尋日(19-10-2013 Sat)晏晝,同男友到將軍澳見工,見完工係5點幾,周圍行吓就搵o野食.由於我仍未肚餓,而男友猛嗌攰,行o黎呢o度睇吓食乜先,原來係魚蛋河o個啲,而我亦嗅到童年時o既魚蛋河味,於是食呢間.

我o地叫o左$32.00o既潮州四寶河,加$8.00o既熱菜蜜,$26.00o既手唧魚蛋河,加$7.00拼鮮蝦雲吞,加$8.00o既熱檸蜜,再加$9.00要細炸魚皮. =.=”

好快,細炸魚皮o黎到,係一包包包好o既,店員剪開個口俾隻碟,自己搗落碟食.之後兩碗河都到o黎,冇耐兩杯o野飲都到埋,快到你唔信. 影好相開餐,

先食手唧魚蛋,味道同口感都好普通,然後食鮮蝦雲吞,皮薄薄,內裡有兩隻鮮蝦同少量豬肉,好夠味,有驚喜;河粉亦平平無奇,冇乜問題,而湯底係好清o既.(但食完都係冇童年時o既魚蛋河味道.)

之後食炸魚皮,

魚皮脆口亦唔油,冇’益’味,都唔錯喎.

然後逐樣試男友o既潮州四寶,

有邊四寶,有手唧魚蛋(早知又有魚蛋我就叫手打牛太河),墨魚丸各兩粒,扎肉(佢寫潮安扎肉),魚皮餃(佢寫汕頭魚餃)同豬肉丸(係家鄉貢丸嗎?)各一件,加o左潮州地方名就話係潮州o野.

魚蛋唔使再試啦,魚皮餃同墨魚丸一般,扎肉冇乜味,豬肉丸(家鄉貢丸內除o左豬肉外就只有豬肉,絕無其他o野)口感竟然唔錯.

最後飲熱檸蜜,俾o左四片檸檬之多,篤好飲得,但…好澀呀! 澀到連蜜糖味都飲唔到,飲o左一半都真係頂唔住,飲唔到.

男友話佢杯熱菜蜜甜,佢飲o左一半就俾我飲,係甜,係真係好甜,飲完要飲佢o地o既茶解甜.

環境:
坐出面o既位,張張都對正風口,幾凍.不過呢樣唔關佢o地事o既,呢個係商場控制o既.

服務:
除o左快之外都幾好禮貌.

價錢:
根據餐牌,呢餐應該係$90.00,但唔知點解會計o左我o地$87.00.上方o既32同8係計o岩頭兩樣,一個9字係計o岩細炸魚皮,29係咪屬丸類雙拼?如果係,咁另一個9字係咩呢?凍飲?我o地都冇叫凍飲,咁就唔係計少o左而係計多$1.00喎.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================