尋日(22-5-2010 Sat)終於扯到爸爸一齊出街食晚飯,臨時臨急打電話o黎book三人枱,好彩重有枱,同預訂o左3件金錢雞,鴨腳包.

我同爸爸一切出發,男友就自己前往,佢早o左3個字到,我叫佢先坐低睇吓menu有咩食.

我同爸爸準時就去到,見佢坐o係最入o既卡位,睇menu,我o地叫埋其他菜色,叫完後,佢o地就會自動送上已訂o既

1.$22.00一件o既金錢雞
三件金錢雞有叉燒,雞肝同冰肉,個樣好靚,影完相我o地就唔客氣喇,但一夾即三件散晒,已經食o左o既男友叫我唔好分開食,要三件一齊食,咁我要o係個碗內重整,好,一啖咬落去.好鹹呀!蜜汁o既甜味唔係咁食得出,不過感覺唔到冰肉o既肥膩感.
味道: 3分

2.$49.00o既鴨腳包
一碟四件,一眼睇出有芋頭,其他要食o左至知,個皮同樣好鹹,似煙肉o既口感,包裡面重有叉燒,燒腩,肝同少少鴨腳,芋頭未夠腍,其他材料o既味道幾乎食唔出,因為都只被一個鹹字蓋過晒.但覺得金錢雞好味啲.
味道: 3分

食過兩個特別頭盤後,到

3. $80.00o既蝦籽炆柚皮
印象中我都好似未食過,所以都叫o黎試吓,柚皮好厚,食落腍晒多汁冇渣,但原來味道係唔係唔好食,爸爸話柚皮係咁o既味.嗯,咁我以後可以唔使再試呢樣o野lu.
味道: 3分

4. $128.00o既半隻古法太爺雞
顏色係淺啡色,雞唔太肥,食落食到被茶葉煙燻過o既香味,雖然淡淡的但唔錯,雞肉唔o鞋,再蘸上洋蔥醬料,更加一流,好味.
味道: 5分

5. $80.00o既大良炒牛奶
呢個同鳳城脆牛奶中選一個,我揀o左呢個,因為炸牛奶o度o度都有得食.呢個上枱睇到都幾滑,趁熱食,食到好重牛奶味,冇炒過火都幾滑,下面舖o左炸米粉,增加口感,不過我o地都係鍾意清晒啲牛奶.
味道: 4.8分

6. $14.00o既淨湯米
呢個係爸爸要o既,見佢有啲韭黃,爸爸食o左半碗就大讚呢碗好味,啖湯好飲冇味精,米粉爽滑,佢一路食一路讚,係我從未見過o既.價錢係埋單我睇睇至知,咁又唔算貴喎.
味道: 5分

7. $80.00o既山楂咕嚕肉
呢個係男友後加o既,所以等好耐,終於到o黎喇,一碟唔太多,咕嚕肉仍脆口,酸甜度適中,但唔食得酸o既爸爸就話酸.而佢真係落o左山楂粒,因為食完後有山楂粒留o係碟o度.而我個人就唔多鍾意有山楂o既味道,呢個由之前留肚o既男友攪掂.
味道: 4.8分

8. 送o既紅棗杞子桂花糕
杞子多到呢,桂花糕清清甜甜可以o既,杞子亦靚,可惜係紅棗,我覺得唔應該加紅棗,因為佢反而影響口感.
味道: 4.5分

9. 又係送o既紅豆沙
唔知係咪我先食桂花糕o既關係,覺得呢個唔甜重有重藥材味,呢個有蓮子同白合,我飲過啖茶再食,都係有微苦,不過算啦,學爸爸話齋,唔好食咁甜.
味道: 3分

前菜
其實每張枱都有前菜,係欖角豆角,我覺得一般o勒,係因為我本身唔多鍾意食欖角o掛,男友就話幾清甜.

環境:
坐圓枱應該會舒服啲,可惜我o地係三個人,被安排坐卡位,卡位枱同椅o既距離唔夠,好迫,枱又細,呢樣係美中不足,下次要一大班人o黎食至好.

服務:
由打電話o黎到我o地食完走都好滿意,佢o地好有禮貌,我o地張枱好細,佢o地見有桔碟就即收.

而最後我o地等咕嚕肉時,女侍應問過幾次啲菜齊晒未?我o地答欠咕嚕肉,我o地以為佢o地趕我o地走,就加多句我o地都想快啲.亞姐就解釋其實唔係,只係想送甜品畀我o地.我男友就講笑話o衣o家上甜品先啦,我o地唔介意調轉次序.

呢餐加埋$10.00位茶錢同$14.00o既前菜,總共$541.00,亞姐話冇加一.

後記: 到今朝起後,有小小肚瀉感,經驗話我知,呢啲係腸胃唔太接受肥膩o既反應,所以金錢雞同鴨腳包呢兩樣食入口時,雖然唔覺油膩,但當然實際仍然係,所以都係切記小食多滋味.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================