今晚(22-9-2009 Thur)女友人VL約我食預祝我o既生日飯,佢約o係荃灣食,咁邊間好呢?突然記得有日上o黎Openrice八吓,記得有人寫呢間,見幾十蚊就有鵝肝食,都幾抵,所以決定帶VL o黎.
o係公司冇時間上o黎睇清楚地址同推介,只記得荃昌中心,於是走o左搵吓.搵到喇.原來就o係素食店隔離.
我o地坐抵後,唯一一個樓面就推介佢o地抵食o既鵝肝伴牛柳同香草燒羊架,只加$10.00就有湯,餐飲同蒜蓉包,成為一個套餐.樓面話牛柳就算要全熟都唔會韌.
咁我o地都同樣要呢個,落單時,樓面話咁不如一個叫另一個$128.00 o既推介., 樣係鵝肝伴牛柳,但有頭盤黑松露菌芝士焗蠔,干邑龍蝦湯同心太軟.要呢一個餐,但另外o個個就散叫.
啊,咁好啦.但落單時,佢竟然問我要紅湯定白湯?我隨口答白湯,我o地兩個都要八成熟o既牛柳,我要薯菜,VL要意粉.
之後,白湯到o黎,睇見啲色好雪白,亦唔濃.我先飲,味道就同顏色一樣,好淡.
我飲完碗湯,兩件蒜蓉包至到.冇蒜蓉味,感覺只有牛油,口感亦係麻麻.
之後我至記起,乜我o地唔係只叫一個餐咩?咁點解會問我o地要紅湯定白湯?咁個龍蝦湯呢?會唔會唔畀?
VL就問樓面,佢答整o緊,放心.但我問VL,我o地好似只叫一個餐咋喎,點解佢會亂o左?
不過算啦,都飲o左人o地一碗湯咯,龍蝦湯到o黎,呢個VL飲o既,見到顏色係啡色,覺得有啲怪,問吓佢,佢記起有酒,係干邑,佢話酒味蓋過晒.我冇為意有冇龍蝦肉.
然後係一隻黑松露菌芝士焗蠔,VL唔食畀我食,食落,芝士味好似食唔出,蠔都幾新鮮,size適中.
之後到鵝肝伴牛柳,件鵝肝好細件,食落,外層煎得幾脆,味道唔太濃且入口即融.
而牛柳係有兩件o既,八成熟唔韌,可以.而薯條味道亦適中.
VL讚啲汁唔錯.
之後到餐飲,VL話得一杯,畀我叫,樓面話唔係,係兩杯.咁我要凍檸水,VL要凍檸茶.
o黎到,味道較得o岩o岩好,唔太甜亦唔太淡.
之後係心太軟,好細個,比起2月尾o係紅粉佳人http://www.openrice.com/restaurant/commentdetail.htm?commentid=1976590#RecommendReviewBox食重細件,如果單買要$35.00,好貴.樓面話如果唔想朱古力流晒出o黎,可以打開個頂o黎食.VL話如果係暖o既就正.
我o地打開個頂,先試朱古力蛋糕,係暖暖地喎,而朱古力漿味道o岩o岩好,甜度適中.
環境:
開頭以為佢開o係地下,原來唔係,呢o度舖仔細細,但尚算舒適.
服務:
會畀意見同教人食o野,亦會問客人意見,或者因為開o左冇耐o掛.
其實味道冇想像中好,不過以呢個價錢,都可以接受o既.
埋單$223.00
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
