尋晚(27-10-2007 Sat)同女性朋友R o係元朗整完同買完o野後,就走o黎試吓印尼菜,其實我o地都幾攰,沿青山公路由置樂花園行過o黎,到彩華花園外圍搵唔到,R想放棄,我肯定唔係彩華花園.於是向內街行,如果搵唔到就放棄食其他,因呢o度有好多泰國同印度o野食.當放棄之際,竟然被我見到喇.不過其門外同其他食肆比好明顯地唔同,間間唔係有人等就係坐到出門口,而佢就冇人等位.時間應該係8:00pm左右啦.
我o地入到去,剩返最入近水吧個位,但R唔鍾意,同近門口o既o岩o岩有人走,於是轉枱.
我o地叫o左娘惹炒椰菜,娘惹印尼燒雞半隻,辣燒魚及印尼炒飯.
落完order,女侍應送上有一籃炸蝦片,我o地試吓,唔……有啲油’益’味,蝦片唔太脆.食完,男侍應問我o地重要唔要啲?R問可以嗎?佢答可以,咁要炸米餅定蝦片?哦?!此時佢好似意會到我o地只食o左炸蝦片,於是佢話畀炸米餅你o地試.
到o黎喇,係兩件大大塊o既,唔……幾有米o既香味,口感同蝦片差唔多.
不久,燒雞到o黎,幾香,面淋上淡色啲o既沙爹汁,但我o地連任何餐具都冇,R問佢,男侍應問我o地有冇叫白飯?我答叫o左炒飯,佢好似有啲疑惑咁拎餐具o黎.
好,開餐喇,雞係輕輕燒過,皮唔脆,雞肉仍滑,呢個OK o既.
娘惹炒椰菜都到o左,好大碟,不過唔覺係女侍應話有蒜茸炒喎.R覺得好油於是向男侍應反映,男侍應主動話cancel,*o*我o地冇諗過cancel,不過好吧,然後R話其實佢食到係用’萬年油’炒.@.@”
炒飯o黎到,點解唔係有隻荷包蛋o係面o既咩?黑色o既炒飯,內裡
只有少量炒蛋同蔥粒,不過夠香o既.
好耐好耐,辣燒魚重未到,R又問問,男侍應話冇落到,就加返.再過多陣,R問如果未整就唔要了,男侍應真係入o左廚房check,答燒好o架喇,o衣o家整o緊個汁.哦,好啦,等多陣啦.不久到o左喇,女侍應都講句唔好意思,OK啦.
原兩件似魚扖o既燒魚,淋上微辣微酸o既汁,見有少少蕃茄蓉,食落,魚皮有小小脆口,魚肉亦鮮,不過唔知係咩魚,R問問,男侍應答係鮫魚.
埋單後會有兩粒唔同o既帶有薄荷味o既糖送畀客人.
服務:
態度係好好,好有禮貌好親切,亦不時行o黎行去睇睇你張枱,可惜o既係唔知佢o地留意乜o野,冇水都唔會斟,係次次都要叫.不過開頭轉枱後,向男侍應反映覺得好熱,佢話個玻璃門打開o左,閂o左後係有啲風,但係係偏熱o既風,而且隔離枱o既客人成日行出行入,都唔閂門,男侍應就成日要閂,呢樣好好.
環境:
就係冷氣同廚房通風唔係幾好,但坐位闊落,簡單裝修但唔錯.
就係差呢小小,如果可以改善,應該好快客似雲來.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
