尋日(14-11-2009 Sat)晏晝同男友去旺角睇Openrice送o既’賭博默示錄’,未睇之前先o黎個lunch.由油麻地一邊行o黎一邊搵o野食,行到近朗豪坊喇,都搵唔到咩o野食,男友又唔想o係朗豪坊食,見到呢間,佢話試吓.啊,好啦.

佢見到有個$98.00o既精選二人午餐,好似幾抵同幾吸引,就叫呢個.

餐湯我o地又例牌要一紅一白,o黎到我o既白湯變o左粉紅湯,飲落,係南瓜忌廉湯,裡面有啲粒粒加強口感,我見到有冬菇粒,其他就唔知係咩.而味道係一般啦.

而男友o既羅宋湯好深紅色,幾嚇人,我冇問男友味道如何,自己亦冇試.

三選二o既頭盤中,我o地揀o左
鴨胸釀鵝肝慕士沙律同蜜桃鮮蝦沙律.兩樣o野賣相幾好,但係開邊蝦有一隻蝦頭都未清晒,而兩隻o既腸亦都未挑乾淨,要自己清理,都幾核突.食落,蝦都算鮮o既,蜜桃都係咁啦.而沙律汁,唔似黑醋,似豉油多啲.

而鴨胸釀鵝肝慕士呢,我竟然咬唔開鴨胸,鵝肝慕士,口感唔似慕士,而得一撮仔,其實食唔出啲咩o野.

三選人o既主菜A,我o地揀o左炭燒羊扒薄荷沙沙汁配菠蘿炒飯.
三件羊扒唔大件,食落仍有羶味,個汁都幾稀,呢個好似唔使要功夫,而菠蘿炒飯呢,裡面有提子乾,而個飯竟然係好淡好淡,同男友食咁少o野都放棄唔食飯.

二選人o既主菜B,就要香煎龍脷柳配水牛芝士蕃茄沙律,不過落單時侍應話可以改要薯菜,咁我要薯菜啦,佢都提醒,咁冇沙律咯喎.啊,冇問題吖.

但o黎到,竟然畀o左沙律,於是我就要求換返,個侍應又講多次咁就冇沙律,我又答得.咁就換返喇.

薯菜少到呢,而龍脷柳係凍o既,好失望,醮o個水牛芝士,味道又好淡,而心型薯餅呢,只係暖暖的,外面微脆.

最後係餐飲,我要熱奶茶,男友要熱檸茶.我杯奶茶茶味都幾夠,奶就少啲,但可以接受.

環境:
一入到o黎,啲燈好似未開齊,畀我感覺唔係浪漫o既氣氛,只係為o左慳電,不過二人坐四人枱,係好舒服.

服務:
全部係著黑衫黑褲o既男侍應,個個都有禮貌,好好o既.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================