上月睇蘋果日報,見到有讀者優惠,以$225.00+原價錢538.00o既加一服務費(即$278.80)食到原價$538.00o既私房料理海鮮自助晚餐(四道私房海鮮料理),如果要$538.00我一定唔o黎,但$278.80都可以.所以我book o左14-12-2013(Sat)晚同男友一齊食,o黎到後,我o地被安排坐o係一張四人枱,枱上已放有兩杯紅酒同一個細鍋,職員同我o地講有刺身,shabu shabu牛肉,火鍋料任食,要加添牛肉就要叫佢o地,其他o既可以自己攞.由於要7:15pm至開始,我就睇吓o野影吓相同攞o野飲,凍飲有好多款,有無糖檸水,蘋果汁,山楂烏梅汁,橙汁同熱情果汁.我先試吓熱情果汁,味道好濃同甜,幾好飲.男友就就試山楂烏梅汁,佢話啲味較得好差,只係酸梅湯味.

好,夠鐘喇.男友出去拎o野食,與此同時,職員放低一大盤,shabu shabu牛肉同海鮮刺身,

男友就攞o左加拿大松葉蟹腳同三個沙律,

職員見到就提醒我o地唔好攞咁多,因為重有好o野俾我o地食,而且驚唔夠位擺.其實我唔多為意有咩o野食.

我o地開始清o野喇,先食砌到靚一靚o既海鮮刺身,同樣有加拿大松葉蟹腳,兩隻牡丹蝦,好多三文魚,兩隻龍蝦仔,三個青口,多片帶子,四隻蝦,已起肉翡翠螺,北寄貝同唔知咩蚌(o係左邊龍蝦仔下面)各兩件,共十樣.

所有刺身都夠鮮味,而牡丹蝦大大隻,好好食,亦都有蝦膏.而龍蝦仔o既膏都特別多.

而由於冇wasabi同豉油,所以男友去排刺身,要o左蟹柳,同樣o既牡丹蝦同海膽,男友話海膽同牡丹蝦都限每人每次拎一件=.=”.海膽顏色好靚,

食落,真係好新鮮好好味.

然後係私房菜o既波士頓龍蝦,呢個面上舖有金蒜,鹹鹹地,幾好食.

炭燒大蝦,啲汁甜甜地o既,OK.

Shabu shabu牛肉,由於薄切,所以好快熟,牛肉嫩,而鍋內放有豬骨同白蘿蔔.

私房菜o既黑魚子帶子,大大隻帶子整到僅僅熟,仍帶有生o既口感.

然後又到私房菜o既海膽燴意粉,

呢個以石板上,放低後聽到孜孜聲響,亦感覺到好熱,份量又超多,我趁熱食喇,海膽味都食到,但最後都係食到意大利番茄味.

o係男友要食蟹腳時至發現冇工具時,我就行去最入面o既熟食區(原來有)攞,之後又因冇o野蘸,就行過去睇,見職員擺o緊一杯一杯黑野色o既o野,就問佢係咩o野o黎?佢答涼粉,我就拎兩杯;然後都問佢有冇蘸蟹腳o既醋?佢答冇,只有橙紅色o既醬,咁我就舀啲啦.然後又攞兩個煙鴨胸.

男友鍾意食涼粉,佢就第一時間食,亦讚好食.我都食,好似冇乜味,佢話啲水好甜,我舀o黎食,都唔係,我食兩啖就唔食,俾埋佢食喇.

而煙鴨胸呢,唔係太鹹,配埋啲菜食幾OK o既.

即煎牛舌同牛仔骨,

估唔到牛舌咁差,內裡唔夠熱,調味亦唔夠,好淡.

細細件o既牛仔骨亦唔香口,麻麻.

到尾聲喇,我至記得有雪糕,就出去攞,呢個係曲奇味,唔太甜,OK冇問題.

之後見到職員捧住一杯杯白色o既甜品,男友道出去拎,呢個係椰汁奶,我食唔到椰汁味,奶味都唔係好食得出,一般啦.

最後o黎多round雪糕,今次換上粉橙色o既,係哈密瓜味.同樣唔係好甜,呢個一般.

而中途我都有斟啲蘋果汁飲,中規中矩,冇乜問題.亦都試吓山楂烏梅汁,冇乜味o既?攪乜?都係飲返最受歡迎o既熱情果汁吧.

呢餐我o地食得幾趕,原因係佢o地9:00pm都開始收o野.

服務:
11-12-2013 (Wed),佢o地有職員打俾我,叫我存每位$100.00訂金到佢o地o既銀行戶口,然後將收據send俾佢o地睇同食完埋單時都要交出扣數.收訂金我就聽過,要收埋要收據就第一次聽,不過算啦,帶埋去,費事口同鼻拗.

環境:
裝修得幾好,幾有格調,而我o地坐o既位雖然係門口位,但幾寧靜同闊落.

價錢:
o衣o家睇見呢個9月,唔係團購o既食評http://www.openrice.com/restaurant/commentdetail.htm?commentid=2323204&tc=sr2&con=rvw,原來呢個所謂讀者優惠價都係原價,半點優惠都冇,果然係抬高價後要人俾返原價.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================