6-9-2009 Sun朝早,同男友o係男友人LKH家攞完o野搭車到旺角,經過東海堂,男友未食過冰皮月餅,咁用八達通1分o既積分加$38.00,就有冰皮月餅同冰燒月餅各一包,每包有兩個,就買o黎畀男友試.

收銀畀我揀味道,但冰燒月餅有一種味道冇晒,而冰皮月餅o既更有四種味道冇晒,變o左得返好少選擇,都好得啫.

咁冰燒月餅只可要好普通o既抺茶紅豆,冰皮月餅就要流心士多啤梨.

食飽晚飯後,食o左查理布朗咖啡專門店o既朱古力月餅(詳情請睇另一篇食評)o既男友,竟然重話要食冰皮月餅,可怕.

咁好啦,就拎出o黎啦,細細個o既兔仔月餅,切開o黎睇,好多綠豆餡,而流心士多啤梨餡就唔多,亦唔知係咪雪得太耐,解凍o既時間唔夠,所以唔係幾流心.

食落,其實我對冰皮冇乜好感,太'粉'味喇,根本就唔好食,而綠豆蓉味道淡淡的,一般.至於流心餡,好彩士多啤梨味唔太假,可接受.

到今日(27-9-2009 Sun),終於可以同男友食抺茶紅豆冰燒月餅,切開o黎睇,餡料好似滑滑的,食落紅豆夠腍但味道唔多夠濃,抺茶味清清淡淡的,男友讚好食,不過如果配奶茶會好味啲.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================