18-2-2015：送馬迎羊之逛年宵、食湯圓團圓

今年早係年廿五時行過一次荃灣嘅年宵市場，嗰日年宵市場啱啱開幕，同事話不如食完lunch去行一趟，所以毫無預兆之下就去行咗一圈，不過好多檔口都準備完成，而且下晝要繼續工作，大家都冇收獲～年三十晚食完團年飯，不如都去行一行屯門年宵市場啦～

我哋由屋企沿住屯門市鎮公園河邊再過河到對岸，抵達天后廟前嘅年宵市場～年三十晚果然係年三十晚，人超級多，為咗保護30週嘅肚子，我哋採取「火車頭式」嘅動作前進，即是老公行前面，我搭住佢膊頭行後面～人太多令興緻減少，我哋行濕貨行咗兩條街，買到花之後，決定行乾貨一條街就返屋企了，頂唔順丫～下年都係要趁人冇咁多嘅時間來～

今年我哋買咗一盆蘭花，結婚三年幾我哋今年一齊經歷第四個農曆新年了，第一年買咗菊花，第二第三年都係水仙﹗其實老公最想買水仙，不過見好多水仙都未開花，感覺唔太應節，而其他花嘛，見到啲百合麻麻地靚，劍蘭的話我哋屋企個花樽唔夠高又support唔到，桃花我年年都想買㗎啦，不過大嘅又唔捨得，散散地細細束嗰啲又唔靚，結果呢盆$100嘅蘭花吸引咗我哋，雖然平時花墟買可能只需要$30，但以過年嚟講$100買花都ok啦，而且檔主話可以擺兩三個月喎，花謝晒之後剪走佢繼續養住啲葉，仲可以期待下年會唔會再標新芽出來～另外仲買咗雪寶氣球(我同家姐都係千尋睇Frozen，所以不約而同都叫佢做雪寶，今次行花市見大家推銷叫賣先知道香港譯名叫做小白，哈哈，變mainland添～)，今年佢真係hit爆呀，咁又係嘅，Frozen咁hit，但Elsa同Anna似乎只會吸引到小女孩，但Olaf就大人小朋友都會咁鍾意佢，鍾意夏天嘅雪人喎，so cute～～

不過唔知係咪我個雪寶氣球係不良品，氦氣之中滲咗空氣乎？好似唔係好飄起咁嘅？當人哋嗰啲氣球甩咗手會飄走嘅時候，我感覺即使我放手佢都只會跌係我腳旁？﹗所以係人多嘅時候我要抱住佢行instead of炫燿飄起嘅氣球囉～

後尾入到商場冇乜風好似好少少，識得飄起了﹗yeah～

年三十晚兩夫妻團團圓圓當然要食下湯圓啦，不過仲好飽丫，share啦，解決任何問題～

分享此文：

• Twitter
• Facebook

請按讚：

Comments

comments

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================