我的快樂生日：海洋公園夏水禮

26 AUGUST 2015(WED)

，所以就趁今日三口子入去玩返轉啦~

我同小小豬都係八月生日，所以免費入場，即係話只係一張入場卷費用，就可以三口子嚟玩，真係勁抵啦！

一入場就已經見到好多LINE公仔，當然即刻要影下啦~

哈哈哈....我有個習慣，就係每年生日都會買套新衫俾自己(其實都係買衫嘅藉口)，估唔到老公會讚我條裙仔靚，仲叫我著多啲依啲款添。唔知佢係真心定係因為生日而逗我開心呢？不過，俾人讚都係一件開心事嚟呀~

去到夏水禮場地，我同小小豬即刻換好晒衫就開始去玩啦！不過，我竟然大頭蝦拎漏左條短褲，所以冇得遮下個肥豬腳，希望冇嚇親大家。

好在今日唔算多人，我地玩都唔算要排好耐，每個遊戲都大約15分鐘左右，都叫做可以接受啦！

我地去濕水千秋進發，其實小小豬仲差少少先夠高去玩，最後.....好在著返對拖鞋又剛剛好，所以有得玩啦~

唔好睇好似好少水，但其實照頭淋，都幾過癮呀，就依個千秋小小豬都玩左四次，完全唔怕啲水呀~

之後我就自己去左玩滑梯，由於連眼鏡都唔可以帶住，就連排住隊時都已經要除，感覺唔太好，所以玩一次就算啦~

就係我玩滑梯時，佢地兩父子就去玩水柱~

之後我地就去玩大水筒啦~

其實開頭小小豬係勁驚，點都唔肯行埋去，不過玩左幾次之後佢就大膽左，仲敢行埋去個最勁水個位置啦~

其實仲有一個泡泡池，不過小小豬又真係差少少先夠高，職員姐姐又好嚴格，所以最後都係冇得玩。

雖然只係簡單一個夏水禮位置，都係得四個遊戲區位，不過估唔到我地都玩左差唔多兩個鐘。

臨離開之際當然又要集郵啦~

全日唯一三口子合照，係完全未做好準備時職員就話影完(我地之後係冇人排隊嘅)，真係激C我呀~

離開夏水禮之後，我地就繼續周圍玩同周圍睇動物，同埋去小小豬至愛嘅兒童樂園玩。

其實兒童樂園嗰邊都有個小型夏水禮，不過由於我又懶再換衫，小小豬又唔敢自己入去玩，所以最後都係冇玩到。

唔緊要啦....出年我地一定會再嚟，到時小小豬一定會高多啲啲，樣樣遊戲都夠高玩，可以陪我再玩過呀！