上月o係’G’字頭o既團購公司,以半價買o左兩張$150.00o既現金劵,book尋日(12-4-2013 Fri)同男友食晚飯用,我o地o黎到,出面o個位職員即時收o左我兩張現金劵.

坐低後,我o地決定要$518.00o既二人套餐,有:

1. 前菜~胡麻豆腐2份

呢個舖o左木魚碎o係面,攪到我食唔到麻醬味,豆腐本身唔夠滑,亦食唔到豆香味.

2. 沙律~溫泉玉子沙律1份

沙律全部都係菜,極大部份係生菜,栗米粒得幾粒,但原來我冇食到青瓜.不過其實點解沙律要有溫泉蛋?

3. 刺身~刺身四點,有:三文魚,油甘魚各2片,甘蝦2隻同帶子1隻

三文魚同油甘魚都係厚切,前者唔算得上係靚貨;後者有啲鯹,或者油甘魚本身係咁o掛.

甘蝦OK鮮甜,帶子’片’開兩件,亦OK o既.

呢o度o既wasabi唔係支裝唧出o黎o個啲,而係磨出o黎.比較辣啲.

4. 炸物~雜錦天婦羅,有:蝦2隻,野菜4件

野菜係青,紅燈籠椒各一,冬菇同蕃薯,呢啲全部都冇乜問題.

而炸漿唔太厚,不過所有天婦羅都已經放涼o左.

5. 燒肉~燒肉盛盒,有:牛上肩,上排肉,牛胸骨同辣味雞各4片,香草醬燒虎蝦,香草醬燒帆立貝各2隻

同牛油野菌1份

香草醬燒虎蝦,虎蝦唔係大隻,而由於香草醬唔多,我食到後半部時,只係食到冇味o既淨蝦肉.
燒肉盛盒相右下,切成長方形,唔知邊部份o既肉,呢個口感唔錯,醮甜甜o既燒汁食,好夾.
燒肉盛盒相右上方,又唔知邊部份o既肉,呢個口感比上面o個隻差少少,一般.
燒肉盛盒相左下,應該係牛胸骨,呢個都冇乜特別.
香草醬燒帆立貝,帆立貝大大隻,一路燒一路有肉汁流出,食時撈埋香草醬食倍感美味.
燒肉盛盒相左上o既辣味雞,開頭驚佢好辣,但食落又唔係,呢個都OK.
牛油野菌有兩撮金菇,冬菇,好似係雞髀菇同唔知咩o野菇,呢個我覺得牛油味唔夠濃,即使我食時係咁沾牛油.

6. 食事~石鍋牛舌飯1份

我o地食晒上面1-5o既食物,等另叫o既香草醬燒帆立貝同呢個都等o左一段時間,而且都接近個半鐘限定時間,於是催一催侍應,催完都要等o左一陣,兩個至到.
侍應拎到o黎時,即刻問使唔使幫我o地撈,男友順口答好,就係咁,我冇影到未撈前o既相.佢係有一隻蛋o係上面o既.

佢撈o左幾耐吓至撈好食得.呢個啲飯都幾濕,不過都有飯焦,正方體o既牛舌口感佳,而且味道好濃郁,值得一讚.而其他都一般正常吧.

7. 另加o既$89.00o既香草帶子盛盒

差唔多食完燒肉時,覺得可以叫多一樣o野,男友話香草醬燒帆立貝新鮮同幾正,就叫呢個.一客有5隻,同樣都大隻.味道亦同香草醬燒帆立貝一樣吧.

8. 套餐裡面o既是日甜品

紅豆糕,開頭以為都係每人一件,但原來唔係,係兩件,真闊綽.
而紅豆糕係用隔o左渣o既紅豆沙整,所以唔會有紅豆殼’銀’住,好細心.而呢個甜品唔係太甜,口感實啲啲,不過都滑溜.

食完呢餐覺得好飽.

環境:
幾舒服又大,通風唔錯,唔會煙霧彌漫.

服務:
好有禮貌,見我將件褸放o係另一張凳,會主動幫我套住.
每上一樣食物都好有禮貌咁同我o地講聲,亦幫我o地將牛油野菌放o係爐上後,同我o地講牛油o係底,當佢滾o既時候,就將啲野菌撈吓佢.
不過,開頭佢o地都有主動幫我o地斟茶,但斟o左兩轉就冇,要客人叫,或者佢o地啲茶o岩o岩斟晒,煲唔切o掛,因為啲茶係好熱o既.
埋單時我睇睇張單,收$601.70,冇扣到共$300.00,我就話冇扣到,侍應問我係咪之前畀o左兩張共$300.00 o既現金劵?我答係,一入o黎就畀o左.佢就即刻幫我寫返$301.70同問我係咪冇畀會員咭o既form我填(coupon送埋)?我答係.佢就拎返兩張forms畀我o地填.

之後我睇返menu計,原來佢o地當o左我係會員,將二人套餐同香草帶子盛盒分別計o左$468.00同$79.00(9折).但其實我睇到有宣傳,唔知用咩信用咭有88折,咁做咩o野要畀$100.00做會員?分別只係會員可以o係生日月份8折而已,好彩呢張係免費啫.

價錢:
基於佢o地上述擺烏龍,所以如果以正價計,加上團購慳o左$150.00,最後我o地用o左$451.70食本應$667.70o既呢餐,即係畀o左67折我o地.但其實講真,如果要成6百幾食呢餐,我會覺得太貴囉.

價錢畀分我以我o地淨畀o黎計.

其他:
枱上擺o左6種調味料,有魚生豉油,燒汁, 洋蔥粒同香蔥粒,生蒜茸,辣醬同醋.

呢o度食o野就算唔係放題都係限個半鐘交枱,唔通呢個係大趨勢?

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================