呢個暑假最貴既節目之一迪士尼樂園呀
當然要拜訪一下Frozen Village啦!
講出嚟大家都唔信, 今次亦係我哋全家第一次去迪士尼咋!
相信都冇咩人未去過香港個迪士尼
徧徧我到依家先第一次去
亦都係Hysan同芊芊第一次去
Hysan期待咗好耐
每一次搭東涌線佢都會話好想去
話佢好多同學仔都已經去過同成日去
所以今日俾咗個驚喜佢
我哋西鐵出發去到東涌線
我同Hysan講話我哋今日去海洋公園
直到欣澳站轉車上迪士尼列車
Hysan開始終於知道我哋今日係去迪士尼
即刻見到佢由心裡笑咗出嚟
唔駛多講啦
整架列車當然係以米老鼠造主題
拉環, 窗口, 座位....周圍都係三個圈!
人人都可能帶小朋友去過迪士尼幾次
又會買好多玩具精品俾佢哋(我就連Bubble槍都唔肯買, 希望佢哋用吹的)
但在我嚟講一切都並非必然
甚至喺迪士尼度我都冇買任何一樣嘢俾佢哋
我希望佢哋都可以學懂珍惜
(可能大家未必認同 ^>^)
我哋今日就好似大鄉里出城
當大家都鬥快入場排隊
我哋仲慢慢喺附近周圍影吓相
出咗港鐵之後就已經見到迪士尼個大招牌
今日本來天文台話會落雨
點知又唔準熱到飛起!
沿路一直行見到大噴水池
然後轉右就見到售票處同樂園入口
一入到場就見到好多叫你買嘢既地方
真係未入去就先洗錢
起初以為平日會比較少人
可能因為暑假闗係所以今日都好多人
我哋9:20嚟到排隊
我哋今次因為有朋友讓到2張成人飛俾我哋
所以補買多張小童飛(芊芊未夠3歲唔駛錢)
喺入口既左手邊有訽間處, ATM同埋洗手間
我哋排咗一陣到930就開始入場喇
所有人都要俾個Hand Carry職員檢查
因為唔可以帶任何食物入場(水係可以既)
當然芊芊個飯仔可以啦!
檢查完就俾飛職員姐姐入場
穿過閘口就見到個好靚靚既火車站(後來先知Hahaha...)
原來我哋遮住咗成個米奇頭花圃
火車站既兩邊橋底有個圓拱型隧道
穿過就見到美國小鎮大街
見到第一條人龍就係同Micky Minnie影相
但係我哋要先去Frozen Village所以就Skip咗佢
我一支箭先去到Adventure Land
因為個 Frozen Village就喺裡面
唔記得講番其實手推BB車
職員都會俾番張泊車證俾你(就係呢張紙)
下面部份係要搣出嚟Keep住
當你泊完車要去拎番既時侯要出示呢下半部先得
當搭正10點Adventure Land開閘
大家就衝入去霸頭位啦!
大約行3-5分鐘就去到場館
樂園都好細心放咗好多把遮喺度唔駛大家曬親
當你去到Village入口
職員會問你想睇即場定係預約
當然我揀即場啦(就排左手邊既隊, 右邊就係拎飛預約之後既場次)
如果右邊預約場次既飛如果俾人拎哂
就即係話你個日都唔會有得入去架喇
跟住一直行會另一個職員問定你有幾多人計計人數
因為每一場Show既座位有限
沿住呢條轉嚟轉去既路走入去就係Village場館入口啦
行入去望番落去...真係好多人
好在我都行得幾快排得幾前
入到嚟大門一開涼浸浸既冷氣吹過嚟
即刻成個人醒哂!!!
一條直路周圍佈置到好似Frozen城堡個場景咁
好啦, 行到嚟影院入口既前面
大家又要無所事事咁等
因為即場時間係10:30(當時只係10:10)
仲要等多20分鐘先可以入場
嘩! 如果睇即場又排得後入唔到嚟既人
咪要喺外面曬住排隊好慘
係呢度通道既右手邊有一個大雪地同埋冰梯
見到有職員開始預備喺度鏟雪
見到一個個職員都好細心檢查
慎防一陣有人瀡冰梯有意外
大D人企到好晏就咁坐喺地下度
加埋周圍附近都講普通話
突然好似變咗個國內人!
好啦好啦! 10:30啦
雖然好似好嘥時間咁
明明9:30入場, 但係依家先至開始第一個節目
不過俾Hysan同芊芊見到Elsa同Anna都值得既
我因為排得前所以都坐到第一行
如果頭10個就可以坐到正中個排tim
個舞台都設計得好靚
隔咗一陣兩個中國籍男女走咗出嚟做MC
幾乎九成時間佢哋都喺台上面(-.-)
跟住佢哋介紹Anna出嚟啦
佢講咗1-2分鐘之後唱咗幾句歌就入番後台(下巴都跌咗落嚟)
跟住嗰兩個MC就帶住大家唱Frozen裡面3首歌(不如再Hea D放埋套戲睇好過啦)
跟住靚仔Kristoff(基斯托夫)就出場喇
佢係後面唱住歌彈住結他行上台
之後就Anna 同 Elsa都出埋嚟
當然Elsa要唱首本名曲啦
Let it 榚!
加埋天花板噴出嚟既假雪效果
氹得全場小朋友超開心
最後以為有得同佢哋合照
但係佢哋只係企喺台上面俾大家影相
不過佢哋真係做得幾好
扮足Frozen裡面角色既神情舉止
影咗陣相佢哋就好快閃番入後台
大家停留多一陣就離開影院啦
大家其實如果唔係想影佢哋幾個
應該再早少少出去
因為出邊有得瀡冰梯
媽咪去咗排冰梯
我就同佢哋去排隊同Snowman影相
我哋係第一批入場所以唔係好多人
同埋因為佢係Snowman唔係Elsa...
大約有6-7個喺我前邊
影完之後大家都知
就係佢會俾張Photo Pass我哋
如果想要番張相就去俾錢買!
因為冰梯好多人排隊
所以我哋影完相之後仲有時間
就走入去呢個冰地玩
起初以為呢個冰地係要排隊入去玩
原來係就咁行入去就得
因為成個地方剩係Serve啱啱睇完Show既人
所以唔會好多人
其實你話佢係雪又唔算得
因為佢成個地下係冰
好似舊時雪櫃冰格咁
要刮刮刮先會刮到D雪出嚟
大家玩嗰陣都要小心
因為普通波鞋行入去都幾跣架!
呢度模彷番Frozen裡面Elsa控制唔到魔法
攪到成個噴水池結冰嗰個場景!
終於到媽咪同Hysan玩瀡冰梯啦!
因為芊芊仲細所以唔俾玩!
終於離開咗Frozen Village喇!
個Drama半個鐘, 出番去影相玩雪瀡冰梯又玩咗差唔多半個鐘
出番嚟去吓廁所攪吓呢樣嗰樣都成11:40
跟住我哋就直接穿過灰熊山谷搵嘢食
我諗要到Hysan大個D先同佢玩
希望到時我仲有心力玩
嚟到尋金小鎮, 呢度都係一D精品店小食店之類冇咩特別
呢度有個小火山仔不過唔係噴火係噴水
唔好以為我用咗Wide鏡
呢間屋真係有少少孭孭哋
好大舊「金」呀!
呢個人真係要通緝呀
成日都激到我同媽咪紮紮跳!
行行吓見到有兩間屋
屋裡面有幾個Bump水槍!
Hysan梗係即刻入去玩啦
玩完一間再過另外一間屋裡面同妹妹一齊玩!
可能時間尚早
所以都仲未係好多人
呢個超大噴水火山好勁
如果唔行開真係會俾佢噴到濕哂!
呢度周圍都有好多西部牛仔味既建築
因為肚餓關係我哋都冇逐一入去望吓
呢度有個小食亭
都係賣吓熱狗
格仔餅 Pancake 雪榚咁啦
但係我哋要搵正餐食所以繼續向前行入咗去迷離山莊
座建築物好有俄羅斯特色
裡面既遊戲比較陰深恐怖(對佢哋兩個嚟講)
所以我冇帶佢哋入去玩只係經過而已
隨便在附近影影相就算!
行到嚟呢度終於見到有間餐廳
不過仲有幾分鐘先開門(12點)
所以我哋喺門口等咗一陣就入去舒舒服服咁食Lunch啦
呢度有南亞/ 日式/ 韓式/ 印度嘢食!
價錢嚟講都係 $108/ $128/ $138
再有D其他小食或兒童套餐咁
開開心心食完嘢我哋就繼續下晝既行程啦
因為第一次嚟當然希望玩得幾多得幾多啦
入到嚟Toy Story Land啦!!!
Slinky Dog Spin
Toy Soldier Parachute Drop
呢度有3個機動遊戲
最嚇人都算係呢個
RC Racer
精品店梗係唔少得
另外我最鍾意係呢個英文字母板
如果有齊咁多個字母
然後大家可以搵番代表自己的那字母影相就好lu
隔離有個塑膠馬騮玩具場景
起初覺得奇怪點解冇人入去影相又唔駛排隊!
後尾先發覺原來呢度係俾卡通人物同遊客影相既地方
條隊原來係隔離
因為卡通人物未出場所以大家要排定隊
好在唔多人(可能係因為個卡通人物係翠絲Jessie啦)
排咗3-4個度就到我哋啦
翠絲好大個頭好得意(唔知裡面嗰係男仔定女仔)
佢好溫柔先同 Hysan握手
然後用動作表示想同佢影張相
仲教佢攞咩 Pose 影!
影完相之後翠絲仲主動攬住Hysan
Hysan梗係好怕醜唔知點算好啦
跟住呢頭影完相就見到有幾個士兵人行出嚟
超興奮! 原來佢哋係出嚟同人玩吓影吓相咁
我都即刻捉住其中一個要同Hysan影番張相
我覺得佢哋都好辛苦, 因為天氣真係太熱!!!
坐喺度影相係會俾人鬧(已中招)
所以大家要坐低影就要留意吓身邊有冇職員!
因為佢哋兩個都仲細
所以得呢個遊戲係適合佢哋兩個玩
我哋排隊排咗十幾分鐘
都唔算太耐(可能呢段時間大家都食緊飯)
排吓排吓就嚟到我哋啦
去到預備區既時侯職員會排番一張Pass咭俾我哋
一張咭接受2個遊客坐一架
我哋坐咗喺第二架!
不過因為望向前係狗狗個頭望唔到風景
所以開車後其實都唔會太驚
最得意係當架車開動既時侯
彈弓狗會吠兩聲!
同類既機動遊戲喺海洋公園都有一個
不過海洋公園嗰個係超快
呢個唔算快(會越轉越快)
大概轉咗4個圈就停低到下一Round
硬係覺得唔應該有中文名「反斗奇兵大本營」
攪到成件事好山寨!!!
離開咗Toy Story Land 好快就嚟到Fantasy Land
呢度有好多機動遊戲同埋場館
但係一見到咁多人真係驚驚
見到小飛象既人龍我保守估計要排2個鐘...
幻想曲我哋都暫時唔睇住
希望下次有機會嚟先再睇
因為真係唔想浪費哂D時間喺排隊度
所以突然改變行程我哋走咗去對面火車站搭火車
呢架火車只係停2個站
仲有一個站係停喺美國小鎮大街
亦即係一開始介紹講過入口前面的那個火車站
呢架火車既座位並唔唔係對住火車頭方向坐
而係打側坐
所以只有得一邊窗口望到風景
沿途都冇咩特別嘢睇
去到呢度突然見到好多隻三眼仔
佢哋發出Woowoowoo聲升高升低超攪笑!
有D拎住部相機影番我哋
攪到好似係佢哋發現我哋咁...反客為主
好啦終於到站
全程大約3分鐘度!
跟住我哋拎住張場刊睇吓呢度有咩做
見到我同老婆好鍾意既Inside Out
我哋完全唔知裡面係做咩
不過照排隊...人龍唔係好長得6-7個度
佢每次放一組人入去
每隔3-5分鐘度會再放另一組入去
大門一打開就見到Inside Out裡面既場景
好多記憶球呀! 所有記憶球都係燈, 會發出唔同既顏色
轉個彎發現戲裡面既5個島!
原來呢度係玩影相App!
職員用iPad預設的App幫人影相
將遊客個樣KEY落去Inside Out既不同角色裡面
首先職員會問你想要男仔定女仔(因為個App將Inside Out的角色都設有男或女選擇)
跟住就揀自己最鍾意個角色
估唔到Hysan係鍾意呀愁
唔通佢真實內心真係一個呀愁?
老婆咁既樣梗係做....
望上去見到記憶球既路軌
其實你可以選擇玩定唔玩
因為都要$40一張
如果選擇唔玩個App
就直接去出口搵呀樂影番張相就走得!
真係有呢個Panel喺度
點解唔見最新嗰個有青春期既掣既?
(我諗要等下一集先會見到)
可能套戲未係好知個巿場反應
所以個館唔算話好大
然後我拎住頭先玩App個幾張飛去隔離個Photo Store度買番D相
呢4張唔係Photo Express所以要去另一個Counter度買
係你決定印相之前佢會用iPad俾你睇番KEY後圖係點
如果KEY得唔滿意可以要求職員現場幫你再影過
我哋真係四個都唔同脾性！都唔明點住埋同一間屋
出番嚟嗰陣見到乒兵真係好想買呀($258)
但係最後都忍手....冇買
然後我哋沿住美國小鎮大街行番去Fantasy Land
呢抽汽球唔買都可以問哥哥借嚟拎住影相架!
嚟到城堡前面梗係要影番張彈起相!
不過跳極都唔齊...
我哋先去Tomorrow Land之後先穿過去Fantasy Land
點知喺呢度停留咗好耐...哈哈
當媽咪去咗同芊芊換片既時侯
我就同Hysan喺附近影吓
然後離遠見到巴斯光年喺度同人影相
點知行到埋去咁啱佢要去休息喎
咁跟住我同Hysan跟住佢一齊行
希望可以同佢影到張相
點知巴斯自己主動拖住Hysan隻手一齊行...哈哈
跟住就睇住佢入去休息lu...
指定動作!!同巴斯影張相
呢個唔識郁唔驚佢會飛走!
喺嗰度我哋仲遇到一個識講嘢既垃圾筒
唔知係點樣控制佢呢
佢真係可以同小朋友互動俾到即時反應佢哋
我哋排排吓隊跟住Hysan話要疴尿喎...
心諗如果疴完番嚟跟住入番條隊咪好煩
點知職員姐姐好好俾咗張「出入通行證」我
可以一陣去完洗手間之後就拎住張證入去
於是媽咪就同芊芊排住隊先
起初我以為拎住張證去番條隊度
原來佢可以俾我直入去到閘口
當然我哋都係要等到媽咪排隊行到過嚟先
但係起碼我哋可以入嚟嘆冷氣(辛苦咗媽咪)
終於見到媽咪抱住芊芊行到嚟閘口啦
下次大家都可以拎張通行證入嚟嘆住冷氣先
不過就好點都要犠牲一個人喺出面排隊囉
入到場見到呢隻巴斯光年媽咪話好似真既咁
佢講既真係話似有個真人喺裡面扮緊
定係佢好似真既假巴斯光年呢？哈哈
再行入去就見到好多激光飛船啦
我哋坐喺其中一架飛船開始我哋嘅旅程啦
入面好靚好多夜光裝置
相信好多人都會覺得呢個係最好玩既景點之一
眼見到好多個正方形既標誌
如果激光槍射中的話就會有分數
嚟到最後既場景巴斯光年大戰索克天王
點知嚟到呢度就大塞車停咗好耐
咁唯有喺度影番多d相！
玩完之後本想喺度食番少少嘢
但係又唔係真係好肚餓
所以我哋經過望一望去個洗手間
然後在外面買個熱狗食就算了
買餐的地方上面掛住咗隻超級大飛船
真係好靚，唔係求求其其！
呢隻熱狗都成$45㗎！又唔算太真材實料
之後見到有玩水地方
Hysan好想玩但又唔想整濕哂個身
於是我叫佢放心去玩啦因為我哋都預備咗多一套衫俾佢
當時芊芊已經太攰瞓著咗lu
佢之後仲同其他現場嘅小朋友玩起上嚟
超級開心！
但係即刻唔開心嘅事就發生喇
有個職員哥哥走過嚟同我哋講
小朋友要著鞋先俾玩
我心諗點著住鞋呀，咪濕哂！
佢話都冇辦法，規矩定咗係咁！
因為我哋唔會預備多一對鞋俾佢，所以只好叫Hysan唔好玩
其實可以喺隔離買對拖鞋俾佢
但係我哋真係比較慳家
覺得唔應該為咗咁樣而去嘥錢買對$120嘅拖鞋俾佢
之後佢好唔開心仲發我脾氣
所以俾我鬧咗一餐
可能俾著其他人見個小朋友玩得咁開心(我知我身邊好多朋友都會咁做)
就會照買對拖鞋俾佢繼續玩
但係我覺得依家大家真係物質太豐富想要乜就有乜
況且我覺得俾佢感到有失望嘅時侯都係一個好好既經歷
雖然有點不愉快
但係唔緊要，開心嘅時侯又到啦
我去咗排隊玩太空飛碟
差唔多到嘅時侯我先打電話俾媽咪叫佢哋過嚟
不過都只係排咗一陣間
差唔多10-15分鐘就到啦！
當然Hysan負責控制飛船啦
只係有支控制竿向上向下
不過Hysan一向完上又向下真係勁離心
我仲要拎住部單反影相
真係嚇到我有d驚，驚係驚部單反飛咗出落街
芊芊話佢自己唔驚喎！
見個天色咁靚再影多張相先
玩完之後附近見到有班人喺度利用簡單嘅鐵/膠筒打鼓
好勁好勁呀！
然後行番轉頭又見到巴斯出番嚟同人影相
我哋見冇咩人排隊即刻走埋去同佢影番張全家幅
之後我哋就行過去Fantasy Land
先嚟到小小世界
由於我哋都係第一次嚟，所以見到嘢就入去玩
仲要唔駛排隊梗係即刻入咗去先啦
一入去當然第一件事最開心就係有冷氣
之後一路直行入去暢通無阻
好快就嚟到最低下排隊上船
其實迪士尼呢度嚟嚟去去唔係坐喺度轉轉轉升上升下，
就係睇表演，再三就係好似呢d咁坐喺度跟住條Path一路欣賞
船迎面嚟緊啦，好快就有得上船啦！
由於之前都係坐喺架車度
今次有水覺得特別新鮮！
架船一開動見到周圍嘅嘢都好靚
原來一路播住「世界真細小」首歌(唔係李克勤同容祖兒嗰首囉)
然後途經好多個不同國家既景色
每去到一個國家就會同時播番當地語言既「世界真細小」
咁多國家最有七月十四Feel都算係中國
終於到香港啦！
點解香港個場景冇人既？
我諗香港人冇咩特色
芊芊一路都好好奇咁望住周圍唔同國家既景物
其實我都好開心，因為我都真係好鍾意小小世界呢個景點
唔單止好靚好有心思而且仲好有意義tim！
最後用多種語言文字同大家講拜拜
轉眼出番嚟都差唔多6:00！
我哋去拎番BB車就再行落去睇吓有咩玩
之後我同媽咪就分開排隊
媽咪同芊芊就去坐小飛象
我同哥哥就去搵米奇
好攪笑架米奇雖然同米妮係唔同地方同大家影相
但係每次佢哋休息前後都係等埋對方先行
本來以為唔駛排好耐點知都排咗半個鐘先可以同佢影到幅相
好似有少少唔值.....下次Daddy扮隻山寨版算喇
影完相趕得切番嚟同媽咪芊芊影相
佢哋啱啱準備起飛啦
其實同太空飛船一模一樣
咁點解又朝到晚都咁多人排架
旋轉木馬我哋就冇玩啦
一來海洋公園都玩過
二來你睇吓....有圖有真相！
夜晚既迪士尼好靚呀
我哋趕番出去城堡前睇巡遊
嘩俾準時7:45遲咗少少
差唔多7:55先開始！第一架巡遊車就係仙子啦
應該係小飛俠身邊嗰隻玲玲(如果唔係話番我知)
之後到反斗車王
令我印象最深刻就係呢架超大既貨車
佢車身用咗好多燈膽由左至右上至下內至外造出好多不同效果
壓軸出場梗係呢位朋友啦
之後我哋就去食嘢啦
我哋過咗去Fantasy Land嗰邊一間餐廳
價錢都係一樣$108-$138，不過呢間真心覺得幾好食
拿拿林食完之後好快又到9:00
就係要去睇煙花啦
唔睇好似唔係好完滿咁！
Photo by CANON 5D Mark III, Len | EF 35mm f/1.4L USM
呀劍評語: 迪士尼喎！唔俾滿分10分想死咩！唔駛講啦，大家仲熟過我
迪士尼樂園 簡介
唔需要多講！除咗唔夠其他國家嘅迪士尼砌之外，應該都冇咩對手！
https://www.hongkongdisneyland.com/zh-hk/destinations/theme-park/
樂園開放及節目演出時間表
https://www.hongkongdisneyland.com/zh-hk/calendars/day/
費用
樂園門票
https://www.hongkongdisneyland.com/zh-hk/tickets/
https://hongkongdisneylandtickets.disney.go.com/disney/zh_HK/ParkTickets/OneDay?Adult=0&Child=0&Senior=0
奇妙處處通
https://www.hongkongdisneyland.com/zh-hk/magic-access/
港鐵
https://www.hongkongdisneyland.com/zh-hk/guest-services/mtr-disneyland-resort-line/
電話
https://www.hongkongdisneyland.com/zh-hk/help/phone/
============================================
感謝 呀劍萬帥 提供以上資料
呀劍萬帥的網誌: http://kimfamilytravel.blogspot.hk/
============================================
10
[親子旅遊] 香港 迪士尼樂園 Hong Kong Disneyland Park
香港迪士尼樂園
釜山水族館
Thormork 冰島高地
六義園(東京)
中環街市
深圳野生動物園
珠璣巷
數碼廣場