25-2-2015：水果剝皮神器之提子篇

繼上次介紹過剝橙小棍棍之後(請參閱：16-2-2015：水果剝皮神器之橙篇)，我都好想盡快試埋一set入面嘅另一款－－剝提子工具﹗其實我買時根本就係俾呢個吸引多啲呢，見到小販大叔好純熟好靈活咁剝一粒粒平時見到就頭痛嘅紅提子，如果真係咁方便，買紅提子嘅阻力就少啲啦～

適逢有呢啲咁靚嘅紅提子，一於試下新工具﹗

膠柄上面有個彎彎嘅金屬頭～

將個彎金屬片沿住提子皮下面嘅曲線插到底部～

再兜360度⋯唔好意思，呢個係失敗例子﹗兜圈時出咗界﹗理想的應該係將皮同肉徹底分離，然後係個皮度一嘟，將粒精瑩剔透嘅提子肉咇出嚟就可以飽享提子純粹嘅美味同口感了～

不過嘛，我發覺原來縱使工具幾好，都要工多藝熟﹗開頭時用得手忙腳亂，都唔可以完整咁「金蟬脫殻」，可能剝到70-80%，剩底都係要用手搣～但用用下純熟啲就成功率提高﹗而且都同提子嘅size有關，今次啲提子太勁，個diameter長過個工具個curve嘅diameter，變得唔係太合身，一串提子之中有啲相對細粒少少嘅又會剝得靚啲容易啲～anyway，我都覺得係一個好嘅設計嚟嘅，起碼啲提子食到第二日時我依然有拎佢出嚟用，即是起碼好過用手搣啦～不過我始終唔夠純熟，速度唔夠快，如果一粒自己食一粒俾老公食佢都費事等我，怕搣皮嘅佢⋯連皮食﹗

之前嗰幾張相係第一日食時影的，呢張係第二日食時再影的，因為技術提高咗，可以咇出完美嘅提子肉﹗呢種口感係連皮食or用手搣皮食唔能夠比擬的，因為冇粗糙嘅皮嘅阻隔之外，提子肉個表面仲好smooth，所以入口口感更加細緻，可以享受純粹嘅提子美味﹗令我諗起可以比喻嘅應該係呢個⋯

「將太的壽司」入面唔用海苔包裹嘅白魚壽司﹗﹗(超級將太迷無論咩都可以隨時quote到出嚟，哈哈～)

我第時變成熟手女工時再邀請太家上嚟食「完美提子」啦，呵呵～

分享此文：

• Twitter
• Facebook

請按讚：

Comments

comments

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================