12-6-2015：한국어第二學期．趣味gogogo

由 Rita 於 2015-06-12 00:00:00 發表 | 累積瀏覽 272

分類：

之前打過兩篇關於我係HKU SPACE學韓文嘅blog(請參閱：11-9-2014：韓文班開學咯～、14-11-2014：學習真好．한국어之進度)，即使今個學期我要大住個肚、生埋個B、坐埋個月、忙碌地湊住個B，都阻擋唔到我學習嘅熱情﹗XD之前有個blog讀者Louis叫我再打下學韓文嘅進度，我亦應承咗佢，就趁曉曉瞓到變咗豬豬時打番篇啦﹗

返學當然唔少得作文啦，功課有趣嘅係唔係「看」圖作文，而係「畫」圖作文﹗我如實報導㗎﹗《我的家庭》呢啲經典題目嚟講我都用心做㗎，每個人物我都嘗試畫番佢哋嘅特徵﹗爹爹好鍾意呢張「全家福」，仲話要用嚟做我哋whatsapp group個icon呢～heehee～不過我幾有心機都真係及唔上有啲其他班嘅同學仔，話說原來有樣嘢叫做「숙제왕(即功課王)」，同期咁多班嘅同學仔之中，老師們會揀三份最出色嘅功課俾大家投票，投出最正嘅功課王﹗其中係我哋班入面票數第一嗰份功課，同學仔係假設自己身份嚟寫，有冇睇過《超人回來了》？其中咪有三胞胎嘅「大韓、民國、萬歲」嘅？佢咪assume自己係三個B嘅哥哥，大家咪睇得有趣囉﹗講諗頭我真係甘拜下風咯～

另一次認真功課之作﹗今次要寫postcard俾老師﹗我嘅目的地當然係最近去過嘅夏威夷啦～其實本身我記得屋企有一張買咗冇寫嘅postcard，諗住用張真嘅嚟交，但搵極都搵唔到，heehee，sorry，屋企得黑白printer，但都夠誠意吧？

除咗有內文之外，連地址我都專登search咗㗎～

今個學期既辛苦又開心﹗辛苦係坐月時skip咗三堂(我已經偷步離家出去上堂﹗:p)，其中一課完全冇上，又冇考到quiz 1，所以到quiz 2時我要一次過溫晒五課書﹗仲要係趁曉曉瞓咗時偷偷摸摸咁溫書做功課～而今個學期嘅老師呢，每個星期都會叫我哋出去白板默書，都有少少壓力(來自自己吧？)，同學仔話會「發白板瘟」，因為平時仲忙過返工，我都係靠巴士嗰半個鐘嚟溫書咋～

但開心嘅係，因為係上個學期已經識咗一班朋友，大家一齊升班，所以上堂時可以吱吱喳喳，課堂以外嘅時候我哋又係whatsapp group用有限度嘅韓文嚟繼續吱吱喳喳﹗亦因為升班了，識嘅嘢越嚟越多，睇韓劇時發現自己聽得到越嚟越多﹗又話忙又有時間睇韓劇？係呀，泵奶時唔好浪費時間丫嘛，由坐月到今日啱啱完成咗《血》﹗因為今個學期學咗對長輩/上司用嘅敬語，係劇入面下級醫生同上級醫生講嘅敬語就聽得明了﹗又因為今個學期學咗future tense，句子又聽多咗了～甚至係每返一堂，就覺得馬上聽多咗了，好快見效﹗

有一日大家講起打算學到幾時？我毫不猶疑話，學到冇得學囉﹗即係？﹗而家我哋上嘅係Introductory Korean(2) (冇錯，只係intro，連初班都未算～)，而HKU SPACE有韓語入門、基礎證書、中級證書、高級證書，每個階段有分1同2，即是起碼四年﹗將來會唔會繼續開深造呀甚麼就唔知了～同學仔之中都馬上有人和議話會讀到冇得讀﹗希望多啲同路人吧～:D