醫肚好去處。市場內有好多西班牙火腿商店，於是買了一小包火腿€2，鮮榨飲果汁€1杯，行到賣海鮮位置食了兩隻即開生蠔，每隻€2.5。
![]() |
| 有繁體字介紹 |
![]() |
| 盛惠€2.5一隻 |
行完市場於門口會合團友們，決定大家自由活動，團友要繼續血拼行街，但都再次提點要小心為上。我與港女食午餐，諗起剛才市場內有好幾間即叫即整嘅海鮮店，當然去試吓啦！海鮮唔記得幾錢，但價錢合理，食完再買兩盒生果€3。喺呢個市場見到好多港人，應該係成個行程之最。
@0200
用餐後我同港女就返住宿放低剛才喺市場買嘅手信、生果。午睡片刻後，出發去魯營球場睇波。
搭地鐵前往Collblanc車站，車站內已有大量指示牌，小朋友都識去啦！我地早咗到，所以喺地鐵站附近行咗陣。由於我近來去旅行都特登帶D舊衣物去著完扔掉，然後再買過新，有新衫著之餘也可當作給自己的手信，亦不會對行李帶來負擔，所以喺Zara買咗件線衫。
去到坐九萬多人嘅魯營球場，今日對手阿美尼亞是弱旅，我當然唔怕無波飛賣啦，但門口又無人兜售門票，最後都係幫襯到售票處買票。角球旗位置每人€79，並於門口街邊檔買頸巾，港女買咗頂帽，共€30，只是平過專門店小小咋...
![]() |
| 跟我之前去過嘅地方一樣，當地人買野好興泊"狗"。喺香港又比人話虐畜，然後被人放上網聲討⋯ |
![]() |
| 港女嘅帽，然後回港送比姪女 |
氣氛一般，似香港南華球賽，九萬球迷只得龍門後幾百人全程載歌載舞打氣，跟英超氣氛差九條街，可能遊客多過球迷，亦有可能戲碼差呱，相信對皇馬嘅國家打吡先會熱烈啲。
沙維、美斯、蘇亞雷斯等球星壓陣當然能輕勝對手，賽果4:0！看見蘇亞雷斯現在身穿巴塞球衣亦有一點心酸，因為我是利物浦fans嘛，而且於幾年前利物浦主場亦曾經看過佢嘅英姿⋯ 我坐嘅角球旗位置，全程主隊只得一次開角球，而入球慶祝及開角球全是另外幾面... 今次最大收穫都係見到沙維喺我呢邊開角球。由於我不是巴塞的忠實粉絲，而且愈坐愈凍，為免唔同人迫所以於80多分鐘趁早離開，以免全場九萬多人一齊散場，迫唔到上地鐵，其實最後都好多人要夾硬迫入車箱。
![]() |
| 只呢一小撮人⋯ |
返到住宿附近已經好攰，唔想周圍搵嘢食，於是試吓間成日路過的日本餐廳。呢間餐廳以放題作招徠，入去才知原來又是中國人經營，有日本刺身（只有三文魚同吞拿魚）、壽司、也有中國點心，其中蝦餃唔錯！看見另一枱兩名西人，只點了少少食物，純粹來送啤酒吹水，如果以我們香港人作風實食到佢盡啦！食了好幾轉刺身，但已比較檢點了。店內有幾個年輕嘅華裔店員，佢地話跟父母離開中國過嚟生活，讀完中學之後，覺得再讀上去都唔一定搵到好工作，所以早啲出嚟做嘢仲實際。佢地識普通話、西班牙文同加泰隆尼亞文，做旅遊業一定無問題啦。
發現聖家堂這一帶的店舖基本上九成是外來人開，紀念品、雜貨店由南亞裔人士包辦，而餐館、成衣店則由中國人經營等，跟其歐洲其他大城市差不多。
@2245
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
