探險家攻略 > 14-12-2014：台北babymoon day 3(part 1)．仁愛天主堂主日彌撒．建國假日市場s

14-12-2014：台北babymoon day 3(part 1)．仁愛天主堂主日彌撒．建國假日市場s

由 Rita 於 2014-12-14 00:00:00 發表 | 累積瀏覽 198

分類：

day 2嘅陽明山松園禪林、即興劇場係今個trip嘅必去項目，另外一樣就係希望星期日去望主日彌撒了，既然唔係匆忙嘅行程，一方面盡量係主日親近主，另一方面都參加下世界各地嘅彌撒，感受下當地風情～(請參閱：3-8-2014：加州婚禮+夏威夷day 9(part 1)．主日彌撒@Waikiki St. Augustine Church、13-11-2011：斐濟蜜月day 7(part 2)．懶洋洋的下午@Lalati．叫人驚異的美妙歌聲)

本來出發前揀定咗去大安嘅聖家堂，見好似好大好靚咁，又有十一點嘅中文彌撒，非常好﹗但早餐方面有少少阻滯，day 2就話太遲起身啫，day 3唔遲，但落到去酒店餐廳，吓？要等位呀？﹗前面七張枱的話我哋會趕唔切，算啦算啦，唔食了～我哋餓住肚子搭捷運出發去，途中有機會隨便食少少嘢吧～點知⋯去到大安站，咦，站內地圖冇顯示聖家堂位置嘅？﹗我又冇事先print定地圖，電話又冇得上網，只記錄聖堂網址又冇記錄低電話號碼，即使搵站內職員幫忙，睇埋大大本嘅街道圖都搵唔到聖家堂嘅位置～正失望之際，day當機立斷，既然站內地圖顯示有間仁愛天主堂係大安森林公園站附近，不過試下去呢間啦～於是我哋搭番一個站轉頭，碰碰運氣，睇下去到彌撒時間啱唔啱啦～

去到捷運站，兩份share咗份三文治，咬住行幾個街口，就搵到呢間仁愛天主堂了﹗匆匆忙忙冇影到三文治，但記得幾好味，雖然只係普通嘅火腿芝士三文治，但個汁有啲芥辣味，即刻畫龍點睛一樣有咗個性﹗day就跟餐飲咗本americano，我呀，清水算啦，彌撒完咗再食啦～

好好彩，居然呢度都係十一點鐘彌撒，坐低仲夠我哋時間定一定神至開始，原來當日堂區有避靜活動，而十一點彌撒前神父就講緊個talk，我哋都順便撈埋啲汁～

遠處見到間聖堂好細小，入到去座位都唔多，可能只係坐到100人左右，但到領聖體時至發現有源源不絕嘅人上前來，我哋至發現原來有上層座位﹗難怪坐樓下嘅係老人家多啦～對於仁愛天主堂彌撒嘅印象嘛，choir好好聽，其實好樸素，只有一個琴伴奏，而成員都係中年人居多，不過佢哋歌書簡譜之中已經有分部，所以分部唱應該冇咁難吧？答唱詠有領唱，獨唱嘅女聲都好穩定，聽起來舒服～歌曲方面，因為大家都係中文吧，所以有好幾首詩歌同彌撒曲都旋律同我哋相同，只係個腦要轉多少少換成普通話，我哋都可以盡情高聲唱歌～祭台好細小，所以只有神父係台上，傅祭們都坐係教友席的，需要時先上前幫忙～好似以前都冇乜點望過普通話彌撒？經文都同平時嘅廣東話一樣，所以你有你唸我有我唸時字數一樣，速度都可以一樣﹗我哋同一排坐最左邊嘅睇裝束應該係修士吧，佢著住好傳統嘅長袍呢，我旁邊係一個後生仔，奇嘅係居然彌撒中間佢唸嘅經文變成廣東話﹗但普通話時又覺得佢發音好準確，反而廣東話時又好似冇咁正，究竟佢嘅正體係乜？﹗冇機會好好結識添～

彌撒結束後影下相先，睇落聖堂嘅裝修應該都有番咁上下歷史﹗屋頂嘅階磚起碼六七十年代或以前吧？即刻睇一睇聖堂個網頁先，果然時尚嘅嘢係呃唔到人，原來仁愛天主堂係1967年10月正式成立㗎﹗

但麻雀雖小，五臟俱全～

出發時由大安森林公園站行過來聖堂時見到parallel我哋行嗰條路係一個假日花市，我哋決定彌撒結束後要去逛一逛～

原來建國假日花市嘅盡頭係假日玉市，咁行咗呢個先啦～

入面係一檔接住一檔嘅攤子，賣嘅唔單單係玉器，仲有水晶、琥珀等等，玉器之中有擺設的亦有造成首飾的，不過我哋都不太好此道，隨便睇一轉就算了，亦冇咩收獲～玉市嘅盡頭仲有個建國假日藝文特區，呢個就相對地更沒趣了，有啲畫呀、雕刻呀賣下咁，感覺比較商業化，不是太藝術化，可能因為檔檔嘅商品都差不多吧？

我哋花得更多時間逛假日花市﹗後來睇番啲旅遊app至發現，原來都有介紹呢個假日花市呢，我哋有去啱「景點」丫，俾個tick先～

花市其實係由停車場改建，星期一至五係停車場，星期六日就化身市場～所以逛起來好闊落舒服～叫做花市真係包羅萬有，比起香港維園嘅嘅花卉展更多東東賣，與其叫花市，不如叫園藝市場﹗

當然有各式各樣嘅花賣啦，呢檔嘅杜鵑非常鮮艷，一下子就吸引咗我哋注意力了﹗花之中有盆栽，又有一支支嘅花～蘭花都好平丫，仲平過花卉展，港幣20左右就可以捧番屋企了～

仲有應節嘅聖誕花﹗大嘅細嘅適隨尊便～可惜我哋帶唔到返香港～

特別啲嘅仲有以下的～

陸地嘅松樹盆景我哋就見得多，原來有水中盆景呢﹗可能要更花心機打理吧？

呢個更神奇﹗有得賣室內水耕機﹗而家雖然都有話係工廠大廈種芽菜種菇甚麼，原來自家都可以種﹗有自動灌溉系統，所以好方便，我就話芽菜呢啲又平又易買到，點解仲要自己種？部機咪仲貴？﹗要種幾多年芽菜先可以回本？哦，自己種唔怕有農藥，原來係咁～明白了﹗