尋晚(8-8-2007 Wed)大約6:45同女性朋友T到o黎,本身對深水(土步)區食肆o既感覺只屬一般,但因今次係T o既生日飯,而佢又極力推介呢o度o既放題抵食,OK.於是都唔理呢兩日話食未煮熟o既魚會生蟲同肚瀉o既危險,就o黎o左呢o度.
時間尚早,店內只有一枱客,女侍應亦上前招待,環境不錯的,座位寬敞,通道闊落,枱與枱之間距離亦很闊,不會椅貼椅.再細看,裝修簡單不花巧,枱椅都以白色為主調,但覺得乾淨的,座椅亦很舒適.
我們選擇放題,於是快手填了多款刺身及炸物,亦要o左個燒手羽,唔知係咩o黎.飲品方面係任飲,而且可以自取,有趣.
好快,第一樣到o黎o既係炸三文魚皮,細細件,炸漿好薄,睇到黑色o既三文魚皮,點鼓油食,唔掂,好硬,本身冇咩味,就只有點o左o既破油味,但呢隻豉油又勁鹹,
其他炸物o黎到喇,嘩!好大堆頭啊,我o地只預每人每樣一件,但唔係囉.天婦羅蝦,蝦好爽,粉團亦唔厚,且好有蛋味.不過T話今次已經厚o左喇,我睇真啲,嘩!真係唔算厚lu喎.咁叻?其他炸蕃薯,南瓜都一般啦,不過始終都係炸物,食得多都好漏.
刺身同壽司都到,刺身一樣係好大堆頭,壽司….係T搖控我填錯o左,其實唔想食壽司,不過幸而我發覺係壽司類,於是填o左4款就收手,改填刺身.幸而壽司種類同數量完全符合我o地.不過容後至清理.
刺身新鮮,不過白拖羅好似冇咩味.T話赤貝同北寄貝都好爽,甜蝦都有好多隻啊.
中途有兩隻燒雞翼送到,我o地話冇叫過,侍應話係手羽,啊,原來手羽即係雞翼,中招添,因為係雞全翼,咁就一定好飽肚啦.食落,好乾,冇咩味.
最後食壽司lu,我食o左蟹子沙律壽司,不過不失啦,T就食埋其他四件壽司,不過佢話壽司上o既魚生唔好食,好乾同明顯薄好多.
中途一班book o左枱o既20個年輕人o黎到,令全店吵鬧起o黎,亦因此全店剩餘o既座位唔多,外面亦有人等位了,好彩我o地好早o黎到.
好,我o地加碼,要o左銀雪魚粥,燒多春魚,燒墨魚丸,炒野菜,金菇牛肉卷同蟹子沙律
銀雪魚粥粥好綿,銀雪魚亦多,有蛋花,食落,有啲蛋味但冇o左魚味,魚唔鞋,不過唔識形容成碗粥叫做好唔好食.
金菇牛肉卷,燒墨魚丸冇咩特別.多春魚就一人一條,賣相唔似燒過又冇乜色,會唔會冇味呢?食吓先,鹹o既.
本應佢o地上菜都好快,但一多人,只有兩個女侍應就好明顯做唔切,就連廚房都漏單同混亂,我o地剩餘o既o野食都要催3次,侍應竟然叫我o地再填過.填o左咪一樣好慢.
再交o左後,o黎個中華沙律,係T想要蟹子沙律但填錯o左,算啦,照食.不過越食越辣,T就話唔辣.我o地最後都填返正要蟹子沙律.
好,連蟹子沙律都o黎到重食埋,炒野菜終於出場喇,大大碟,不過就只有荳芽同紹菜,我o地都食唔晒喇.
除o左刺物身等其他凍食外,其餘o既全部都好夠熱.
我覺得佢o地o既服務係後勁不繼囉,一多人慢都唔緊要,但唔好亂嘛.
其實我o地重有好多o野都未試,唯有等下次有機會返炒時要記得唔食尋晚食過o既o野,否則都係試唔到.
價錢係$118.00加一,o係深水(土步)o黎講,呢o度算適合啦,如果可以,我畀OK同笑之間,不過冇.咁我今次手鬆啲,畀個笑.
尋晚好特別,係8月8日o既立秋,咁易記o既中西曆加上正懸掛今年第一個風球(一號風球),亦係我一生人以o黎第一次懸掛風球仍外出食飯(返工例外),且重要係同人慶祝生日.
============================================
感謝 愛食 提供以上資料
愛食 的網誌: http://www.openrice.com/zh/gourmet/reviews.htm?userid=46226&city=hongkong
============================================
