尋日(18-11-2007 Sun)同男友人KL,女友人K同L行完山歇完腳後,由即將見面o既新男友人P決定食咩啦,佢提議呢o度,好啊,反正未食過.
6點,我o地先到o黎,由於時間尚早,裡面暫時係冇客,我o地坐o左好大張o既五人枱,亞叔好快手畀o左一壺鐵觀音我o地.10分鐘後,P o黎到喇,我o地叫馳名咸雞(好想知係點樣咸法同點解馳名.)而亞叔就推介我o地叫半隻,話例牌得啲咁多,好啦.咁我o地繼續落單,但未寫齊啫,背後o既味部已遞上半隻咸雞喇,真誇張.
好繼續要茄瓜肉碎煲,雜菜粉絲煲同胡椒豬肚湯.另要o左白飯白粥各3碗.
試隻雞先,開頭點o左薑蔥食,覺得冇咩特別,於是試吓唔點,雞肉唔咸,但隻雞好靚,唔肥,幾乎一啲雞油都冇,且好有雞味,食吓皮,皮就咸,但唔太咸吖,幾好食,我o地好快就清晒.
等o左好耐,因P o衣o家係放一個鐘食飯時間,所以我o地催促一吓,亞叔話就快o架喇.再得一陣,胡椒豬肚湯到o黎.
唔太雪白o既湯,裡面有好多豬肚,豬腸就唔多,幾真材實料.我一向怕辣,今次飲落,唔算好辣,算o岩我胃口,而豬肚亦唔腥.可以啊.
然後,雜菜粉絲煲到o黎,有白菜同生菜,KL話好入味,唔錯.係啊,都幾好,唔會淡茂茂咁.
最後茄瓜肉碎煲都到o黎,大大件o既茄子OK,唔太腍又唔太硬,口感一流,肉碎雖然唔多,但送飯亦一流啊.
大約7:10pm開始多客人喇,呢o度都熱鬧起上o黎.亞姐問要唔要糖水?送o既,不過得紅豆沙一樣.好啊,重以為食套餐至有添,多謝晒.
糖水送上,紅豆好大粒且起晒沙,食落,淡淡o既果皮味道加唔太甜o既糖水,又好正呢,可能媲美o係九龍城o既甜品店啊.
呢餐真係食得好開心,好彩自己接受P o既提議而唔堅持金泰燒烤,否則就走寶喇.
不過馳名咸雞都幾貴吓,半隻都要$98.00.但下次可以帶爸媽o黎試.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
