4-4-2015：懷孕扎記37w0d．踏上歷史性足月里程碑

由 Rita 於 2015-04-04 00:00:00 發表 | 累積瀏覽 188

分類：

我覺得懷孕過程有好幾個重要嘅里程碑：

4週－驗孕成功

12週－過咗頭三個月可以公告天下(請參閱：14-10-2014：懷孕扎記12w3d．喜訊公告天下)

18週－第一次胎動，媽媽更真切感覺到同BB嘅同在(請參閱：27-11-2014：懷孕扎記18w5d．奇妙時刻第一次胎動)

24週－法律上BB有咗地位

34週－萬一早產出咗嚟可以當成一般咁樣養，媽媽怕早產嘅壓力少咗

＊＊＊37週－正正式式足月，BB隨時ready可以出世了﹗﹗

終於嚟到呢個時候，感覺非常好～知道BB任何一個時候都有機會要出世，又有啲興奮又有啲緊張了，每一日都睇緊嘅apps「What to Expect」會倒數嘛，進入2 weeks幾多days left，感覺真係好快呢～雖然好多人都話第一胎唔會咁早，但真係no idea BB呱會幾時出世丫﹗﹗唯有做好準備，祈求一切順利啦～

而家每個星期都會檢查了，血壓、小便都正常，體重終於比起之前三次有少少移動，今次量到70.0kg﹗覺得好神奇呢，得1.56m嘅我居然會同一個佬一樣重﹗﹗所以肥佬平時係咪都咁容易疲倦？﹗腳要支撐咁重嘅身體喎～～

今個星期嘅最新超聲波growth chart﹗頭仔(BPD)反而細了，S醫生話呢個正常丫，其實唔係細咗，而係頭仔開始入去盆骨中間，夾扁咗啲，所以量出嚟就會窄咗了～所以冇嘢壓住嘅肚仔(AC)就會比較consistent，一直都係50％同97%兩條線嘅正中間左右﹗至於大脾嘛，睇番個trend，S醫生話可能上一次度有少少over-estimate，如果唔睇一星期前嗰個讀數都係好smooth嘅曲線～by呢三個parameters，用算式計，今次estimate BB呱呢一刻有3.02kg啦﹗大約就係75 percentile，即是中等偏大啦～果然即使馬上出世都唔失禮了～

幾時出世唔緊要，健康平安就好﹗﹗我哋為BB呱出世做嘅準備，除咗物質上嘅之外(嗰啲就一早ok啦)，準爸爸都要好好心理預備丫，準媽媽職業上見慣「大場面」，唔怕啲血淋淋嘅嘢，怕就只怕頂唔順咁痛啫，呢個都冇得好預備了，但老公平時見到啲血血嘢佢都會「嘩～」「噫～」等嘅反應，所以特地係37週搵咗啲video俾佢睇下prep下﹗睇咗生產過程嘅animation冇問題之後，開埋youtube啲真人實錄，有下身同冇下身嘅都睇咗了，反應合格﹗﹗到時陪產應該冇問題啦啩～呵呵～加油﹗

p.s. S醫生表示，好多阿太成日concept唔清楚，以為早過預產期出世就叫做「早產」，而有啲更以為BB一定會係預產期嗰日出世﹗既然今次講起呢個話題，講多少少啦，胎兒37週就叫做足月了，37後出世嘅全部都唔叫早產丫﹗而預產期其實只係一個estimation，一般由最後經期日子計起嘅40週，或者用早期懷孕嘅超聲波量度嘅size去決定，為咗令醫護人員有個參考去評估胎兒嘅生長狀況，同埋係唔同週數安排合適嘅檢查，只有極極極少數嘅女士真係係預產期當日分娩㗎～所以BB呱預產期係4月25日，固然有機會同姑姐(day妹妹)同一日生日，但亦有機會同姨媽(我家姐)一齊4月15日生日㗎～

前往其他懷孕扎記blog