探險家攻略 > 28-2-2015：懷孕扎記32w0d．maternity photography@SENS Studio之拍攝篇

28-2-2015：懷孕扎記32w0d．maternity photography@SENS Studio之拍攝篇

由 Rita 於 2015-02-28 00:00:00 發表 | 累積瀏覽 416

分類：

我等呢日等咗好耐啦﹗﹗﹗早於好早期好早期嘅懷孕過程時已經好想影一次大肚媽媽相，當時肚子都未突已經係度search下香港有咩地方影呢啲相⋯後來我都未決定邊度影，好朋友dordor就話送個package俾我去影當禮物﹗哇～～～～～好開心丫﹗上網睇過呢間SENS Studio網站嘅gallery，好多都影得好靚呢，令我更期待了～對於幾時影，好多人都話大概32週左右，呢個時候肚子有番咁上下大得嚟又相對瀟灑，個人又未至於太腫或行動太論盡，而太遲影又擔心萬一baby早產會miss咗呢個重要moment，仲有如果太遲影baby出咗世啲相都未有得睇，到時忙到唔得閒整又冇人有興趣睇了，所以我哋就決定呢個32週整嘅日子，又啱啱係星期六去影相喇﹗book好咗studio嘅日子之後，我哋要好好做預備了～睇下人哋啲相，衫啦、道具啦、風格啦⋯我哋想點樣影法？

衫⋯我哋預備咗三套﹗

休閒睡衣style －以前係淘寶已經見過啲親子裝好cute，所以我淘咗兩set T恤，貨送到揀咗呢set，質地好啲款式靚啲又有意思～除咗爸爸媽媽款之外，仲有見小孩款㗎，想知道係點嘅到時睇下我哋嘅相相成品啦～唯一我擔心嘅係T恤唔係大肚衫，到影時會唔會著唔落？唔理了，大不了唔蓋住肚子囉～我去Uniqlo配襯咗呢兩條似睡褲嘅褲子，完成休閒睡衣風格，大概可以影啲溫馨啲relax啲嘅相相吧～

展露肚子style －點都要揀一套衫係show off肚子啦，諗起平時做運動嘅bra top可以用，買番對新leggings嚟配就ok了﹗至於老公我都買咗件黑色背心俾佢，襯番平時嘅牛仔褲就好match我啦～

原本至預備咗兩套衫，但啱啱生咗baby嘅Helen同我講兩個大人影個半鐘其實時間好多，可以預備多一套衫多第三套衫係平時著嘅便裝+情侶鞋，我覺得嗰條裙子show個baby bump幾靚的﹗

衫都ok早就預備好，但道具呢？睇人哋嗰啲有好多唔同idea喎，有啲會畫眼耳口鼻係肚子上，有啲會拎住超聲波or BB預產期嘅牌仔之類影～我一直都未諗得掂⋯直至影相前一天，我哋都整個牌仔啦，但入面寫咩就未諗好～係樓下文具鋪隨便逛逛，見到有啲絨絨嘅花草昆蟲貼紙幾靚，好啦～

我先貼好啲花花同甲蟲係咭紙上面，等埋老公返嚟先寫字﹗商量之下決定寫「Welcome曉曉」，兩個美術天份一般嘅人要寫字上去都有少少緊張(家姐話我美術天份同佢一樣係零分，day就有啲分喎，有幾多分呢？呵呵～)，day果然勝我一籌，佢認為練習下同起下稿好啲﹗結果由佢負責Welcome，我負責曉曉(話晒我啲中文字靚佢一個馬鼻﹗)～

用心油油油﹗﹗

完成﹗都幾靚丫～唔好理美術分數值幾多，總之加埋爸爸媽媽嘅愛心肯定有100分啦﹗

之後我執拾要拎去studio嘅東東時，其他嘅道具idea亦隨之而出﹗除咗呢個牌仔之外，仲有一張超聲波相(我都揀咗好耐用邊一張，結果用咗12週嗰張，因為只有早啲週數先可以一個shot睇到成個B嘅側面～)，另外我又帶咗Connie送俾BB嘅兔子公仔，圖書館借咗嘅兩本育兒書亦成為道具了﹗

今次去影相嘅SENS Studio有三個分店，一早dordor買coupon時就問咗我哋意願，我揀咗近近地嘅荃灣，其實觀塘都ok嘅，話晒day放工近，太古就nono了～荃灣分店都幾方便，係荃灣西站附近嘅新商業大廈入面～我哋上到去做少少登記，馬上就約埋揀相嘅日子，非常有系統嘅作業，應該最快一星期有得揀相，不過weekdays的話day唔方便，所以我哋揀咗兩星期後嘅星期六揀相，而家好期待3月14日了﹗

好準時攝影師出現同我哋開始了，好似唔知有兩間定三間攝影室，入面除咗拉落嚟唔同顏色嘅背景之外，仲有幾個「個性場景」，而且有可以活動嘅燈光反光板甚麼(唔係好識啲術語添)，感覺好有規模﹗攝影師係個後生仔，個樣好似我有個大學同學個樣，差啲想問佢有冇個阿哥做醫生﹗:p我哋向攝影師介紹咗我哋三套衫同埋道具s，佢有問我哋preference，但我哋叫佢話事啦，佢專業嘛﹗

我哋換好第一套衫就開始了﹗攝影師播音樂，我哋兩個生硬嘅model都可以放鬆啲心情盡量投入～似乎影呢類相都要用好多腦呢，睇佢按我哋幾個唔同嘅造型去set燈光同佈景，又教我哋點樣pose，感覺比起影pre-wedding時更舒服，可能心情輕鬆啲+有少少經驗+friendly嘅攝影師+服裝環境都舒服啲吧～我哋同一套衫都轉咗好多唔同嘅擺位丫，到時揀相可能揀死人了～黑bra top用淨黑色background+打燈，甜蜜家庭裝用溫馨草地，後來又轉用白background再影，便服look就用梳化+白透光窗簾，加上幾樣道具，都好多變化～

整個過程都影得好開心，感覺啲相出嚟應該都會唔錯﹗個package包12張相，我個荷包已經準備好為靚相而打開啦～如果影得靚的話，可能newborn相都可以再幫襯呢～指定攝影師駛唔駛加錢呢？heehee～

期待揀相相嘅日子丫﹗

SENS Studio網站：

http://www.sensstudio.com.hk/

前往其他懷孕扎記blog