前日(25-12-2014 Thur)同男友o黎o係’G’字頭o既團購公司買o既聖誕大餐,我o地o黎到坐低後,我o地就揀o野食,由於我o地係兩個餐,所以二選一o既沙律同甜品都可以要晒兩款,只係主菜要四選二,我就一定揀香烤火雞,無他,聖誕節嘛.個女侍應就係咁推介肉眼扒,男友睇完都覺得肉眼扒吸引,於是都揀呢個.

而飲品係2小時任飲,當中竟然包一啲烈酒(啤酒例外),

我o地唔飲烈酒o既人,就可以試吓喇. (有關酒類,講睇下面o既酒類欄.)

首先到o黎o既係牛肉,香腸甜菜湯和羅宋湯,

熱騰騰而且好香,飲落,味道好濃,杰度o岩o岩好,唔錯.

然後係兩個沙律,水牛芝士番茄沙律同巴馬火腿哈蜜瓜沙律.

水牛芝士番茄得三對,水牛芝士就係味道淡淡o既芝士,沙律菜新鮮,而黑醋落得o岩o岩好,好味.

而巴馬火腿哈蜜瓜沙律呢,

menu寫有蔬菜,甜瓜,小番茄,巴馬火腿,洋蔥同蜂蜜黑醋醬,但….我o地只見同食到有巴馬火腿,小番茄同蔬菜.巴馬火腿得幾片仔,重要係風乾o左同細片,好失望囉.

而蜂蜜黑醋醬好似食唔出喎.

之後主菜香烤火雞o黎到,呢個配有烤薯仔,釀火雞料,小椰菜,青豆,紅蘿蔔,香腸卷,約克郡布丁,肉汁同紅莓醬.

火雞肉不嬲都係o鞋,呢o度亦唔例外,亦好可惜佢冇乜味,紅莓醬我o地一啲都食唔出.烤薯仔係切片俾我o地;香腸卷就係外面用煙肉包住而已;而約克郡布丁原本都幾香,但凍o左就影響o左,成個軟腍腍,味道淡淡唔甜.

而最後見到有一pat o野,應該就係釀火雞料,煎到外面幾脆,餡料唔太惹味.

到炭燒肉眼扒喇,一端上o黎就嗅到炭燒味,而且大大件又厚,

呢個配野生蘑菇醬,食落,真係好重炭燒味,呢個鹹o左啲,口感就覺得佢有啲燒過龍,

有啲o鞋.野生蘑菇醬味道都濃,配上o既南瓜蓉好甜,好好食.

最後係兩個甜品,oreo雜莓奶油芝士松露同傳統聖誕布丁配新鮮水果.

o黎到時,女侍應叫我o地等等,因要攞火o黎,

原來佢o係個布丁上點火燒,

火熄o左我o地就係啦.呢個係提子乾布丁,都幾甜吓,須要食吓啲生果.

而oreo雜莓奶油芝士松露呢,

呢個唔可以斯文由上而下逐層食,要一匙直插到底勺起o黎食,至食到成個甜品o既組合.成個味道唔太濃唔太甜,只係覺得有啲漏.

酒類:
大多數都係第一次飲,感覺Tequila有啲似米酒,但佢只燒口腔同脷,唔係好哽.

Whisky味道濃少少,感覺同Tequila o既差唔多,但男友話Whisky o係喉嚨發熱,咁我又冇喎.

不過我同男友都分別要杯雪碧同熱檸水間唔中濕吓喉.

第二round要Vodka同Brandy,

我特意叫佢o地俾半杯仔Brandy,因驚飲唔晒,最後都係斟o左大半杯.

Vodka同Tequila, Brandy同Whisky都好似冇乜分別.不過Brandy就嗆少少.

最後到Gin酒,

我同個講廣東話o既男侍應講,要半杯,點知斟到滿滿.我一飲,嘩!呢個超難飲,難飲唔係燒喉,相反佢係完成唔燒,而係佢o既味道,得個苦字,我同男友呢杯就真係o徙o左人o地,我o地只飲o左4,5啖咋.

味道係3.51分

服務:
我打電話o黎book位時,個女仔問我o地想坐出面定入面,原來有出面,咁我揀出面啦.

由於環境昏暗,睇唔到menu,個女侍應揸住支電筒仔照住menu俾的o地睇,好攪笑.

侍應大部份係講英文,有個好熱情好得意,唔錯.

上肉眼扒同熱檸水時,侍應會自動拎埋芥末同糖o黎.

環境:
呢晚落毛毛雨又凍凍地,其實我都幾驚凍,想o黎到時改坐入面,但原來唔使,因為佢o地有暖爐,我o地唔覺得凍啊.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================