探險家攻略 > 14-12-2014：台北babymoon day 3(part 3)．Att 4 fun．eslite TEA ROOM@誠品信義店

14-12-2014：台北babymoon day 3(part 3)．Att 4 fun．eslite TEA ROOM@誠品信義店

由 Rita 於 2014-12-14 00:00:00 發表 | 累積瀏覽 362

分類：

離開台北101大樓我哋向誠品信義店進發，其實只係步行10分鐘嘅距離，途中我哋被一個大商場吸引住了，睇落呢個叫做Att 4 fun嘅商場有好多靚靚精店店時裝店同餐廳呢～入去睇下啦﹗

商場外面又有人報佳音呢，呢隊仲著埋詩袍添呢，不過只聽到佢哋播嘅background音樂，唔係好聽到人聲添～如果而家詩班係我哋1點鐘方向的話，我哋8點鐘方向就係一個露天嘅美食廣場，我哋見到有條長龍，去八下咩事先～

原來係呢間1973繼光香香雞丫﹗咁多人買嚟食，我哋點都試下啦～返到嚟香港同朋友講起我哋day 4再一次食咗豪大大雞排(點解係再一次，因為2008年印度七星期半之旅之後，我哋台北轉機留咗幾日係文明地方吃吃喝喝，請參閱：26-5-2008：回到現代都市大吃大喝@台北)，佢就話覺得繼光香香雞更好味，原來佢係香港人之間已經出咗名呢～原來除咗炸雞之外，仲有炸魷魚、炸菇菇、炸薯等等，不過我哋唔係十分之餓，淨係試下招牌嘅炸雞啦～

賣雞嘅小伙子都非常熟練，一個收錢，一個炸雞，一個就用電子磅秤雞，另外又灑上調味料，非常smooth嘅流水作業，所以隊雖然長，等嘅時間都唔耐～唔，呢個炸雞我覺得聞嘅香味勝過食嘅味道，可能因為雞塊比較細，炸得有少少乾，冇咗炸雞應有嘅juicy，而撒上面嘅椒鹽味道好強烈，雞自己嘅味道就唔係好覺了，感覺上可以再食，但唔會令人難以忘懷嗰種～不過呢，價錢又非常化算嘅～後來我哋都見到繼光香香雞嘅其他分店呢～

有棵閃閃聖誕樹，應下節影下相先～

另外又有Johnny Walker嘅promotion booth，哇，有個真嘅金色人仔丫﹗呢個artist都好專業呢，郁動得真係好似機械一樣﹗

我哋入去商場逛逛，真係好多靚靚鋪頭，我特別集中逛逛好似log on嗰類嘅大型精品店，因為聖誕同朋友仔有交換禮物呢，睇下有冇咩適合嘅，由台北帶返來夠誠意吧～購物雖然冇斬獲，但我哋去咗全部都係甜品cafe嘅樓層，大開眼界，間間都100% girly又cutie，如果唔係肚子被香香雞填滿，一定要揀一間去歎歎下午茶～

入口已經非常夢幻，有煙霧screen打出來嘅愛麗絲夢遊仙境呢～

兔仔邀請大家入內享用盛宴～

華麗嘅香檳噴泉，bling bling bling～呢個噴泉，對我哋嚟講別具意義，因為行到呢個時間我哋已經行到腳板底痛，難得搵到個位坐下，又有free wifi，我哋係度休休息+上上網+(人)充充電，之後先可以繼續嘛～

我就同巨型蛋糕合照先～

兔仔話，夠鐘返屋企啦～

係呢個充滿夢幻嘅甜品樓層，我諗起當年去過東京自由之丘嘅Sweet Forest呢，不過呢度更誇張﹗(請參閱：19-5-2010：東京埼玉trip day 5．築地市場．自由之丘．回家咯~)

同一棵聖誕樹，日變夜，燈亮起，再加上前面嘅燈飾波波，另一番景緻～

台北101嘅夜景～不過會變色嘛，好似有啲啲娘⋯

到咗誠品信義店了，外面嘅燈飾我哋睇咗一陣，判斷係玫瑰花，大家贊同嘛？

外面有呢個lego聖誕樹呢，好似遲啲有lego展呢～呢個只係宣傳用～

我哋入到去第一件事係放東西落locker﹗﹗因為之前101買嘅手信已經拎咗好耐了～放低晒，得番$$同埋電話，輕鬆晒，簡直可以飄起丫～

我哋逐層乜都睇下啦，由精品到BB用品到兒童書藉到玩具到大人嘅各類書，難得可以輕鬆逛逛，香港嘅誠品永遠冇可能咁多空間，而且台灣嘅誠品係專登整啲椅子俾大家坐係度睇書呢，真好～其實都有書睇中，明知台灣買書平過香港好多，不過今次真係好節制，理由有三個，第一、上次為咗預備空間俾BB我哋進行咗超級大掃除，唔想重新堆積雜物，都係少買為妙～(請參閱：16-11-2014：懷孕扎記17w1d．超級大掃除)第二、我哋今次嘅行李非常精簡，只有一個露營背囊+普通出街背囊，買咗手信已經要hand-carry多咗嘢，再買書根本pack唔到入去﹗第三、我自從返part-time之後時時享用公立圖書館嘅設施，發現其實都有好多好新嘅書，不過要預約先借到罷了，HK$2.5預約費比起平啲嘅台灣書價，點都更化算吧﹗非常成功～真係冇買到書～睇中嘅⋯返嚟香港試下借啦～

我哋見時間差不多，揀咗一間餐廳食晚飯，要打blog先至上網搵番個名呢，原來係誠品自家品牌嘅餐廳，叫做eslite TEA ROOM～即使係星期日晚上，但人唔多，可以坐得好鬆動，仲有台北101夜景陪襯呢，你睇，張相唔係我獨照嚟㗎，拎住相機嗰個都有擺post﹗

不如我正正經經幫你影一張啦，順便可以影到餐廳嘅格局～

呢度食西式全餐，價錢比起松園禪林平啲啲咁多啦，以質素嚟講比起香港都算抵，但比起台灣好多其他地方都算貴貴地～我哋叫嘅五道菜全餐好似新台幣800-900左右～

雞肉沙律好清新，再一次見到一整排嘅粟米了﹗有冇人可以話我知究竟點整出嚟㗎？

因為我哋兩個都唔係史官，掛住食唔記得咗影個湯添，係意大利雜菜湯，感覺比香港平時飲到嘅light一啲，而且加咗啲粟米粒，甜味多啲、酸味少啲～舊包熱呼呼的，我係度大讚特讚時，day話台灣人製作食物咁認真嚟講，可能食唔到啲唔熱嘅麵包囉～

我嘅主菜係蘋果汁烤豬柳，豬柳都好嫰，配上好多蔬菜+薯仔，營養更均衡﹗

day食牛排，我就係怕出外食牛排好難要佢全熟所以有baby之後我都唔太敢出去食牛～day切咗少少熟透嘅邊邊位俾我，牛味都好濃郁～

最impressive嘅居然係件cake，平時食到飽飽時再有creamy嘅cake就會覺得太heavy，但呢個又唔會喎，唔知點解好light，放入口時如飄雪降下﹗餅底都輕易同芝士蛋糕本身係舌頭上溶為一體，正﹗

飲品有好多選擇呢，day飲咗瘦瘦嘅americano，我要少攝取咖啡因嘛，只好揀肥肥嘅熱朱古力啦～

相片影唔出聲音，其實呢一餐晚飯有種酒不醉人人自醉嘅感覺，當然我哋兩個都冇飲酒啦，但餐廳嘅氣氛、環境、上菜嘅悠閒速度，最重要係播嘅音樂，令我哋兩個都非常陶醉+enjoy～播嘅係jazz版嘅聖誕歌，有傳統的、亦有流行曲的聖誕主題歌曲，我odd到問問waitress佢哋播嘅係邊一隻CD，好明顯佢答唔到我啦，我可以做嘅就係食飽飽之後去誠品嘅CD部意圖搵搵呢隻碟﹗線索非常少，只有jazz聖誕歌、女聲、同埋同一隻碟入面同時有Jingle Bells同埋O Holy Night，去到CD部原來有聖誕專輯特區，以為好容易，點知原來jazz聖誕歌嘅CD都有十幾廿隻，買咗一隻符合嗰三個條件嘅，返到嚟聽都唔啱呢～anyway，嗰個感覺放係回憶就好好了～

1973繼光香香雞網頁：

http://www.jgssg.com.tw/index.php

Att 4 fun網頁：

http://www.att4fun.com.tw/

誠品信義店網頁：

http://www.esliteliving.com/store/store.aspx?sid=A010

前往其他台灣旅遊blog

前往其他懷孕扎記blog