大前日(24-8-2013 Sat)朝,爸爸返鄉下,我諗住佢當晚唔返o黎,咁就等男友放工後去食飯,點知男友收工打畀我,傾傾吓爸爸返到.

咁我o地唔出去食飯啦,由男友買o野返o黎食,我只交帶佢買楊州炒飯同油菜畀爸爸,其他o既由佢發板.收線後我同爸爸講,男友買o野返o黎食,佢就烚鹹蛋. 佢想食鹹蛋送飯(其實我都想 ,同想食燻蹄)不如叫男友買四寶飯啦,都係唔好喇,費事又煩佢啦.

差唔多一個鐘,佢拎住兩袋o野返o黎,睇睇,o係太興買o野,問佢買o左咩o野?佢答松子雞.松子雞?雖然我唔知咩o野係松子雞,但未打開包裝都嗅到啲味.另一盒係八寶飯,男友佢想食鹹蛋.哈哈,咁o岩o既?

好,打開睇喇,嘩!盒雞好大盒呀!

男友話原本想買半隻,但冇半隻賣,一隻$68.00.再打開埋其他o野,影好想就分o黎食喇.

我先食松子雞,雞肉同皮都好滑,鹹鹹地之餘都仍食到雞味,好味.爸爸就話好鹹,同埋係冰鮮雞,但就算係冰鮮雞,但都OK啊.

然後我食其他,八寶飯

當然有鹹蛋,重有燻蹄 ,紅腸,魷魚,燒肉,叉燒,燒鴨同油雞,而原來呢個八寶飯係餐,跟埋油菜,餐飲就要o左凍奶茶,盛惠$70.00,好貴.

除此之外,男友買多一個白飯,原來要$14.00.

八寶飯o既燒味每樣有兩件,燻蹄爽口;紅腸,鹹蛋正常冇問題啦;油雞我食唔到皮,而覺得呢隻味道淡淡;燒肉係瘦燒肉,我食到豬肉o既腥味;到燒鴨,燒鴨切到大大舊,唔肥o既皮都脆脆地,但冇乜味,同口感麻麻.而魷魚亦都麻麻.

而叉燒就一件係半肥瘦,一件瘦,我,特登唔食半肥瘦o個件,瘦o個件肉唔係咁鬆軟,但又未至於好實,蜜汁味唔係好夠.男友食另外o個件,大讚好食,因為鬆軟.

當我夾起晒啲飯時,見到底原來都有啲油菜,

咁加埋o個碗都OK夠o既,油菜都算甜.

而白飯就正正常常咁啦.

杯奶茶就味道都唔錯,亦夠濃.

最後,呢餐雖然唔太差,但食完我o地三個都係咁飲水,味精太強喇.

味道分係3.5分, 抵食分係2.75分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================