爸爸尋晚約疏堂親戚今(14-6-2011 Tue)朝7點o係呢o度飲茶,我今朝起身梳洗好,7:30am打電話畀到o左酒樓o既爸爸開始飲茶未?佢答疏堂親戚都未到.咁o岩喇,我又去飲茶,哈哈.
我差唔多8:00am去到,爸爸留o左一條叉燒腸o係我o既碗仔o度,我就食啦,腸粉厚厚地,有啲硬,食唔到叉燒乜滯,芫茜就多但唔係咁有味.
而枱上重有未食o既尚賓蝦餃皇同懷舊馬拉糕.爸爸竟然同疏堂親戚食晒件馬拉糕,我冇得食.
好,唔食就唔食,我食蝦餃,蝦餃大大粒,內裡有兩粒蝦仁,都幾爽口,但過鹹.
爸爸話佢剔o左排骨飯但未到,佢就問侍應排骨飯係咪漏o左單?侍應答未整好.
咁我剔多兩樣o野,就係生煎窩貼餃同生煎菜肉包.一陣後,呢兩o野都到喇.點解生煎o既食物咁快到,唔係咁大碗o既排骨飯就遲遲都未到?應該係儲夠單至蒸o掛.
我o地食喇,生煎窩貼餃都幾大隻,但冇蝦o既,而味道一般亦唔到燶.
生煎菜肉包呢,同樣唔夠燶,但都大大隻o既.
然後我睇到有個特價$12.80可揀兩樣o野o既優惠,就畀爸爸睇,佢剔o左菜乾豬骨粥同五香咸水角.
然後又同侍應講cancel排骨飯,對方答唔可以cancel個喎,一係埋單都未o黎就得.
而菜乾豬骨粥同五香咸水角又好快到o黎,我唔食粥啦,由爸爸同疏堂親戚食o左佢.我就食個咸水角,鹹淡適中o既.
爸爸就話啲粥落o左好多味精.
而我o地食剩一個咸水角,兩個生煎菜肉包同一啲粥,然後我見到有客人自取蒸飯類,即係o衣o家至一次過蒸出o黎啦,只係有落單o既就保証有同專人拎o黎.
不一會,亞姐拎o黎,爸爸就同佢講我o地唔要喇,食唔晒.亞姐就冇乜o野咁拎走.
計埋我o黎到前爸爸佢o地食o左個我唔知係咪o既點心,就一共食o左8樣o野,呢餐唔知幾錢,我留低$100.00畀爸爸就o係8:32am走人返工去.
服務:
好少侍應,忙到踢晒腳,枱都執唔切,不過態度都算好.
但飯就過份o左啲啦,爸爸o係第一輪已經剔o左,但一直都冇,我知道爸爸好肚餓,所以係咁催.而成件事睇到,根本佢o地就係定時定候,隔一個鐘出飯,客人係o黎醫肚,唔係捱餓,爸爸等得耐而叫另一樣o野同主動叫cancel都話唔得,如果唔係拎o黎o既亞姐肯拎返走,我諗我o地會同佢o地理論.
衛生:
食食吓,我發現我個碗仔有條米粉,我問爸爸有冇食過米粉?佢答冇.唉!又係洗碗洗得唔乾淨,呢o度o既洗碗工人好唔掂喎.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
