前日(18-8-2012 Sat),同男友出佢公司,佢做o左一輪o野後話去食lunch,食咩o野呢?佢話食拉麵.去邊間食呢?o黎到,啊,原來係佢想試好耐o既呢間,好啦.

入到去,侍應安排我o地坐六人枱o既其中一邊.由於天氣幾熱,男友就要冷拉麵,原本佢想要$55.00o既韓式泡菜冷拉麵,但因為就我唔食辣,所以要$58.00o既麻醬海鮮冷拉麵,而我就要$60.00o既信洲帶子拉麵.落單時,侍應提我信洲帶子拉麵本身係辣,須唔須要走辣?我答走辣.然後男友問佢有咩o野飲品?佢就介紹有五種生果味o既乳酸或梳打,每杯中$16.00,有巨峄提子,和蘋果,士多啤梨同我唔記得o既o野,咁我o地就要和蘋果同士多啤梨乳酸各一杯.

好快,我o既走辣信洲帶子拉麵到o黎,睇睇,嘩!有三隻帶子,重要係連埋裙邊位,真係大隻.

好食吓先,帶子唔算好鮮味,不過不失,拉麵亦唔係好彈牙,湯底味道濃郁.

而男友o既麻醬海鮮冷拉麵到o黎,見到好似有好多料,

佢畀一隻蝦我食,蝦都係雪凍過冰凍o既,不過口感過腍,男友食o個隻就話未完全解凍,重有啲冰沙.咁其實人o地都好難做,太早攞出o黎解凍,驚有細菌,食到人o地肚痾呢.而佢o既冷拉麵呢?麻醬好夠,好好味,粟米粒都甜.

而兩杯o野飲呢,

飲到乳酸味,而蘋果味唔係好似,飲到最後就覺得好甜;而,士多啤梨味就冇咁甜,男友話飲到底有啲果肉.

呢餐連加一埋單$165.00

呢o度o野食唔係好突出,不過勝在服務唔錯,一坐低就畀杯凍冰水,好唔話得.如果食物再做好啲,有望由八王子升到大王子,努力.


題外話/補充資料
Openrice真好笑,好地地,我呢篇食評冇投訴呢間o野,都出e-mail話唔批,內容如下.

由於食評含嚴重指控 / 投訴(早太攞出o黎解凍,驚有細菌,食到人o地肚痾呢)，所以我們必須提醒閣下需要承擔因食評內容失實而導致的任何法律責任。請回覆此電郵或登入帳戶再次提交食評以確認食評內容完全屬實。

Editor冇睇上文下理,只斷章取義就話我投訴,延誤刊登我呢篇食評.

睇o黎佢o地o既中文水平都幾差.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================