上月,由’G’字頭o既團購公司推出以$83.00換購原價$136.00o既美心嘉興糭1隻同冰糭”人氣系列”一盒(三款口味:楊枝甘露,蘋果同韓國柚子各2隻)一套,我買o左兩套.到9-6-2012 (Sat)去拎返屋企先.

換o既時侯店員A睇完兩張coupons,叫另一個店員B攞一盒”人氣系列”出o黎,我冇出聲,佢即時話唔係,係兩盒.店員B始終都係拎一盒出o黎, 店員A即刻話兩盒,拎多一盒出o黎.佢o地幫我入完環保袋後,我就走人返屋企.

返到屋企我打開同拆開盒o黎影相,

點知發覺冇嘉興糭,係一隻都冇,我即刻搵呢間分店o既電話問,電話響o左幾耐吓至有人聽.我即將件事講出,店員即刻話係呀,唔好意思,我o地畀漏你.(呢個應該就係店員A)=.=”佢叫我可以去攞返.我話冇識認,你o地點樣畀我攞返?佢叫我留電話.OK.

我真係唔明,當時只有我一個客, 店員A已經用o左一分鐘時間去睇o個兩張coupons,咁都可以漏.好彩我一返到屋企即刻影相啫,唔係可能到下兩星期食時至發覺,咁咪冇得攞返?

到14-6-2012(Thur)放工返到屋企,男友因休假都o係o度,我就建議食冰糉,我攞o左韓國柚子冰糭出o黎同佢一人食一隻,拆開啲葉睇,透過半透明o既糭睇到啲餡唔多,

影完相食喇,外層好黐,食落透心涼,幸好唔黐口亦唔係好甜,而少之又少o既主角呢,有啲澀,麻麻.

男友話其實個糭咪用木薯粉做,我睇睇美心個盒,冇喎,佢就寫改性澱粉,唔知係咩o野o黎呢?

到15-6-2012(Fri),佢o係公司同佢太子仔食完生日飯後,竟然話唔夠飽,要食多少少o野.我屋企冇即食麵,淨係有烏冬,冇味精點食呢?佢叫我烚糭,啊,係喎,佢重有美心嘉興鮮肉糉未食,

我就幫佢烚等佢過o黎啦.

佢o黎到,糉都夠熱喇.拆開影好相,

cut開一半再影,好似冇乜餡咁,

我黐食幾啖,豬肉有啲o鞋,食到啲肥油,糯米比奇華o既冇咁散,之後見到原來餡係五花腩,

重有蛋黃,

不過蛋黃又係乾o既.而成隻糭都唔係太鹹,不過男友話食完好口渴.

然後我又貪得意,撩男友同我食另一種冰糉,今次佢揀,揀蘋果味.OK.今次未拆開都嗅到蘋果味,

食落,連外層都已經食到蘋果味,又唔太甜,呢個感覺清新啲o岩啲.

最後,到今晚(19-6-2012 Tue),同男友食埋最後o個隻楊枝甘露冰糭,打開時有心理準備楊枝甘露餡都係唔多.點知打開後睇,咦?!多好多喎,影好相食喇.

呢個餡雖然多好多,但味道唔豐富,只食到芒果味,男友重話冇厘特別添.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================