正式嚟講兩日前嘅3月31號係我返工嘅last day，尋日就正式開始放產假啦﹗﹗我諗對比起其他全職太太嚟講，我嘅「一星期返兩天」變成「一星期返零天」分別唔係好大，但意義上都好唔同嘅，心理上、身體上都正式預備好BB呱嘅來臨了～
今個星期六就滿37週足月了，即是BB呱幾時出世都可以了～當然啦，我都希望佢大少少至出世啦，又大隻啲，又冇咁容易黃，又就番陪月嘅開工日子等等，不過我今日都第一次consciously自己叫咗木瓜湯嚟飲(因為青木瓜有機會令子宮收縮，之前一直都唔敢飲呢)，西瓜亦可以加入恒常水果行列了～
所以話，快嘅話，兩日後我就可以做媽咪，但慢嘅話，分分鐘會過41週要催生都冇人知﹗究竟係前1後12(我mark咗maternity leave到六月底，反正都no pay，陪下阿女耐啲～)，定係前5後8都一樣有可能丫﹗呢段「前1至5星期」我要點樣過呢？﹗
唔，平時屬於我範疇嘅家務我都會一直做到做唔到嘅，買餸煮飯洗衫晾衫，反正都喜歡～但講起討厭嘅家務嚟講，即使轉咗part-time我都係留俾老公啦，辛苦你了，大概你要一直洗碗到阿女可以接棒﹗:p
做產前運動方面可以再勤力啲啲，好早就開始上孕婦瑜伽班(請參閱：3-12-2014：懷孕扎記19w4d．孕婦瑜伽@香港瑜伽舍)，每個星期三我都想繼續，keep住好體能好柔韌性，生起嚟應該好啲吧？至於分娩球班可以勤啲去咯，只有星期二、五、六有班，之前要星期二、五放工去實在有少少行屍走肉feel，星期六又想黐住day喎，所以都有啲勉強，而家希望keep住星期五去啦(請參閱：17-2-2015：懷孕扎記30w3d．孕婦分娩球伸展班@香港瑜伽舍)﹗其餘日子我希望日日都堅持到去散步，好似平時同病人講咁，行去買餸嗰啲唔算㗎，要真真正正花時間去散步﹗﹗連樓下小紅(我哋大廈個管理員)都叫我行多啲，好生啲～其實呢個有少少難，帶住個大肚子重重的，加上而家天氣漸漸變熱，好自自然然會懶，如果老公陪我去應該效果好啲吧(不過又好容易會變成，散完步不如去食糖水咯⋯嘅結局﹗)～
至於最relaxing嘅facial同按摩都可以繼續吧～我嗰日都想問下佢哋，你哋專做產前產後嘅美容，有冇啲阿太係你哋度做緊treatment時穿水or作動？﹗不過個問題好似有少少odd，所以吞番落肚﹗:p
聽落好似闊太嘅完美生活，即使有10萬個經驗媽媽同我講：「好好享受而家」or「有得瞓盡量瞓多啲」or「多啲做自己鍾意做嘅嘢」or「去多啲自己想去嘅地方」⋯但都唔係咁容易呢～雖然我都相信到時湊B應該辛苦好多忙好多，但而家都確實未能好好享受囉～最困擾我恐怕係「食」同埋「瞓」呢兩樣，冇錯，就係人生存最基本嘅兩樣需要﹗﹗令我回想起當年做houseman時嘅渴求，嗰陣忙到辛苦到覺得，我都冇乜要求啫，淨係想餓嘅時候有得食，累嘅時候有得瞓～但原來而家仲慘，話晒嗰陣有得你食時你可以盡情食，有得你瞓時可以盡情瞓，但而家有得食又怕會胃酸倒流唔太敢食得多，食物品種方面都好講究，瞓嘛，時間的確任君選擇，但一晚兩次夜尿已經係基本(而家仲要進展到第二次時仲未天光丫﹗慘慘～>.<“)，仲要乞人憎嘅夢﹗﹗之前已經係FB訴過一次苦發埋「嗰啲惡夢」，尋晚又發生了，嗚嗚⋯唔知係咪GOPC醫生嘅宿命﹗﹗我啲惡夢唔係俾怪獸追or經歷啲咩超現實嘅恐怖感，而係睇症睇極都睇唔完﹗﹗我成個pregnant嘅過程截至而家已經發咗第三次呢啲夢了，明明已經轉part-time，明明而家已經睇症唔再overrun，明明尋日已經開始放產假，點解仲要經歷呢啲痛苦？﹗最討厭嘅係，唔知點解惡夢中醒咗之後，重新入睡居然可以繼續發落去囉？﹗？﹗help help help～～～～～～～～
所以我真係好期待BB呱出世丫，希望半夜醒來係因為要充滿住愛咁餵佢照顧佢而唔係解決尿急or發惡夢，希望可以重新滿足我嘅食慾，最重要嘅係，我真係好期待同你見面呢﹗﹗由第一日知道有你係度之後，我時時都同你講要等到四月至見面，而家到四月了，你ready就出來吧﹗最緊要安安全全健健康康丫～
前往其他懷孕扎記blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 246951
全部攻略 705
全部回應 10
