10-1-2015：懷孕扎記25w0d．美素佳兒講座滿載而歸

由 Rita 於 2015-01-10 00:00:00 發表 | 累積瀏覽 203

分類：

之前上過嘅產前講座都係公立醫院舉辦嘅，私人機構搞嘅都係第一次去，所以都好期待呢，聽人哋講呢啲奶粉媽媽會嘅講座好多嘢送，所以好多經驗人士都提我一定要去，特別推介美素佳兒，因為個側睡三角枕好正喎～十二月嗰次日子唔啱所以冇去，今次終於去到了，而且而家個肚大啲，個側睡三角枕至啱用嘛～早前收到短訊通知講座資料，打個電話去就可以留位了，仲要一日有兩場，上下晝任君選擇﹗

我哋去咗上晝嗰場，事關下晝仲有屯門醫院嘅產前講座呢(請留意下一篇blog﹗)，中間食個飯再返去剛好﹗美素佳兒產前講座係尖沙咀Holiday Inn，地庫嘅水晶廳舉行，服務都係酒店級的～我哋去到門口就見到電視機show咗我哋個function了～原本我鬼鬼祟祟咁影，都唔係幾好意思，day竟然主動走過去影喎，呵呵～

排隊入去時經過Milk Bar，之前睇人哋啲blog都講過有得試飲媽媽奶，果然喎～唔，我都係覺得－－太太太太太甜了～

登記入場，馬上俾咗一個file，入面有啲育兒資訊，活動問卷，買媽媽奶粉優惠單張等等，仲有兩張coupon，一張係試食券(咦，乜唔係已經飲咗媽媽奶啦咩？)，一張係體驗活動券(咩嚟㗎？﹗)～會場職員馬上就叫我哋去體驗活動了，原來聽promoter講解一次媽媽奶個罐嘅設計，就可以領取大家期待嘅三角枕了﹗原本我都冇話非常想要三角枕，但去做按摩嗰度有得嚟墊著大肚子覺得幾舒服，我都好想屋企有番個了～我哋每人貼上呢個貼紙，係度被稱為爸爸媽媽，感覺好滿足呢～

個hall都好大下，我哋揀個位坐得前少少又有得睇得清楚大mon～

等緊時day就揭下啲小冊子，我就睇下播緊嘅影片，講嘅係唔同週數BB嘅發展呢～

有兩場講座，第一場由營養師主講孕婦嘅飲食，都幾有用，始終係commercial嘅活動，搵嘅主講嘉賓都係有番咁上下好口才，唔同公立醫院唔會點著重講者係咪口齒伶俐～其實有知道懷孕至而家都睇好多關於飲食嘅資料，但今次有用係因為佢針對性講香港人飲食容易唔注意嘅五大營養素，有好多practical嘅例子去詳細講解，五樣分別係鐵質、鈣質、葉酸、DHA同埋益生菌～鐵質我哋成日都講牛肉同菠菜，原來動物性鐵質比起植物性鐵質容易吸收得多，所以肉類source更好，而點樣分邊啲肉嘅鐵質多啲？佢教我哋，簡單嚟講就係唔落調味品之下煮熟咗之後變深色嘅就係了，所以牛肉係，我哋常食嘅豬肉同雞肉唔係，而其他都多鐵質嘅有鴨肉、鵝肉、乳鴿、鴕鳥肉等等～鈣質我哋知道奶製品就最多啦，不過有時候會話唔慣飲奶就飲豆漿啦，原來豆漿嘅鈣質只係奶嘅三分之一咋，要飲好多至得掂，所以唔飲牛奶唔食芝士乳酪的話可能都要食supplement～葉酸我哋就知道深色綠葉蔬菜多啦，原來豆莢類都好多，可以多啲食，但唔可以煮太耐會destroy咗啲營養素～DHA我不嬲知道深海魚好似三文魚、鱈魚、秋刀魚、鯖魚都多，原來我哋香港人常食嘅䱽魚都多喎，咁就容易買啦～益生菌除咗乳酪之外，泡菜都係好嘅選擇，但煮熟成為泡菜鍋就唔得了～後尾佢又拆解咗幾樣中國人常話孕婦唔好食嘅東東，好似西瓜呀、香蕉呀甚麼嗰啲，我聽咗就算了，原本打算呢段時間食嘅就照食啦，涼中極品都係暫時唔好食住了～

營養師講完之後係中場休息時間，不過都唔係齋hea，我哋嘅試食券可以用了﹗原來唔係只有得飲媽媽奶呢～

哇，有用媽媽奶整成嘅薑汁撞奶，勁﹗﹗仲要仲係熱嘅呢～薑汁撞奶本來就應該甜甜地，所以超甜媽媽奶係呢個時候就唔係缺點了～印象加分呢﹗

第二場講座係兒科護士主講，佢示範俾大家睇點樣幫BB沖涼、洗頭、掃風、點樣用布做成包被～首先邀請咗兩位爸爸試下點幫BB洗頭，係冇接受過訓練嘅時候，佢哋用盡自己嘅頭腦去考慮點樣安全啲，係眾人面前試啦，雖然不太正確，但勇氣可嘉﹗增加大家唔少歡笑～heehee～之後就由姑娘示範了，原來好講究呢，預備材料簡直就好似電視教煮餸咁，全部攤晒係度至開始，每樣都用小兜裝住～哇，洗頭又要同沖涼分開，沖涼之前又要清潔pat pat，沖完涼又要洗肚臍，之後又要洗面，仲要每一個step嘅equipment都唔同呢，好大陣像丫，小小嘅身軀沖個涼嘅時間恐怕仲長過我﹗﹗好在到時開頭有陪月姨姨幫下手啫，有個熟手嘅人傍住，等我哋兩個可以慢慢適應﹗遲啲屯門醫院都有關於育兒主題嘅talk，到時又睇下教法有冇唔同啦～

完場時主持人再宣傳一下而家買媽媽奶嘅優惠，如果唔係早幾日惠氏媽媽送咗我一大罐媽媽奶，我可能都會幫襯，買一罐奶粉送一堂育兒實習班，小組咁上有得用BB公仔練習，即場有導師指導～更送要嘅係送一個胎兒心跳探測器，好似好高興咁呢～不過我太多媽媽奶粉都冇用，所以就算數啦～

滿載而歸嘅講座﹗﹗呢個就係免費贈送嘅三角枕～之前有諗過，如果美素佳兒唔送我自己都會買一個呢，好似啲百貨公司賣緊七十幾蚊一個～其實下晝我哋仲去咗屯門醫院聽另一個talk，係下一篇blog度講，不過我要post呢張晚飯相因為，為咗食鐵質，我哋食咗⋯呵呵⋯乳鴿呀﹗好高興～我想影乳鴿，不過day俾超巨型嘅雜菜煲吸引住多啲，咁嗰個真係好誇張嘅，食飽咗打包番去再食多一餐，好抵～

美素佳兒網站：

http://www.friso.com.hk/hk/#

前往其他懷孕扎記blog