今(30-12-2012 Sun)朝同男友起身食早餐,由於佢起得早有時間,而且今日好凍,我就提議o黎呢o度飲茶,我o地剔o左:
1.酸甜炸雲吞(中點)
呢個端上o黎時,睇到三年有兩件係炸過龍,深色o左,味道屬正常.
4. 魚肉釀茄子(中點)
一碟四件, 茄子唔係粗身所以厚切,上面加o左鯪魚肉,呢個冇乜問題.
6. 香煎蘿蔔糕 (中點)
呢個一夾即散,明顯粉唔夠多,男友話咁就好,少粉多蘿蔔.但唔係,蘿蔔汁多o左吧,都唔見有蘿蔔絲,我見到有啲啲臘味粒,而且好似冇煎過,唔香口惹味.
5. 明星流沙包(中點)
奶皇流沙餡唔係好多,我食第一個覺得唔夠流沙,半凝固o既餡比較多,奶皇唔太甜亦唔係好好滑.但到食最後一個,我掰開一半同男友share時,呢個就流沙得多,真係一個個唔同.
3.蟹籽燒賣皇(大點)
燒賣唔係大粒,呢個正常冇問題.
2.鮮竹牛肉球 (中點)
都唔係好大個,亦都冇乜問題.
值得一提o既係所有o野食都熱騰騰.
環境:
上面提及過今日好凍,上到o黎未坐低已經覺得熱,因為冇乜開冷氣,甚至我懷疑開o左暖氣,一路食熱o野一路焗得好辛苦.
而我o地坐o個張枱被兩張枱圍住,其實唔應該係6人枱,因為咁樣係好迫.
服務:
我o地攞o左位後,一個唔係負責我張枱o既侍應問我飲咩o野茶,我答香片同滾水,佢見到負責呢張枱o既侍應,就叫佢幫我o地執枱同開茶.
點知呢個侍應好唔掂,完全唔知要執乜o野,其實我o地係搭枱,而一對老人家客人食完o野係未走要傾偈,佢夠膽死問人o地係咪走.然後第一位侍應再提佢話幫我o地開茶,佢至知原來要畀茶位我o地.
咁佢都問我o地飲咩o野茶,我再答要香片同滾水,佢擺好位又問多一次.我又答香片同滾水.終於茶o黎喇,但壺蓋印住普洱,我諗係咪冇晒茶壺,所以用呢個壺裝香片?但斟出o黎洗杯睇就知唔對路,我就問另一個侍應呢壺係咪普洱?佢答係,我就即刻話我要o既係香片,做咩畀普洱我?佢就幫我換返,之後我見到o個壺普洱放o係擺放熱水o既枱上.
其實o個個侍應o係幫我o地執枱前,已經將呢壺普洱畀另一個要水仙o既茶客,真係唔明,佢開錯o左就唔好亂’質’人要啦.
而上鮮竹牛肉球時,竟然冇問我o地要唔要喼汁,我發覺冇就求祈叫o左個女部長,佢就刻叫人拎返畀我o地.
衛生:
餐具仍然係有啲唔乾淨.
呢餐埋單$118.50
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
