** 此 食 肆 的 第 一 個 笑 **

男友人JC話要送個o係住好啲買o既’八月十五’月餅畀我,於是尋晚(15-9-2008 Mon)中秋節翌日假期出o黎攞兼屈佢請我食飯,當係我o既生日飯.

其實佢推介去橫綱食拉麵,點知7:50pm去到,門外有廿幾人,點等?於是都係搵第二間,佢記得上次我同佢去鵝記食甜品時,見到對面有間日本o野食,於是行過o黎.上到去睇menu先知原來同和民同一集團,如果我一早知,我就唔會o黎,不過算啦,都坐低o左咯.

由於佢感冒未清,要戒食好多o野,我話揀拉麵,佢極力反對o係呢間食.哦,咁叫熟食啦,千揀萬揀,揀o左石頭鍋叉燒飯,清酒煮蜆同火龍卷(唔記得正確名稱,其實係天婦羅蝦卷).

落單時,侍應話清酒煮蜆冇晒,咁我o地再睇吓有咩小食,都係揀唔到,算啦,就叫呢兩樣先.

等o既時候我睇吓張order紙,咦?!點解落o左鰻魚卷o既?於是叫侍應改返.

等o左都幾耐,石頭鍋叉燒飯到o黎,影o左相至攪勻佢,都幾多飯焦喎,我就盡量食飯焦啦.好開餐,啲飯濕濕地咁,但味道唔錯,叉燒就係叉燒粒,由於我同碟食,JC用石頭鍋,所以佢食得好慢(我唔記得係保溫呢)

$49.00 o既火龍卷到o左,又先影相,擺得唔錯,而原來係大頭蝦,我就讓JC食個蝦頭.壽司飯都唔錯,天婦羅蝦仍脆,蝦肉亦夠爽.JC就話啲飯比石頭鍋飯差,但口感有層次.

服務:
唔錯,一叫都即應,又冇禮貌.

環境:
開頭我o地坐o係樓梯隔離細細張o既雙人枱,但未落單前見玻璃窗o既卡位客人埋單走就即轉枱,坐得好舒服呢.

呢次埋單$100.10,多謝JC.

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================