尋日(24-5-2009 Sun),決定同男友出街食晚飯,同佢講開呢間老闆o既故事,佢就話值得支持要o黎試,而且之前睇朋友讚過,於是o黎呢試吓.

好彩再o係o度睇清楚店舖號碼,因上次我o地o黎到葵涌廣場3樓,都見唔到.呢次行到一店舖門口停低望,咁o岩就係302號舖,咁303就o係隔離啦,一望,哈,真係就o係眼前.

門面好細但原來裡面大,因為佢門面大部份位置做o左賣小食.收銀o既(應該係老闆o掛),即問幾多位,我答兩位,佢就好好禮貌咁叫我o地行去o個邊舒服啲.啊.

行到去唔係卡位o既雙人枱,每邊都有一張圓凳畀客人擺o野,好體貼.枱都幾闊.

好,睇menu先,有好多選擇,又睇到我o地眼花同諗好耐,終於決定o左.

我要$52.00o既(羊11)紅酒燒羊架拼咖哩牛肋粒跟薯菜,要三文魚南瓜湯同加$3.00o既凍檸水.
男友要$58.00o既(牛5)黑椒白菌巨型(12安士)澳洲西冷扒跟薯菜,要羅宋湯同又係加$3.00o既凍檸水.

等o左陣,湯同凍檸水都到o黎,先飲湯,係有淡淡o既南瓜味,三文魚味唔覺.而我件蒜蓉包都幾香同脆,但男友話佢o個件唔脆.

之後主菜到o黎,先試牛肋粒,咖哩味對我o黎講算辣,但食食吓又慣o左,牛肋粒夠腍,而羊架都係好夠腍,冇羶味,不過唔覺係紅酒燒.而焗薯份量都恰到好處,粟米有少少牛油香,亦好夠甜,

男友o既西冷扒真係好大件,佢話黑樣汁太搶,蓋過牛扒o既味道,但口感唔錯.

以呢個價錢o黎講係好味o既.

但凍檸水o既糖水唔夠,酸酸地.

服務:
唔差,有禮貌且一叫即應.

環境:
地下跣跣地,要小心.

其他:
套餐價錢只包湯,蒜蓉包同主菜,沙律,餐飲同甜品都要另加錢.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================