前日(19-4-2013 Fri)請假同男友去澳門氹仔玩,呢日因大霧,所以遲o左半個鐘至開船,o黎到氹仔係12:00pm,亦由於入住o既威斯汀渡假酒店冇免費穿梭巴士由氹仔臨時碼頭接載,於是我o地搭去澳門銀河o既免費穿梭巴士,為爭取時間同橫豎o黎到金剛小儀介紹呢o度o既美食廣場,男友就決定暫時唔再轉車去威斯汀check in,先ｏ係ｏ度食晏.

澳門銀河地方好大,我o地行到o黎,男友話要食佛跳牆,我話要食獅子球,我去睇睇先,睇到原來呢啲冇單買,且分別o係兩個套餐o度.而佛跳牆呢個2人餐係有剁椒銀鱈魚或豉汁蒸銀鱈魚,都係就男友要呢個餐啦,而銀鱈魚呢,就算我唔食得辣,都要試特別啲o既剁椒蒸銀鱈魚,所以最後要呢個$298.00o既套餐,呢個餐重有油菜一碟,兩個白飯同兩杯綠茶.

我買o左之後要等10分鐘,終於有喇.

先影好晒相,

食一人一盅o既佛跳牆,料有原隻鮑魚,冬菇,雞腳,花膠,瘦肉,竹笙,瑤柱,腎,竹笙同好少o既瑤柱.

飲啖湯先,好夠味,亦冇味精,食吓啲料,所有料都好腍,味道係冇晒,因為已經煲晒出o黎,不過,原來竹笙只有一片,其他o既'竹笙'其實係豬皮,不過算啦,啖湯咁好飲.

然後係剁椒蒸銀鱈魚,

呢個真係好辣,辣到男友都頂唔順,要將啲剁椒撥走晒o黎食,但又真係幾好味,我都要蘸啲啲o黎食飯,o係撥走o既時候,原來都有豆豉,唔怪得咁好食.

而銀鱈魚呢,切得幾薄,魚肉好滑,且依然食到魚味,調味料冇完全蓋過晒佢o既魚味,唔錯.

油茶係大大碟生菜加上豉油,呢個冇問題.綠茶一般亦冇問題.

服務:
開頭o既亞姐好好,由於我一開始只入MOP300.00到張咭,咁就用剩MOP2.00,點算好?(因為我冇諗過再食其他o野.)佢提我MOP2.00可以o係任何一間o野買MOP20.00以下o既飲品.咁抵?謝謝佢話我知.

之後我去攞餐,轉o左個後生女serve我,佢就一般o左囉.

環境:
酒店提供o既場地又闊落又舒適,而且有別於food court畀人cheap o既感覺,真係抵你發達.

衛生:
可惜都會有烏蠅飛o黎飛去.

其他:
我唔記得呢o度每間食肆都唔收cash,要買張咭用,而每次增值係MOP50.00或其倍數.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================