前晚,女友人DC 聯絡我,話由越南o黎香港結婚o既新娘LPK想約我尋晚(18-2-2014 Tue)出o黎食飯,原本我提議聽晚,但佢o地又提議叫埋我男友出o黎,就男友o既話,就要約返尋晚喇.最後都落實尋晚食,而食飯o既當然有新郎CTS同另一個男友人LKH共6人.

咁我俾佢o地揀同樣o係太子o既呢間同上上拉麵小籠包,投票決定後o黎呢間,除o左我同男友返工,其他o既都,我放o左工行後就join佢o地,由於天氣突然轉冷,我就話先上去鳳城,坐低等埋男友,我o地去到都只係6:40pm,都未有客住,我o地坐低洗好o野後,亦商量o左點咩o野,7:00pm左右男友都到o黎,落o左單後,食吓餐前小食先,呢個餐前小食酸度醃得o岩o岩好好,青瓜同蘿蔔都爽口,令食慾大增.

1. $78.00o既蒜蓉炒菠菜

呢個大大碟,蒜蓉唔算多,鹹淡適中o岩o岩好,亦冇蓋過菠菜o既味道.

味道: 3.5分

2. $205.00o既細乳豬併盤

有乳豬,叉燒,大腸同海蜇,乳豬切到大大件,食落,皮脆,厚厚o既肉鬆軟又唔太鹹,感覺又唔太肥膩,唔錯.

味道: 3.5分

而大腸呢,口感爽,一丁點o既異味都冇,抵讚.

味道: 4分

叉燒雖然唔係半肥瘦,但都好鬆軟,味道係微甜,都可以.

味道: 4分

最後到海蜇,睇到都冇乜係海蜇頭只係海蜇鬆,但竟然似食海蜇頭咁乾同’o鞋’,呢個好差.

味道: 0.5分

3. $88.00o既大良炒鮮奶

大家都幾期待呢個餸,可惜冇鮮奶味,而且炒老o左,唔嫩滑,而內裡有啲爽口蝦仁,但都係加唔到分.呢個有啲失望.

味道: 0.5分

4. $160.00o既鍋貼大明蝦

o係荃灣干鍋居食過兩次,呢o度o既窩貼(多士)同樣做到外脆內軟,蝦亦爽,但都幾油吓,或者之佢冇用吸油紙吸啦.

味道: 4分

5. $140.00o既炸子雞半隻

雞皮脆,厚厚o既雞肉仍嫩滑唔o鞋,最好o既就係竟然一啲脂肪都冇,不過我覺得淡o左啲.

味道: 4.5分

6. 唔知幾錢o既焗蓮蓉西米布甸

落單時,女侍應話要一日前預訂,所以諗住今次無緣食,但當我o地啲餸到齊後,男侍應走o黎問我o地啲餸到齊未?我o地答到齊,LKH話重有個布甸.我o地話冇,冇落到.個男侍應就話有,整多o左可以俾我o地.

o黎到喇,熱騰騰重嗅到好香,男侍應想即刻幫我o地分,我即截住佢,話影o左先,我o地自己分.影好後,由男友分,睇到有好多西米同白蓮蓉,之後好笑o既係,女侍應見我男友舀得唔靚,就話佢幫我o地舀,哈哈.

分好食得喇,西米軟腍腍,白蓮蓉同蛋都唔太甜,最重要係仍食到蓮蓉,CTS重話冇糖精,好難得.我o地個個都讚.食完下面o既糖水都仍留有蓮蓉香.

o衣o家上o黎睇返,原來都有分大,細,我估呢個係$88.00o既細size.

味道: 5分

7. 送o既紅豆沙

食完後,女侍應送上呢個紅豆沙,o岩o岩食完焗蓮蓉西米布甸食呢個,一定會比下去,所以我都飲返啖茶至食.呢個唔太甜,紅豆起晒沙,亦食到果皮味,幸好唔太濃.

味道: 3.5分

我o地6個人叫o左3碗白飯,我覺得飯就一般,唔算好軟熟.

服務:
由於LPK我o地買o左啲o野,而我同DC,男友都多o野,變o左有7張凳都唔夠用,於是我問侍應可唔可以俾多張凳我o地?佢都好樂意俾.

上菜速度極快,落完單o野食密密上枱,除o左炸子雞等o左一陣外,只接近一個鐘就食完,估計係呢晚都好多客,而且枱唔多,所以咁快.不過好彩佢o地都唔係咁敢趕客.

環境:唔係好大地方,但都坐得舒適.

價錢:埋單共$946.00,都幾貴.

題外話:鳳城一向俾我感覺一般唔太好,但自從男友上年同舊同事食過後話好食,我至提議呢間,又真係算唔錯喎

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================