18-8-2014 (Mon)我請假,於是晏晝去男友公司附近同佢食lunch,好耐冇飲茶喇,去富臨定百樂門?百樂門啦.

我o黎到,變o左新光宴會廳o既?通知o左男友就照入去食啦.

我剔o左:
1. 香煎蘿蔔糕(中點)

雖然開始有啲涼,內裡冇乜料,但蘿蔔味重,幾好食,可惜o 個碟甜醬好似乾爭爭.

2. 香茜牛肉腸(大點)

唔係好大碟,牛肉滑但味道唔多夠,一般.

3. 新光蝦餃皇(特點)
幾飽滿,而內裡有好多粒爽口鮮味蝦仁.

4. 潮州蒸粉粿(中點)
個樣同食開o既唔多同,圓碌碌脹卜卜,食落,唔太惹味,有啲遜色.

5. 黑椒金錢肚(大點)
得面o個幾件,炆得算腍但仍保持爽口,味道唔太辣,下面o既係麵筋,

算有啲誠意.

6. 雞蛋豬腳薑(頂點)

呢個係北菇棉花雞(待點)冇到下,男友自己出去攞,因為我嗅到好香薑醋味.豬腳好腍好入味又唔肥膩,雞蛋硬實,因為呢個係舊蛋,味道都幾辣吓,但啲湯就冇想像中咁辣,又甜甜地.

7. 薑汁糕

都係男友自己出去攞,佢以為係紅棗糕,但亞姐都糾正返佢,話係薑汁糕.
呢個味道除o左辣之外,就係好辣,絕無其他.但口感唔差,有彈性.

價錢:
根據menu計,中點(14.80 X )=29.60,大點(16.80X2)=33.60,特點18.80,頂點25.80,茶(6.00X2)=12.00,加一=$131.78,total收我o地$169.00,我唔知薑汁糕幾錢,加埋一要$37.22?就算我好似睇到車仔檔寫雞蛋豬腳薑要$28.80,都係$135.08,差$33.92.睇點心紙,比頂點$25.80貴o既係$28.80,$32.00,$38.00同$48.00,點計都運唔到$37.00同$33.92,究竟點計????

服務:
知客有禮,帶人入座,開茶,落單都冇問題,好快手,但下半部送o野食就開始有啲亂o黎,頻頻將隔離兩張枱o既o既粉麵飯都遞上,想點?唔睇枱號.

但我剔o左o既棉花雞都冇出現過,甚至同個女樓面講,佢都冇答我跟唔跟,亦冇返o黎同我講,音訊全無.

環境:
完全保留百樂門o既裝修,連電話號碼都保留,不過可能有少少迫,但冷氣充足.

味道係3.54分, 抵食係1.5分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================