11-5-2015：新手媽媽day 33．NB碼畢業，進入S碼了﹗

徙片王係過去呢一個月用咗唔少NB碼片片，由產前預備走佬袋買咗兩包，到後尾有朋友送同埋再出藥房and上網追加，我都唔敢數總共有幾多條片，一定嚇死人﹗早前承蒙朋友們嘅厚愛，送咗好多S碼片片(仲有幾包M碼同L碼暫時存放係婆婆屋企)俾我哋，知道S碼Pampers係for 3-8kg，我都開始盤算幾時俾曉曉「升班」～

終於到day 33，用埋最後一條NB碼片片，雖然Pampers BB會張買一送一coupon仲未用，但都唔繼續用NB碼啦，曉曉都咁大粒咯，4kg都有，開始著S碼吧﹗

係度順便做個NB片片大比拼啦，未至於著過晒全部牌子，但都著過三款：Pampers、Huggies同埋Goon～一早個個推介NB一定要著Pampers，如果唔係啲屎有機會上背脊，so far其實只係得一次overload到出咗嚟，係著Goon時發生，我唔排除著其他牌子會唔會出現，因為嗰一泡真係好勁﹗﹗:p我哋自己執走佬袋時就買Pampers，後來追加都有再買Pampers，覺得Pampers兩側貼紙彈力最好，邊位都可以著得好貼身，果然係片片嘅皇者～Huggies都有佢嘅好處呀，因為曉B初初勁細粒，出世2.9kg，收咗水時最細得番2.68kg，Huggies NB嘅size係再細啲的，所以對於當時嘅佢嚟講更fit身型，好在一包只得20片(i.e.著唔到幾多日，即使以唔徙片嘅狀況嚟講，人奶B一餐一大小每日都要8-9條～)，所以BB大得好快都唔怕～至於點解會買Goon呢，就係因為要上網買開其他嘢，想湊夠數唔駛俾錢送貨，而新生堂又只賣Goon一款尿片，咪試下囉～Goon一包有90條，感覺消耗一包冇咁快，感覺冇咁肉赤，哈哈，而且Goon一包入面每一條尿片個公仔都唔同㗎，BB未識欣賞，但媽媽換片時都賞心悅目啲(讀者可能覺得：呢個完全唔重要⋯)～不過Goon係三隻牌子之中最冇彈性嘅一款，所以包時要小心啲～同埋片片相對薄啲，我諗有好有唔好啦，天氣熱，薄啲好似舒服啲，而且一般片片只有尿濕顯示，但Goon嚟講便便啲顏色都透到出嚟，唔駛揭開都知道有冇開大～:p所以三款都各有各嘅優勢﹗

但未來唔短嘅日子曉曉都係著Pampers only㗎啦，因為我哋雖然一包S碼都冇買過，但朋友們送嘅夾埋有11包丫﹗我哋間衣帽間雜物房被片片攻陷了～雖然話係for 3-8kg，但著上身又唔覺得太鬆喎，不過明顯覺得片片厚咗，可能係預大少少嘅BB一篤篤嘅大大小小都份量多啲吧～我都考慮緊幾時引入我哋一早預備好嘅尿布(10-3-2015：懷孕扎記33w3d．we are ready之Bebemo環保尿布)，因為滿月後就可以用了，可能用紙尿片之間都會用下吧，盡量減少地球垃圾～

前往其他新手媽媽blog

分享此文：

• Twitter
• Facebook

請按讚：

Comments

comments

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================