今(17-3-2012 Sat)朝同男友竟然可以早起身,男友話可以去飲茶,原先去富源,但舊舖未開(9:01am),於是搭車落荃灣食,咁就o黎呢間.

o黎到,接待處寫明呢o度係搭枱,如果唔搭枱就同知客講,咁我o地自己搵位啦,竟然被男友搵到一張二人枱,我o地就坐埋去喇,開好茶我o地就剔o野食.

男友睇到有啲特價點心,又見到一張供應到9:30am o既$18.80點心孖寶,就快快要o左蝦米煎腸粉同蝦餃.然後繼續剔其他.交晒點心紙後,等成10幾分鐘至有o野到o黎.

8. $28.00o既懷舊金錢雞
估唔到呢o度都有金錢雞,係男友睇到o既,我o地同爸爸o係前年5月試過得龍(該食評: http://www.openrice.com/restaurant/commentdetail.htm?commentid=2086362)後,終於再有機會食,唔使特登再去新蒲崗lu.o黎到,竟然有四件咁多,好抵喎.

食吓先,蜜汁好甜好正,不過冰肉都膩,食得出豬潤o既甘味,但我o個件竟然冇叉燒,係兩件肥糕夾一件豬潤,

我同男友講,佢話佢食到有係叉燒,豬潤同肥糕各一.咁我睇睇o係剩返o係碟上o個兩件,我見到一件有由兩件叉燒夾o既金錢雞,就’預訂’呢個係我o既.

食o左一啲其他點心,返轉到食呢件,咦?!原來係正常叉燒,豬潤同肥糕各一,叉燒幾大件,

食完呢個覺得好漏.而男友最後至食埋另一件時,發覺原來好似我第一件咁,係兩件肥糕夾一件豬潤,即係話,呢o度四件夾埋係有四件豬潤,兩件叉燒同六件肥糕.算啦,唔使預訂即刻有得食,係咁上下o架喇,不過佢啲蜜汁真係略勝一籌.
味道: 3.8分

1.$28.00o既滷水豬腳仔

男友一開始就先食佢,夾起時大讚好刀功,切得薄.而佢話好香麻油味,我食o左好多熱o野至食返呢個冷盤,我又食唔出麻油味喎,即使滷水味都食唔到,只食到少少辣味,乜呢個唔係滷水豬腳仔咩?唔通畀錯我o地?不過佢o既口感唔肥膩,幾爽口.
味道: 2.5分

5. 點心孖寶其中一個o既蝦米煎腸粉

亞姐放上枱後,會自動加豉油同畀醬,不過冇男友想要o既辣醬,佢就自己拎.呢個煎得唔過火冇問題,只略嫌啲醬畀得太少.
味道: 3分

6. 點心孖寶另外一樣－蝦餃

蝦仁都幾大粒同爽,味道屬正常.
味道: 3分

3. 唔知幾錢o既中點鴛鴦水晶飽

一隻係奶黃餡,一隻係豆沙餡,我食先下面o既菠菜餃至食呢個,而先食前者.皮同菠菜餃一樣,一樣因太軟冇力,咬o左一啖後會掉落o黎. 奶黃饀唔太甜,但冇乜味道又唔香;而豆沙餡呢?感覺味道濃啲,唔太甜,好食啲.而兩者o既餡都係多o既.
味道: 奶黃－1.5分;豆沙－4分

7. $6.80o既奶黃千層糕

男友先食半件,佢話如果我食一定話冇味.咁我食吓先,係,係唔夠味,奶黃本身已經唔夠味,重要係薄薄咁塗上去,糕身都算鬆軟o既.

味道: 2.5分

4. $12.00o既晶瑩菠菜餃

都算大隻,咬落去,皮會因太軟冇力而掉落o黎,內裡o既蝦仁夠爽,但成隻餃都好似冇乜味.
味道: 2分

2. $12.00o既黃沙豬潤燒賣

睇賣相我以為係牛肉但唔係畀山竹,諗諗吓先記得呢個係豬潤燒賣,由於一下子太多o野食,我留到呢個較後時間至食,一段時間後,嗅到豬潤o既腥味,要即時食喇.豬潤一樣係甘,燒賣冇乜特別,普普通通.
味道: 3分

其他:
所有餃同水晶飽o既皮都係黐住墊底紙,唔知攪乜.

服務:
侍應反映好快,密密收碟,叫佢o地都唔會唔應,尤其是個女經理,service唔錯.
題外話/補充資料
由於真係太多o野,我o地食剩o左煎腸粉同豬腳仔,唯有打包拎畀爸爸食.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================