** 此食肆的第一個OK **

今朝(22-3-2008 Sat)同爸媽o黎呢間佢o地話坐卡座,間到一格格唔似酒樓o既酒樓飲茶.佢o地先落o黎,我大約8:20am到o黎,門口o個啲多數係四人卡座,我行到中間,終於發現爸媽o既蹤影.佢o地坐梳化椅,我坐高背椅,個椅背真係高到近天花,唔知係咪想啲人留意,唔好踫撞到呢啲椅呢?

我o地選o左:

4.脆皮鯪魚球－選燒汁(中點)
皮都唔係好脆吖,我揀燒汁,但畀o左似辣椒油咁o既色o既汗我o地,明顯唔係燒汁,不過爸媽都照醮o黎食,算吧.送到我咀邊,我卻臭到有陣似魚鯹帶少少縮o既味咁,食落,唔...應該冇問題o既,而個汁,冇乜味o既?

我睇返點心紙,有黑椒汁,燒汁同蜆介汁三款揀,明顯,佢o地畀錯o左蜆介汁我o地,但又唔覺有蜆味,奇怪.

5.蘿蔔千絲酥(大點)
嘩!呢個係大點啊?真係好唔抵喎,好細件.食落,係好多蘿蔔絲,但冇蘿蔔味.

2.金沙奶皇包(大點)
好熱,包唔大件,幸皮唔太厚,奶黃唔太香但口感可以.

3.田園時蔬(大點)
冇難度.

1.雲南脆瓜珍菌腸(大點)
如相中所見,個碟好長,一碟三件,但其實唔長.夾起,因為冇油,所以黐住個碟同筷子.食落,好淡,只有蔥味,要落豉油.而脆瓜呢?係冇o既.

6.香煎蘿蔔糕伴辣醬(大點)
漏單,o個張'顧客點菜'紙冇呢樣o野.不過我o地冇同佢講,因為爸話驚太多o野食.

但最後我都加兩樣o野:
7.潮州粉果(小點)
又係冇油,個皮又係黐住對筷子.呢個味道又係普通啦.

6.XO醬蘿蔔糕(大點)
賣相好靚,十件蘿蔔糕上舖漏紅,黃甜椒粒,西芹絲同洋蔥絲.食落,好辣呀!XO醬入晒味,我覺得蘿蔔糕本身屬中上水準,因為佢o地煎得好香脆,餡料亦算多同好味,奈何係太辣.媽媽唔信,佢食o左都話辣,爸爸唔可以食辣o野,佢o左一件就唔食喇.

食完所有o野後,侍應會問上齊未?要唔要紅豆沙?送o既.爸就答:好吖.咁就一人一碗喇.(我覺得奇怪,晨早流流食甜品.)

紅豆沙送到,臭到好香,食落,唔係好甜,令紅豆唔係咁好味,不過多謝佢o地o既誠意啦.

全部點心都好精緻(細件),且即叫即整,但唔使等好耐.

服務:
上菜放低時會好好口咁話慢用.
見冇乜茶,蓋都未打開都即刻主動話幫我o地加水,唔錯.
每食完一樣就即刻上前收碟,某程度係好,但太密令我覺得好煩.
搵人埋單時,偏偏冇侍應,唯冇畀傳菜,好彩佢o地唔會推,會幫我o地畀侍應.

環境:
我第一次o黎呢間飲茶,見到個正門有啲疑惑係側門定後門?因為好細同一過o左o個張知客o既枱仔,就已經係座位.到食完o野走,至知原來真係正門.

所有枱都冇舖枱布,但佢o地放低食物都會好輕手,所以唔嘈.

終於明白媽話唔鍾意呢種裝修,佢整到係西化中式酒樓,好想畀人有私人空間咁,但間開就變得好似好焗促咁.

其他:
唔係好接受佢o地o既餐具,古古怪怪咁,匙柄太長,個碗又太深,杯又.....最差o既感覺係用色方面,令餐具似乞丐用的乞食工具.有時玩品味真係要諗清諗楚.

埋單$115.00

價錢:
小點:$12.80,中點:$15.80,大點:$18.80

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================