尋日(21-4-2012 Sat)出深水埗幫男友等雪櫃,好早送完o黎,男友竟叫我出尖沙咀行住等佢放工食晚飯,終於等到佢放工,佢話o黎呢間食,佢先搵位坐低,我o黎到,見到裝潢咁靚,價錢一定唔平.

佳低後睇menu,我o地決定要$418.00o既二人套餐C,我o地見個餐好似好少o野咁,就另外叫多個$138.00o既煎蛋包什錦.叫完後,侍應即畀6碟前菜,唔記得韓國o野有前菜添.

6碟前菜有三個係用白醋醃o既青瓜,青燈籠椒同小白菜,有兩個係辣o既,一個係泡菜,一個係小青瓜,而黑色o個碟係芝麻蜜糖黑豆.我個人最鍾意食白醋醃o既青瓜,而微甜o既黑豆唔太腍,口感煙韌,男友盛讚.而最唔好食o既係青燈籠椒,好似冇乜醃過咁.

之後個餐到o黎喇,有:

1.燒烤拼盤,包括:牛舌,鮮魷,腿肉同豬爽片

腿肉醃得夠味,燒好o黎食係好好食.而其實佢係咩o黎呢?o衣o家睇返menu至知係雞腿,但咁深色o既?而豬爽片就係豬頸肉,卷到一個個圈咁,但夾落個網都散開呢個同牛舌都冇乜問題.

至於鮮魷,侍應畀o左一樽鹽我o地,我就洒落去燒,即時好味好多.

而碟邊重有兩件唔知咩o野,男友又燒o黎食,原來係蕃薯,重要係好甜,我又燒o黎食,係喎.真係好甜.

2.海帶蜆湯

女侍應拎到o黎畀男友睇又同佢講句韓文就拎走,我o地估佢想幫我o地分成兩碗,一陣後,果然拎o左兩碗湯o黎,真係幾大碗.

有好多海帶,清熱氣,正.飲落,男友大讚好甜好舒服.

3.珍珠絲苗
我o地食食吓覺得唔對路,點解啲飯未o黎到?唔係我o地食晒啲餸至o黎吧?於是我問o岩o岩放低煎蛋包什錦o既侍應,點知佢係韓國人,唔識聽中文,我o都就即講steam rice,佢就call個男經理o黎,我o地就即問佢,佢就即時用通話器叫人送o黎.

一陣後,到o黎喇,嘩!好大碗呀!冇諗到咁多.飯o既軟硬適中.

4.煎蛋包什錦

有邊幾樣呢?我o地順次序食,有魚塊,食得出魚香,內裡唔乾,唔錯.

翠玉瓜,呢個就差少少,食唔到翠玉瓜o既味道.

豆腐,又香又滑,男友又大讚.

大蝦,男友又讚大大件,好似食蝦扒,我食落,覺得有啲乾.

而以上四種蛋香味都幾濃.

5.餐裡面o既特式雪糕
我o地叫埋單時,女侍應話有甜品送.乜有咩?o衣o家又睇返menu,原來係有,我一時睇漏.呢個係雲呢拿雪糕連一細杯蘋果酒,

雪糕夠香滑,而原來裡面有杏仁粒,加埋蘋果酒食,感覺煥然一新.

最後都係指定動作,有香口膠食,

香口膠係韓國o野,我o地畀完錢出去o趙,好快就冇乜味,而且呢片香口膠係好黐.

埋單: 呢餐連加一共$611.60

服務:
好好,接待員著住傳統韓服;而有好幾位侍應係韓國人.
我影低間店o既相時,o岩o岩有個男侍應行過同講唔知咩o野,我即刻話嚇死,佢即刻同我講唔好意思.哈哈,其實佢都唔係好嚇人,只係因為我怕被人發現我影相啫.
密密斟茶,就連我o地食完雪糕起身走人時,女侍應仍捧住茶壺o黎想幫我o地斟茶.

環境:
佢同一間日本餐廳黐住,正門係一條掛o左好多水晶o既通道,靚到好似行星光大道咁.
而印象中好似全部都係卡位,而且有高牆間格,私隱度高但又好光猛.

其他: 開頭睇menu覺得唔係好多o野,點知未食飯同煎蛋包什錦都已經覺得飽啦.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================