其實一早睇中咗呢個浴盆，上次去BB展時都見到好抵(請參閱：1-2-2015：懷孕扎記28w1d．興奮買買買@BB春季購物節)，但無奈已經拎得太多嘢，拎唔掂所以放棄咗(拎得多到返屋企途中跌咗卷隔便紙都唔知，欲器無淚⋯)～本身之前睇到有間網上商店都平過門市，所以就決定上網訂購啦﹗
今次幫襯嘅網店係UBaby Buy親子網上購物平台，個網都幾user friendly，分類清晰，滿$800就免費送貨到屋企，完成購物之後亦可以一站式係網上用信用卡付錢，之後店員會打電話同你confirm資料同埋安排送貨～不過今次都唔係太順利，同UBaby都真係電話聯絡過好多次，首先有部份東西冇貨要等一個星期，呢個ok啦，後來又打電話嚟同我講餵奶巾冇我想要嗰隻顏色，算啦呢啲唔太重要嘅，咩色BB都係咁食啦～最大問題係後來送貨嚟到發現有兩件貨品送錯咗^^"，入院套裝就足量裝送錯咗迷你裝，棉花球送錯咗大塊嬰兒棉⋯好在店員都好helpful，我打電話同佢哋講，佢哋都免費安排番速遞嚟回收貨品+送番啱嘅貨品，係浪費咗我成日時間係屋企等速遞囉，最搞鬼嘅係，上晝嚟收貨嘅速遞員同下晝嚟送貨嘅速遞員係同一個人，佢話：「唔早講～」我話：「我一早問咗你係嚟收貨定送貨，係你自己話收貨之嘛～」原來佢早上時未接到送貨嘅order⋯咁冇計啦～anyway，訂咗嘅其他貨品質量都好滿意嘅～我哋嚟介紹下主角－－Karibu嬰兒浴盆啦～
其實最睇中佢係可以好方便咁摺合，摺起上嚟仲可以手掛起嚟滴走啲水～老公有憂慮啲水如果積咗係啲罅位會唔會發霉？呢個問題我要遲啲先答到大家～不過我估日日用的話應該唔會咁易吧？
打開咗就係一個普通嘅嬰兒浴盆了，仲有同一品牌配合得啱啱好嘅浴網，舊年係朋友屋企第一次見到浴網呢樣東西都覺得好amazing，大家為滑嘟嘟細細粒嘅BB沖涼一定會好緊張，有個浴網好似會放心啲咁～決定買之前同老公上網睇過關於呢個浴盆嘅youtube片，有教點樣開合之餘，原來盆底有個knob，水溫太熱顏色會變，咁又多一個保障啦～當然認真測水溫先係最重要﹗
唔唔，比起係BB展買，唯一嘅遺憾係顏色冇咁多選擇囉，呢個紫色都幾靚，雖然而家話BB係女仔啫，但萬一生出嚟真係男仔，好似紫色唔太合適bor～但另一方面，後來去Baby R us睇，好似平咗成$30-40﹗抵晒﹗
UBaby Buy親子網上購物平台：
http://www.ubabybuy.com/
Karibu Baby網站：
http://www.karibubaby.com/
前往其他懷孕扎記blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 253506
全部攻略 705
全部回應 10
