早前約女友人TW出o黎食飯,男友都好耐冇同佢見面,就帶埋男友出o黎,我o地約o左尋晚(12-2-2014 Wed)食,地點我就揀葵芳,方便大家.而食邊間,TW o係西餐同呢間揀,揀o左呢間,因為多人可以share食多啲種類.哈哈,同我一樣咁諗.好,就呢間.

等齊人,未夠7:00pm我o地就入去lu,時間咁早梗係唔多人,我o地係walk in客,就被安排坐o係最入面,同樣待遇o既都有兩枱客.

坐定後,我o地決定要二人套餐同再叫其他o野食,我o地要o左$368.00o既,o係等o既時候,我o地就食佢o既餐前小食－秘製自家蘿蔔.

蘿蔔被醃到變成黃色,見有啲辣椒,應該係辣,我就先試少少,係,係辣,但只係少少辣,微酸微辣,蘿蔔又多汁,爽口同冇渣,超好食.餐前小食都咁有水準,我諗呢o度都唔差o掛.

好, o野食陸續上o黎:

1. 套餐中o既南國小食雙拚,四喜烤夫拼百頁卷

賣相好靚,份量梗係唔多,先食四喜烤夫,呢個好入味,外面仍有少少脆 ;百頁卷味道好濃,食到有中國芹菜,呢個一般吧.

2. 套餐中o既清炒河蝦仁

呢個真係好清,唔蘸醋食食到蝦o既濃郁鮮味,而佢係少到o岩o岩熟,所以一啲都唔’o鞋’.

3. 另叫$68.00o既糖醋小排骨
我覺得奇,點解呢個唔係套餐o既餸咁快到o黎?唔通整定o既?

而份量呢,少到冇人有,呢個係散叫個喎,咁似二人份o既?但睇個樣應該幾好食.

TW先食,佢一食就即刻大叫凍o既. 糖醋小排骨唔係熱食o既咩?點會凍食o架?唔怪得咁快有啦.我都食先,係凍,但又濃又杰o既醬汁非常美味,肉質又夠鬆,真係好可惜佢係凍,影響食味.

4. 套餐中o既花膠鮮魚羹

一人有一碗用洋燭熱住,呢個係落單時侍應話幫我o地加湯,可以睇到滿佈菜粒同豆腐粒o既羹好清,食落,味道都一樣咁清,只要菜粒同豆腐粒,加少少上湯打個獻就掂,我都可以識俾朋友食.而裡而都有魚肉粒,同一條條半透明似蒟蒻o既o野,呢啲就係花膠?

5. 套餐中o既稻草肉配荷葉餅
稻草肉有啲似東坡肉,不過佢只係面上o個層係肥,下面係全瘦肉,由於三個人食,男友就將啲肉cut開,TW話怕肥,就只食半件瘦o既.其餘o既就由我同男友食,我o地將件稻草肉放入荷葉餅內夾住食,但真係大件o左,所以都係要cut開一半,件稻草肉肥o既部份固然腍晒,而瘦o個啲,唔夠腍亦唔入味,呢個比較遜色,至於荷葉餅,軟軟熟熟同微暖,還可以.

6. 套餐中o既招牌小籠包

共有四個,要趁熱食,每次食小籠包我都會好小心,一怕夾穿漏汁,二怕唔小心被湯汁燙親.

呢個第一關過o左,食落,內裡湯汁都幾多,味道都幾濃郁,唔差.

7. 套餐中o既上湯時蔬
份量一樣係好少,但菜心夠甜同腍,上湯鹹淡亦適中.

8. 另叫$25.00o既灌湯生煎包
一客三個o岩o岩好,端到o黎即刻令我諗起荃灣o既祥興記上海生煎包,因為佢o既賣相都一樣,摺口向下,同樣煎到金黃色,不過呢邊就整平o左.

食落,亦都係有好多汁同好熱,底個幾脆,

但包皮比祥興記煙韌同鬆啲,呢個比較優勝.

9. 另叫$65.00o既例牌o既南國蔥油開洋拌麵
由於我o地都覺得唔多夠,於是男友就叫呢個,

呢個顏色好深,夾起食o既時候成一餅餅黐住,就算夾到,放入碗內布夾起o黎食都黐住.

至於味道,佢甜甜地但又帶有少少豉油o既鹹香,較得唔錯,不過...都係有啲味精,而麵o既腍度都適中.

10. 套餐中o既時令甜品
我o地估會係咩o野上海甜品,酒釀丸子?棗糕?高力豆沙?o黎到喇,通通都唔係,竟然係木瓜雪耳糖水.=.=”都舀得幾滿,雪耳o既軟硬度都適中,糖水只係淡淡o既甜味,我就覺得唔夠甜.

服務:
女侍應每上一個菜,都用國語話我o地知係咩o野菜,男友就用廣東話講返,佢就教我o地講國語,哈哈.

而由於佢o地上菜速度奇快,到近尾聲上菜冇乜位擺時,女侍應扮驚訝我o地叫咁多o野食攪氣氛.

環境:
o係出面望入o黎好光猛舒適同高檔,但原來行到最入有好大分別,係啲凳o既問題,令o個個範圍跌o左一級,同普通酒樓冇乜分別.

呢餐埋單共$677.00.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================