尋日(18-12-2012 Tue)爸爸又突然返鄉下,而又係男友o既例假,咁等我放工後一齊出街食晚飯.

而接近一個禮拜前見到報紙介紹呢間,有好多地道特色o野食,同男友商量過後,佢都話o黎呢間.

我o地好早o黎到,只係三張卡位都有客人,坐低後我o地就叫o左報紙介紹o個三樣先::

3. $30.00o既山東燒雞(例)
呢個竟然係第一個到,由於我唔記得叫手撕,所以畀o左斬件我o地,

而呢個係髀位,燒雞跟一碟蒜醋上,我又先唔蘸汁食,報紙報導燒雞係先燒後滷,再手撕去骨,呢個滷係咩o野滷?係滷水嗎?我就食唔出調味o既味道,只係淡淡o既雞味,咁唯有蘸蒜醋食吧.不過呢個都保留到肉汁同嫩滑o既質感.
味道: 3分

1. $22.00o既東北皮凍
報紙又介紹係以豬頭豬耳豬骨等煲爛再凝固而成,

呢個見到類似豬耳o既部份,食落,味道唔太濃,而雖然見到豬耳紋但係冇咬豬耳o既口感,成個就係一個凍糕,呾我o地都係要夾埋面上o既蒜蓉食.
味道: 3分

4. $18.00o既涼拌海帶
都未上第三樣,男友見上面兩樣o既份量都唔係咁多,就決定叫呢個,因為佢這話要食菜呢.

而呢個海帶都算爽口,亦都係加蒜蓉同豉油,不過就多o左芫荽,海帶撈呢啲調味料食,真係好特別.
味道: 3.5分

2. $68.00o既香燒羊扒
呢個又話用有皮下脂肪o既蒙羔羊o既做,呢個一o黎到已經嗅到張烈羶味,亦感覺到熱騰騰.

食喇,味道係好羶同辣,但估唔到羊肉多汁同軟腍,

而其實提羶o既係上面o既孜然,但就咁食孜然,味道又係唔咁濃喎,呢個果然係同羊肉匹配.

呢個係好食,不過我食埋第二件就覺得漏.
味道: 5分

5. $35.00o既茴香鮮肉餃子
呢個又係一開頭我o地話想叫但驚食唔晒o既o野食,見可以食就叫個餃子啦.呢日有$30.00o既西洋菜鮮肉餃,但咁普通,而且被我見到呢個,所以決定要,一碟有10隻.

出奇地,呢個係就咁淨上兼冇任何調味料,我就試吓淨食,嘩!茴香味道好濃,唔識形容佢o既味道,佢比芫荽更厲害,睇睇,餡料好實,且隻隻都脹卜卜,豬肉唔多,茴香亦剁到好碎,而餃子皮呢,比想像中薄好多.

而食多一隻時,就接受o左茴香o既味道.
味道: 5分

6. $48.00o既拔絲香蕉蘋果
呢個係男友話想食甜品,咁我唔想再出去搵,而且又好耐冇食呢樣,於是又叫.落單時亞姐問我o地要香蕉定蘋果?我答要蘋果,佢話要一樣咋?我問係咁可以一碟有晒兩樣?佢答可以.我就話好啦,我貪心啲要晒兩樣.佢就話唔係,係樣樣都試吓嘛.哈哈,呢位亞姐真知我心意.

呢個都等o左耐終於到o黎,一個後生啲姐仔連埋冰水一齊拎出,上到枱就即刻幫我o地將香蕉蘋果放入冰水後再爽返上碟,我o地自己冇得玩.

整好晒食喇,之前個亞姐換過支膠叉畀我o地食,我拮o黎食係好難拮,因為外層硬o左啦.食落,外層好脆好甜,裡面就軟淋淋;外凍又內熱,不過男友話熱o左o既生果有啲酸.
味道: 4.7分

服務:
主要上菜o既亞姐好nice,不斷幫我o地加茶,唔錯.

其他:
特別一提,呢o度o既茶,同其他茶餐廳,大牌檔o既唔同,係有一片片茶葉o既綠茶,男友話飲到回甘,我就覺得味道淡淡,但咁特別o既茶已經覺得有誠意.

我o地食完o野至攪枱上o既o野,原來有一盅生蒜蓉,開頭我以為係鹽添.

我o地又睇睇menu,呢o度重有好多o野食,有未聽過o既流亭豬手,重有擔擔麵,男友話有機會佢會再o黎試其他o野食.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================