24-2-2015：懷孕扎記31w3d．身體上的小變化

由 Rita 於 2015-02-24 00:00:00 發表 | 累積瀏覽 352

分類：

由1st trimester開始，懷孕嘅身體當然有好多唔同咗啦，但到咗2nd tri、3rd tri，一直一直都有唔同轉變，身邊嘅人只見到肚子越嚟越大，會問你嘅多數都係有冇嘔呀、食唔食到嘢呀等等⋯其實仲有好多好多小變化，係讀醫時都唔會教的(因為好多都唔影響任何醫療決定)，但準媽媽們都會發現而且關注的，一定要親身經歷過至知道﹗等我分享下嚟到31週時有咩發生緊啦～

頭髮－聽舊年生咗baby嘅好朋友金金講大肚會唔甩頭髮，我一直留意到20週都唔覺得有咩特別，但到20幾週後期開始發現好明顯﹗平時用護髮素時用手指叉下叉下啲頭髮，仲有六條八條十條頭髮係手上，而家係零至一條﹗而平時懶極唔吸塵嘅我，逼使我吸塵嘅可能係充滿白地板上面嘅頭髮，而家係塵囉～不過可能我頭髮短啦，暫時又唔覺得頭髮厚咗好多喎～

皮膚－好多人話大肚時皮膚會差咗，會生多咗暗瘡，不過我幸運地居然皮膚好咗好多喎，平時護膚已經極度求其，只用洗面膏同潤膚露(仲要係一年365日不分季節不分日夜都係嗰支)，preg咗之後連mask都唔敷，只係隔個星期去做facial，而facial嘅內容亦因為for孕婦而簡單咗好多(請參閱：22-10-2014：懷孕扎記13w4d．纖與美孕婦facial體驗)，我諗呢個居功於肚裡嘅baby啦～聽講陀仔會多啲男性hormone所以皮膚會差咗，陀女就女性hormone多啲所以會滑滑啲，所以除咗超聲波似係照到女之外，似乎皮膚都預告緊我裡面嗰個真係女女呢～(唔係就慘了，因為而家預備嘅東東全部都係for女仔﹗﹗)

胸－ 1st trimester時已經超谷超脹勁升cup要買新bra(請參閱：20-9-2014：懷孕扎記9w0d．大出血之「wonder」bra)，不過到咗2nd tri至3rd tri似乎冇繼續無限擴充，而家亦唔會好似之前咁痛了，係咪第時開始餵奶時會再大啲？咁咪又要再買新bra？﹗$$$$ oh no no～～～

肚－肚當然越嚟越大啦，三個星期冇係兒童崇拜幫手，大家見到都話大咗好多，係呀，話晒都3rd trimester，大得快啲係應該嘅～至於肚上面嘅紋紋，好似橙皮紋嘅妊娠紋暫時都未出現，人哋話好多時會再後期啲、個肚急速增大時至出，大家經驗係幾多週左右出現？好似話最大嘅determining factor係遺傳喎，媽咪話佢得少少，希望我都唔好咁多啦～至於正中間嘅linea nigra(都唔知邊度搵個正確中文名)係幾個星期前開始浮現，exactly邊一週我冇mark低添，不過而家個肚子大，開始只望到肚臍上淡淡色嘅少少，肚臍下有幾粗我都唔係好知了～我好好奇幾時會出現凸肚臍，同老公講笑講到佢話到凸肚臍時要慶祝「凸肚臍日」，係咪個個都會有呢？幾時出現？有冇機會慶祝呢？

手手腳腳－雖然from the very beginning，做美容按摩的總會話你腫，雖然我一再強調自己嗰啲係肥而唔係腫，但佢哋總會insist係腫從而推薦你做甚麼甚麼treatment～作為醫生嘅我，我覺得真係未有腫囉，腳背嘅紋路仲好清晰，亦按唔到個凹位出嚟～腳少少腫話係正常，我都唔太擔心，反而我關注幾時手指會腫，如果太遲先除結婚戒指出嚟除唔出咪弊囉？但結婚戒指有重要嘅象徵意義，可以的話唔到生我都唔想除出嚟住嘛～睇啲app講話大肚時因為韌帶鬆咗，對腳會大咗，可能啲鞋唔啱著，不過我呢排時時都係著住Birkenstock嘅拖鞋，所以超舒服，但有一日著咗以前好舒服嘅便鞋又好似緊咗少少喎～希望唔好大咁多啦，如果唔係，成個鞋櫃嘅鞋都要退役乎？﹗講就講指甲腳甲會比平時長得快，我又冇正式統計過，不過如果真係令我覺得腳甲長快咗，可能原因係因為剪腳甲困難咗，抗拒剪之下就會覺得長得快咗，而家勉強自己都仲剪到，但最高難度係右腳嘅腳趾尾，都唔知隻腳放係肚嘅邊一邊好，再遲少少可能要老公幫幫手了～

大小功能－便便暫時都尚可，繼續努力食蔬菜水果應該就ok﹗但最令人苦惱嘅係胃酸丫，一食得唔啱好準時哋三個鐘頭後就urt urt urt啲酸出嚟，仲要係最惡頂嘅火燒心，出現咗已經太遲，都係要食藥至搞得掂，希望之買嘅一pack 20粒嘅Ranitadine可以夠食到生嗰日啦～要嚴格控制飯餐內容囉，住家飯ok﹗湯粉麵一般ok﹗(日式湯麵、喇沙等重口味除外～)意粉risotto nono～扒飯nono～即炒粉麵飯nono～M記等快餐nono～屋企容易控制，出街就要好小心，尤其我本身超為食，成日都食完後悔，哎吔吔～好在有老公係身邊督促一下～果然尿頻係1st同3rd trimester比較緊要，好多人以為只有越後期個肚越大至會越尿頻，其實1st trimester時個子宮係盤腔內大都會壓實膀胱，所以嗰陣夜尿都有兩三次，反而到咗2nd tri個子宮向肚子發展，冇咁壓膀胱，都仲有機會一覺瞓到天光，到咗後期又大到壓實，一次冇走雞，有兩次就冇咁好彩，不過聽人哋嘅經驗，過多幾個星期應該會再密啲添～冇覺好瞓，係BB訓練媽咪要夜晚起身照顧佢丫，咁樣諗就覺得自己冇咁可憐了～

腰骨－腰骨呢排開始容易累容易酸，去做運動好重要，上完一堂通常都鬆晒，但瑜伽老師要下星期先放完農曆新年假丫，好掛住你～而家基本上瞓覺有三個攬枕我rotate住嚟用，之前介紹過嘅香蕉枕(請參閱：4-11-2014：懷孕扎記15w3d．學習側睡之孕婦攬枕)、美素佳兒送嘅三角枕(請參閱：10-1-2015：懷孕扎記25w0d．美素佳兒講座滿載而歸)、嫁之前已經陪住我瞓覺嘅豬豬枕，瞓得唔好就懷疑個攬枕，哈，轉下又好似好啲喎～唉，各有各嘅優點缺點囉，但又冇得一齊用喎﹗香蕉枕最好可以側睡時搭住隻腳，但轉身時好大條好麻煩；三角枕可以托住肚肚但手同腳都冇嘢攬；豬豬枕攬實時最安心舒服，但腳又係冇得搭～如果要幾個枕的話可能要趕老公出廳瞓了⋯做媽媽真係唔容易丫～

各位經驗媽媽又有冇類似或者唔同嘅經歷？分享下啦～:D

前往其他懷孕扎記blog